އަގުހުރި އިނާމު ތަކާއެކު ސިޓީ ކައުންސިލްގެ ޤުރުއާނާއި މަދަހަ މުބާރާތުގައި ބައިވެރިވުމަށް ހުޅުވާލައި

 މާލޭ ސީޓީ ކައުންސިލުން އަންނަ އަހަރުގެ ރަމަޟާން މަހު ބާއްވަން ނިންމާފައިވާ ކީރިތި ޤުރްއާން ކިޔެވުމުގެ މުބާރާތާއި މަދަހަ މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ.

މާލޭ ސިޓީ ކައުންސިލުން ބާއްވާ މި ޤުރުއާން މުބާރާތަކީ މިދިޔަ އަހަރުވެސް ބާއްވާފައިވާ މުބާރާތެކެވެ. މި މުބާރާތް ކުރިއަށް ގެންދަނީ ދެ ގޮތްޕަކަށް ބަހާލައިގެންނެވެ. އެގޮތުން ބަލައިގެން ކިޔެވުމުގެ ގޮތްޕާއި ނުބަލައި ކިޔެވުމުގެ ގޮފިން ކޮންމެ ގޮތްޕެއްގައި ވެސް ހަ އުމުރުފުރާ ހިމެނެއެވެ.

އަގުހުރި އިނާމު ތަކާއިއެކު ކުރިއަށް ގެންދާ މި މުބާރާތުގައި ބައިވެރިވާން ހުޅުވާލާފައިވާ އުމުރުފުރާ ތަކަކީ:

6 އަހަރުން ދަށް

9 އަހަރުން ދަށް

11 އަހަރުން ދަށް

13 އަހަރުން ދަށް

16އަހަރުން ދަށް

 19އަހަރުން ދަށް

 މި މުބާރާތުގައި ބައިވެރިވާ ދަރިވަރުންގެ އުމުރުފުރާ ކަނޑައެޅުމުގައި ބަލާނީ 1 ޖަނަވަރީ 2024 އަށް ދަރިވަރަށް ފުރޭ އަހަރަށެވެ. މި މުބާރާތުގައި ޤުރުއާން އަދި މަދަހަ ކިޔާ، ހަ އަހަރުން ދަށުގެ އުމުރުފުރާގެ ދަރިވަރުންގެ ކިޔެވުމަށް އިންސާފު ނުކުރާނެކަމަށެވެ.
އެ ނޫން ކޮންމެ އުމުރުފުރާއަކުން އެންމެ މޮޅު ފަސް ދަރިވަރުން ހޮވާނެއެވެ. ކޮންމެ އުމުރުފުރާއަކުން، އެއް ވަނަ ، ދެވަނަ އަދި ތިން ވަނަ ހޮވާނެއެވެ. ޤުރުއާން މުބާރާތުގައި އެ ވަނަތައް ހޮވާނީ ދެ ގޮފި ވަކިންނެވެ. މަދަހަ މުބާރާތުގައި އެއް ވަނަ ، ދެ ވަނަ ތިން ވަނަ އާއި މުޅި މުބާރާތުން އެއް ވަނަ ދެ ވަނަ ތިން ވަނަ ހޮވާނެއެވެ.

މުބާރާތުގައި ވަނަވަނައަށް ހޮވޭ ދަރިވަރުންނަށް ފައިސާގެ އިނާމާއެކު ޓްރޮފީއާއި ސެޓްފިކެޓް ދިނުމަށް ވަނީ ހަމަޖެހިފައެވެ. އެގޮތުން، 1 ވަނައަށް ދާ ދަރިވަރަކަށް 7000ރ. ޓްރޮފީ އާއި ސެޓްފިކެޓް ދޭއިރު، 2 ވަނަ އަށް 5000ރ. ޓްރޮފީ އާއި ސެޓްފިކެޓް ދޭނެއެވެ. އަދި 3 ވަނަ އަށް ހޮވޭ ދަރިވަރަކަށް 3000ރ. ޓްރޮފީ އާއި ސެޓްފިކެޓް ދޭނެކަމަަށް ކައުންސިލުން ވިދާޅުވެއެވެ.

މީގެ އިތުރުން މުޅިމުބާރާތުން އެއްވަނަ، ދެވަަނަ ތިންވަނައަށް ވެސް ޙާއްޞަ އިނާމުތަކެއް ވަނީ ކަނޑައެޅިފައެވެ. މުޅީމުބާރާތުން:

- 1 ވަނަ -/10000ރ. ޓްރޮފީ އާއި ސެޓްފިކެޓް
- 2 ވަނަ -/7000ރ. ޓްރޮފީ އާއި ސެޓްފިކެޓް
- 3 ވަނަ -/5000ރ. ޓްރޮފީ އާއި ސެޓްފިކެޓް

މި ދެ މުބާރާތުގައި ބައިވެރިވުމުގެ ފުރުސަތު ހުޅުވާލާފައިވަނީ މިއަދުން ފެށިގެން މި މަހުގެ 30 ވަނަ ދުވަހުގެ މެންދުރު ފަހު 2:00 ގެ ނިޔަލަށެވެ. ބައިވެރިވާން ބޭނުންވާ ދަރިވަރުންނަށް ފޯމު ހުށަހެޅުމަށް ވަނީ ހުޅުވާލާފައެެވެ.