ނޭޝަނަލް ބޯޓިންގ އަދި ގެސްޓްހައުސް އެސޯސިއޭޝަނާ ވަޒީރު ޠާރިޤް ބައްދަލުކުރައްވައިފި

މެދުއިރުމަތީގައި އުފެދިފައިވާ ނުތަނަވަސްކަމުގެ ސަބަބުން ރާއްޖޭގެ ފަތުރުވެރިކަމަށް ކޮށްފާނެ އަސަރުތަކާ ގުޅޭގޮތުން މަޝްވަރާކުރުމަށްޓަކައި، ފަތުރުވެރިކަމާ ތިމާވެށްޓާ ބެހޭ ވަޒީރު ޠާރިޤް އިބްރާހީމް ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެންބީއޭއެމް) އަދި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އާ ބައްދަލުކުރައްވައިފިއެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ، މެދުއިރުމަތީގެ ހާލަތު ބަދަލުވަމުންދާ ގޮތުން، ރާއްޖޭގެ ސަފާރީ އުޅަނދުތަކާއި، ހޮޓާތަކާއި، އަދި ގެސްޓްހައުސް ސިނާއަތަށް ކުރިމަތިވެދާނެ ގޮންޖެހުންތަކާ ބެހޭގޮތުންނެވެ. ވަކިން ޚާއްޞަކޮށް، މިފަދަ ހާލަތްތަކުގައި ފަތުރުވެރިކަމުގެ ދާއިރާ ކުރިއަށްގެންދިއުމަށް އެޅިދާނެ ފިޔަވަޅުތަކާއި، ޚިދުމަތްތައް މެދުނުކެނޑި ކުރިއަށް ގެންދާނެ ގޮތްތަކާ ގުޅޭގޮތުން ދެ ފަރާތުގެ މެދުގައި ފުޅާ ދާއިރާއެއްގައި މަޝްވަރާކުރައްވާފައިވާކަމަށް ފަތުރުވެރިކަމާ ތިމާވެށްޓާ ބެހޭ ވުޒާރާއިން މަޢުލޫމާތުދެއެވެ.

ވަޒީރު ޠާރިޤް ވަނީ، މި ހާލަތުގައި ފަތުރުވެރިކަމުގެ ސިނާއަތުގެ ހުރިހާ ފަރާތްތަކުން ގުޅިގެން މަސައްކަތްކުރުމުގެ މުހިންމުކަން ފާހަގަކުރައްވާފައެވެ. ހަމަ އެހެންމެ، ބޭރުގެ މަސްރަހަށް އަންނަ ބަދަލުތަކާއެކު އުފެދޭ ގޮންޖެހުންތަކުން އަރައިގަތުމަށްޓަކައި ސަރުކާރާއި އަމިއްލަ ޖަމިއްޔާތަކާ ދެމެދު އޮންނަ ގުޅުން އިތުރަށް ބަދަހިކޮށް، ގާތުން މަސައްކަތްކުރުމަށް މި ބައްދަލުވުމުގައި ދެ ފަރާތުން ވެސް އެއްބަސްވެފައިވެއެވެ.

މި ބައްދަލުވުމަކީ ދުނިޔޭގެ ސިޔާސީ މަސްރަހަށް އަންނަ ބަދަލުތަކުގެ ސަބަބުން ރާއްޖޭގެ އިޤްތިޞާދުގެ މައިނާރު ކަމަށްވާ ފަތުރުވެރިކަމަށް ލިބިދާނެ ގެއްލުންތައް ކުޑަކުރުމަށްޓަކައި ކުރިއަށްގެންދެވުނު މުހިންމު ބައްދަލުވުމެކެވެ.