ޕާޓީ ބަދަލުކުރުމުން ގޮނޑި ގެއްލޭ އިސްލާޙެއް

ރައްޔިތުންގެ މަޖިލީހަށް މެމްބަރުން އިންތިޚާބުވާ ޕާޓީ ބަދަލުކޮށްފި ނަމަ، އެ މެމްބަރެއްގެ ގޮނޑި ގެއްލޭ ގޮތަށް ޤާނޫނުއަސާސީއަށް އިސްލާޙެއް ހުށަހެޅުމަށް ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް ޕީއެންސީން ނިންމައިފިއެވެ.

މީޑިއާތަކުން ރިޕޯޓު ކޮށްފައިވާ ގޮތުގައި މެންބަރުކަމުގެ ގޮނޑި ގެއްލޭ ގޮތަށް ޤާނޫނުއަސާސީ އިސްލާޙު ކުރަން މާދަމާ ރައްޔިތުންގެ މަޖިލީހަށް ހުށަހަޅަނީ ސަރުކާރު ހިންގާ ޕީއެންސީންނެވެ.

ނިމިދިޔަ 19 ވަނަ މަޖިލީހުގެ ފަހުކޮޅު ފާސްކުރި އެންޓި ޑިފެކްޝަން ގާނޫނު މިހާރު އޮންނަ ގޮތުން ގޮނޑި ގެއްލޭނީ، އިންތިޚާބުވި ޕާޓީން އަމިއްލައަށް ވަކިވުން ނުވަތަ އިންތިޚާބުވި ޕާޓީ ނޫން އެހެން ޕާޓީއެއްގެ ދަފުތަރުގައި ޖެހުން ނުވަތަ އަމިއްލަގޮތުން އިންތިޚާބުވާ މެންބަރަކު ޕާޓީއަކަށް ސޮއިކުރުމުންނެވެ. 

މަޖިލިސް މެމްބަރުން އެހެން ޕާޓީއަކަށް ބަދަލުވެއްޖެ ނަމަ، ގޮނޑި ގެއްލޭނެ ކަމަށް މިވަގުތު އޮންނަނީ އެންޓި ޑިފެކްޝަން ގާނޫނުގަ އެެވެ. އެންޓި ޑިފެކްޝަން ގާނޫނުގައިވާ ގޮތުން އިންތިހާބުވާ ޕާޓީ ބަދަލުކޮށްފި ނަމަ މެންބަރުކަމުން އަމިއްލައަށް އިސްތިއުފާ ދޭންޖެހެ އެވެ. ނަމަވެސް އިސްތިއުފާ ނުދީފިނަމަ އަމަލު ކުރާނެ ގޮތެއް މި ގާނޫނުގައި ހިމަނާފައެއް ނުވެއެވެ.

މަޖިލިސް މެންބަރުންގެ ގޮނޑި ގެއްލޭ ގޮތަށް އެންމެ ފުރަތަމަ އެންޓި ޑިފެކްޝަން ބިލެއް ހުށަހަޅައި ގާނޫނެއް އެކުލަވާލީ 18 ވަނަ ރައްޔިތުންގެ މަޖިލީހުގަ އެވެ. ނަމަވެސް އެމްޑީޕީ ސަރުކާރު ވެރިކަމަށް އައުމަށް ފަހުގައި ވަނީ އެ ގާނޫނު އުވާލައިފައެވެ.