އޭއައިގެ އެހީގައި ތައްޔާރުކޮށްފައިވާ ހަޤީގަތެއް ނެތް ވީޑިއޯތައް ދައުރު ނުކުރުމަށް ޤާސިމް އެދިވަޑައިގެންފި

ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ނަމުގައި ސޯޝަލް މީޑިއާގައި ދައުރުވަމުންދާ އޮޅުވާލުމުގެ ވީޑިއޯތަކާ ގުޅިގެން ކަންބޮޑުވުން ފާޅުކުރައްވާ އެކަން އެގޮތަށް ނުކުރުމަަށް އެދިވަޑައިގެންފިއެވެ.

ޤާސިމް އިބްރާހިމް އެކްސް  ގައި ކުރެއްވި ޕޯސްޓެއްގައި ވިދާޅުވެފައިވަނީ، ޓިކްޓޮކް، އިންސްޓަގްރާމް އަދި ފޭސްބުކް ފަދަ ސޯޝަލް މީޑިއާ ޕްލެޓްފޯމްތަކުގައި އެބޭފުޅާގެ ފޮޓޯ އަދި ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސްގެ އެހީގައި ތައްޔާރުކޮށްފައިވާ އޮޅުވާލުމުގެ ކޮންޓެންޓް ދައުރުވަމުންދާ ކަމަށެވެ.

މި ވީޑިއޯތަކުގައި، އޮފްޝޯ ޓްރޭޑިންގ އަދި އަވަސް ފައިދާ ލިބޭނެ އިންވެސްޓްމަންޓްތަކުގެ ފުރުޞަތު ދިވެހިންނަށް ހޯދައިދޭ ކަމަށް ދައްކުވައިދޭ ކަމަށް ޤާސިމް ވިދާޅުވިއެވެ. އަދި ޤައުމީ ބޭންކް މެދުވެރިވެގެން މި ސްކީމްގެ ފައިދާ ލިބޭނެ ކަމަށްވެސް މި ވީޑިއޯތަކުގައި ދައްކުވައިދޭ ކަމަށް އޭނާ ފާހަގަކުރެއްވިއެވެ.

ޤާސިމް އިބްރާހިމް ރައްޔިތުންނަށް އިލްތިމާސް ކުރައްވާފައިވަނީ މިފަދަ އެއްވެސް ބާވަތެއްގެ ސްކޭމެއްގައި ނުޖެހުމަށެވެ. އަދި މިފަދަ އޮޅުވާލުމުގެ ވީޑިއޯތައް ސޯޝަލް މީޑިއާގެ އެކި މަންސަތަކާއި، ވައިބަރ އަދި ވަޓްސްއެޕް ގްރޫޕްތަކުގައި ޝެއަރ ނުކުރުމަށްވެސް އެދިވަޑައިގެންފައިވެއެވެ.

މިފަދަ އޮޅުވާލުމުގެ ވީޑިއޯތަކަކީ އާޓިފިޝަލް އިންޓެލިޖެންސް ބޭނުންކޮށްގެން ތައްޔާރުކޮށްފައިވާ އެއްޗެހި ކަމަށްވާތީ، ރައްޔިތުން މިކަމާމެދު ސަމާލުވުމަށް ޤާސިމް އިބްރާހިމް ގޮވާލައްވާފައިވެއެވެ.
                    

ސަމާލުކަމަށްޓައި ދަންނަވަމެވެ. !

ސޯޝަލް މީޑިއާގެ އެކިމަންސަތަކުގައި، ޚާއްޞަ ކޮށް ޓިކްޓޮކް، އިންސްޓަރގްރާމް
އަދި ފޭސްބުކްގައި އަޅުގަނޑުގެ ފޮޓޯއާއި، ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސް ގެ އެހީގައި ތައްޔާރުކޮށް އެކިކަހަލަ އޮފްޝޯ ޓްރޭޑް ކުރުމަށާއި، އިންވެސްޓްކޮށް…

— Qasim Ibrahim (@qasimibrahim) November 20, 2024