އައިއޯއިން ތަމްރީނު ކުރުމުގެ މަސައްކަތް އެބަކުރަން -ސީޕީ ޝުޖާޢު

އިންވެސްޓިގޭޝަން އޮފިސަރުން (އައިއޯ) އިންނަށް ފެންވަރު ރަނގަޅު ތަމްރީނު ދިނުމުގެ މަސައްކަތް ކުރައްވާކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ. 

ފާއިތުވި އެއް އަހަރުގެ ތެރޭގައި މޯލްޑިވްސް ޕޮލިސް ސަރވިސް އިން ހާސިލްކުރި މުހިންމު ކަންތައްތަކުގެ މައުލޫމާތު ހިއްސާކުރައްވަމުން ސީޕީ ވިދާޅުވީ އައިއޯއިންގެ އަދަދު މަދު ކަމަށާއި ކޮންމެ އައިއޯ އަކަށް ޖެހޭ މައްސަލައިގެ އަދަދަށް ބަލާއިރު ކޮންމެ އައިއޯއަކަށް ވަރަށް ބައިވަރު މައްސަލަތަކެއް އެބަހުރި ކަމުގައެވެ. ސަބަބަކީ ޤާނޫނަށް އެންމެ ފަހުން ގެނައި ބަދަލުގަ އައިއޯއިންނަކީ ވަކިކަހަލަ ތަމްރީނުތަކެއް ހާސިލްކޮށްގެން ތިބި ބައެއްގެ ގޮތުގަ ނިންމި ނިންމުމުގަ ކޮލިފިކޭޝަން ނެތް ވަރަށް ގިނަ އައިއޯއިން އެ މަސައްކަތް ނުކުރާނެތީ ކަމުގައެވެ.

އެއާއެކު މޯލްޑިވްސް ޕޮލިސް ސަރވިސްއަށް ހުށަހެޅޭ މައްސަލަތަކުގެ ވާނުވާ ނޭންގޭ މައްސަލައަކީ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށާއި އަމާޒަކީ މައްސަލަ ބައްލަވާ އައިއޯ އިން މަދުވެގެން 14 ދުވަހުގެ ތެރޭގައި މައްސަލަ ހުށަހެޅި ފަރާތައް ގުޅާ މައްސަލަ ކުރިއަށްދާ ގޮތުގެ މައުލޫމާތު ފޯރުކޮށްދޭ މިންވަރަށް މަސައްކަތްތައް ބައްޓަންކުރުން ކަމަށްވެސް ސީޕީ ވިދާޅުވިއެވެ.

ސީޕީ ވިދާޅުވީ މިހާރުވެސް ބައެއް އަތޮޅުތަކުގައި އެގޮތަށް މަސައްކަތްތައް ކުރިއަށްދާ ކަމަށާއި އައިއޯ އިން މިހާރުވެސް ހިއްސާކުރަންޖެހޭ މައުލުމާތުތައް މައްސަލަ ހުށަހަޅާ ފަރާތާ ފުރަތަމަ 24 ގަޑިއިރުގެ ތެރޭގައި ހިއްސާކުރަމުންދާ ކަމަށާއި ނަމަވެސް އޭގެ ފަހުން އެ މައްސަލައިގައި ވާނުވާ ނޭނގޭ މައްސަލައަކީ ތަކުރާރުވާ ކަމެއް ކަމަށެވެ.

ސީޕީ ވިދާޅުވީ އެކަންކަމަށް ހައްލު ހޯދުމަށްޓަކައި ބަދަލުތަކެއް ގެންނަވަން ނިންމަވާފައިވާ ކަމަށާއި މިކަމުގެ ސަބަބުން ފުލުހުންގެ ޚިދުމަތަށް ރައްޔިތުން ކުރާ އިތުބާރު އަނެއްކާވެސް އިތުރުވެގެންދާނެ ކަމަށެވެ.

ފުލުހުންނާއި ރައްޔިތުންނާ އޮންނަ ގުޅުން ވަރުގަދަ ކުރުމަށްޓަކައި ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ ސީޕީ ވިދާޅުވީ ފުލުހުންނަކީ 24 ގަޑިއިރު ރައްޔިތުންގެ ޚިދުމަތުގައި މަސައްކަތް ކުރަންޖެހޭ ބައެއްކަން ފުލުހުންގެ މަސައްކަތުން ދައްކާދިނުމަކީ މުހިންމު ކަމެއް ކަމަށެވެ.