އިޒްރާއިލް ޕާސްޕޯޓު އޮންނަ އެންމެން ރާއްޖެ އަންނަން މަނާކުރާކަށް ނުފެނޭ: ނާޒިމް

އިޒްރާއިލް ޕާސްޕޯޓު އޮންނަ އެންމެން ރާއްޖެ އައުން މަނާކުރަން ނުފެންނަ ކަމަށް ދިއްގަރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވެއްޖެއެވެ. 

މިއަދު ކުރިއަށް ދިޔަ ރައްޔިތުންގެ މަޖިލީހުގެ 241 ކޮމިޓީގައި ވާހަކަފުޅު ދައްކަވަމުން ނާޒިމް ވިދާޅުވީ އިޒްރާއިލް ޕާސްޕޯޓް އޮންނަ އެންމެން ރާއްޖެ އައުން މަނާކުރަން ނުފެންނަ ކަމަށާ، އެ ޕާސްޕޯޓް އޮންނަ ޢަރަބިންނާއި މުސްލިމުން އުޅޭ ކަމަށެވެ.

ދިއްގަރު ދާއިރާގެ މެމްބަރު ނާޒިމްގެ ވާހަކަފުޅުގައި ވިދާޅުވީ އިޒްރާއިލްގެ ޕާސްޕޯޓު އޮންނަ އެންމެން ރާއްޖެ އެތެރެވާން މަނާކުރަން ކެބިނެޓުން ނިންމާފައިވީ ނަމަވެސް ސައުތު އެމެރިކާ އާއި އެމެރިކާ އާއި އާޖެންޓީނާ ފަދަ ޤައުމުތަކުގައި އެ ޕާސްޕޯޓުގައި އުޅޭ ރައްޔިތުން ވަރަށް ގިނަކަމަށެވެ.

ޖޯޑަން އާއި ޢަރަބި ބައެއް ޤައުމުތަކާއި ފަލަސްޠީން މީހުން ވެސް ބޭނުން ކުރަނީ އިޒްރާއިލްގެ ޕާސްޕޯޓު ކަމަށް މެމްބަރު ނާޒިމް ވިދާޅުވި އެވެ.

"މިސާލަކަށް ދަންނަވާ ކަމަށް ވަންޏާ އާޖެންޓީނާ އަކީ ވަރަށް ގިނަ އިޒްރޭލް މީހުން ތިބޭ ޤައުމެއް، ވަރަށް ގިނަ ޔަހޫދީން ހިޖުރަ ކުރި ޤައުމެއް. އެ މީހުން އާޖެންޓީނާ ޕާސްޕޯޓަށް ވުރެ ގިނައިން އިޒްރޭލް ޕާސްޕޯޓު ބޭނުން ކުރަނީ. އެއީ އެމެރިކާ އަށް ވެސް ފަސޭހައިން ދެވޭތީ،" ނާޒިމް ވިދާޅުވި އެވެ.

އިޒްރޭލް ޕާސްޕޯޓު މަނާ ކުރުމުގެ ކުރިން ތަފާސްހިސާބު ހޯދުމަށް ފަހު، އެއީ ކިހާ ޢަދަދެއްގެ މީހުންތޯ ބަލަން ޖެހޭ ކަމަށް މަޖިލީހުގެ ނައިބު ރައީސް ނާޒިމް ވިދާޅުވި އެވެ. އެ ޕާސްޕޯޓުގައި މީހުން ރާއްޖެ އަންނަނީ ހަމައެކަނި ޓޫރިޒަމްގެ ބޭނުމަށްތޯ ނުވަތަ އެހެން މަސައްކަތެއްގައި ރާއްޖެ އައިސް އުޅޭތޯ ވެސް ބަލަން ޖެހޭ ކަމަށް ނާޒިމް ވިދާޅުވި އެވެ.

ނަޒިމް ވިދާޅުވީ އިޒްރާއިލްގެ ޕާސްޕޯޓަކަށް ވީތީ ބޭން ކުރާކަށް އެއްވެސް ބުރަކަމެއް ނޯންނާނެ ކަމަށެވެ.

ސަރުކާރުން އިޒްރާއިލް ޕާސްޕޯޓު އެއްކޮށް މަނާ ކުރަން ނިންމާފައިވީ ނަމަވެސް މަޖިލީހުން ދިރާސާ ކުރުމަށް ފަހު އެހެން ގޮތަކަށް ލަފާ ދޭން ބޭނުން ނަމަ އެކަން ވެސް ކުރެވިދާނެ ކަމަށް ނާޒިމް ވިދާޅުވި އެވެ.

އަދިޓާގެޓް ކުރާނީ ޤަތުލުޢާންމު ހިންގާ ފަރާތްތަކަށް ނަމަ އެކަން އެގޮތަށް ކުރެވިދާނެ ކަމަށްވެސް ނާޒިމް ވިދާޅުވިއެވެ.

ކޮމިޓީގައި ވާހަކަދައްކަވަމުން މާފަންނު އުތުރު ދާއިރާގެ މެންބަރު މުޙައްމަދު ނާޒިމް ވެސް ވިދާޅުވީ، ވަޒީރުންގެ މަޖިލީހުން އިޒްރާއިލް ޕާސްޕޯޓު އެއްކޮށް މަނާކުރަން ނިންމުމަކީ ކޮމިޓީން އެ ގޮތަށް ނިންމަންޖެހޭ ސަބަބެއް ނޫން ކަމަށެވެ.

ކާނަލް ނާޒިމް ވިދާޅުވީ ބްލޭންކެޓްކޮށް މިކަން ނުކުރެވޭނެ ކަމަށާއި، އިޤްތޞާދީ ގޮތުން ލިބޭ ގެއްލުންތައް ް ދެނެގަންނަން ޖެހޭނެ ކަމަށެވެ.

ކޮމިޓީ ވާހަކަދެއްކެވި މެންބަރުންގެ ވިސްނުންފުޅު ހުރީ މި ހިޔާޅު ތަކާއިއެއްގޮތަކަން ފާހަގަކޮށްލަން ޖެހެއެވެ. އެ ބޭފުޅުން ވިދާޅުވެފައިވަނީ ޕާސްޕޯޓު މަނާކުރަންވާނީ އެކަށިގެންވާ ތަފާސްހިސާބުތަކަށް ބެލުމަށް ފަހު، ފަތުރުވެރިކަމުގެ ސިނާޢަތުގެ ބޭފުޅުންނާ މަޝްވަރާކުރުމަށް ފަހުގައި ކަމަށެވެ.

ދިއްގަރު ދާއިރާގެ މެންބަރު ނާޒިމްގެ ހުށަހެޅުއްވުމަށް ތާއީދުކުރެއްވީ ކެލާ ދާއިރާގެ މެންބަރު ޢަބްދުﷲ ޝަރީފެވެ. އޭނާ ވިދާޅުވީ، އިޒްރާއިލުން ރާއްޖެ އަންނަ ގިނަ މީހުންނަކީ ރާޅާ އެޅުމަށް ވަކި ރަށްތަކަކަށް އަންނަ މަދު ބައެއް ކަމަށެވެ.