އދ. ދިއްދޫގައި މި ސަރުކާރުން ތަރައްޤީކުރަން ފެށި ފުޓްސަލް ދަނޑުގެ މަސައްކަތްތައް ނިންމާލައިފި

އދ. ދިއްދޫގައި މި ސަރުކާރުން ތަރައްޤީކުރަން ފެށި ފުޓްސަލް ދަނޑުގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ނިންމާލައިފިއެވެ.

އދ. ދިއްދޫ ފުޓްސަލް ދަނޑުގެ މަސައްކަތް ފަށާފައިވަނީ މިދިޔަ އޮކްޓޫބަރު މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އދ. އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިންނެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އިން ވަނީ، މި މަޝްރޫޢުގެ ދަށުން، ބިންގަނޑު އެއްވަރު ކުރުމުގެ މަސައްކަތްތަކާއި، ކޮންކްރީޓް މަސައްކަތްތަކާއި، ވަށާފާރު ރޭނުމާއި، ކަރަންޓު މަސައްކަތްކޮށްފައެވެ. އެމްޓީސީސީއަށް މި މަސްރޫޢުގެ މަސައްކަތް 1.74 މިލިއަން ރުފިޔާއަށް ހަވާލުކުރިއިރު، މި ފުޓްސަލް ދަނޑު ތަރައްޤީކޮށްފައި ވަނީ ރޭގަނޑު ވެސް ބޭނުންކުރެވޭގޮތަށް ލައިޓް ހަރުކޮށް އެންމެ ޒަމާނީ ފެންވަރަށެވެ.

Project Update: ADh Dhidhdhoo Futsal Ground Development

Physical works have been completed on 28th March 2026

Follow more updates at: https://t.co/SfVAzkW2pp#MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/eNtHC0CecE

— MTCC Plc (@MTCCPlc) March 30, 2026

ދިއްދޫގައި ތަރައްޤީކުރި ފުޓްސަލް ދަނޑުގެ ސަބަބުން އެ ރަށުގެ ރައްޔިތުންނަށް ހުސް ގަޑީގައި ދުޅަހެޔޮ ޞައްޙަތެއްގައި ތިބުމަށްޓަކައި ފުޓްސަލްގެ އިތުރުން އެހެން ކުޅިވަރުތައް ކުޅެވޭނެ މަގުފަހިވެގެންދާއިރު، ކުޅިވަރުގެ ދާއިރާއަކީ އަދުގެ ސަރުކާރުން ވަރަށް ބޮޑު އިސްކަމެއް ދެއްވާ ދާއިރާއެއްކަން ފާހަގަކޮށްލެވެއެވެ. ހަމަ އެހެންމެ، ރާއްޖޭގެ ހުރިހާ ހިސާބަކަށް ކުޅިވަރުގެ ތަރައްޤީ ގެނެސްދިނުމުގެ ގޮތުން ސަރުކާރުން ވަނީ ގިނަ މަޝްރޫޢުތަކެއް ރާވާފައެވެ.

ރާއްޖޭގެ އެކި ސަރަޙައްދުތަކުގައި ޒަމާނީ ފުޓްސަލް ދަނޑުތައް ތަރައްޤީކުރުމާއި، މިހާރު އަޅާފައިވާ ދަނޑުތައް މަރާމާތުކުރުމުގެ މަސައްކަތް  ސަރުކާރުން އަންނަނީ ކުރަމުންނެވެ.