ޚަބަރު
ފެނިގެން އެ ދަނީ މަޖިލީހުގެ ރައީސް، ރައީސްގެ މުށުތެރެއަށްލައްވާ މުޅިން ކޮންޓްރޯލް ކުރެއްވިތަން: ޝާހިދު

އެމްޑީޕީގެ ރައީސް ޢަބްދުﷲ ޝާހިދު. ފޮޓޯ: އެމްޑީޕީ
ހުލާސާ
ފެނިގެން އެދަނީ މަޖިލީހުގެ ރައީސް, ރައީސްގެ މުށުތެރެއަށް ލައްވާ މުޅިން ކޮންޓްރޯލް ކުރެއްވިތަން ކަމަށް އެމްޑީޕީގެ ރައީސް އަދި ކުރީގެ ޚާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ މިއަދު އެމްޑީޕީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
ޝާހިދު މިފަދައިން ވާހަކަފުޅު ދައްކަވައިފައި މިވަނީ އިއްޔެ ރައްޔިތުންގެ މަޖިލީހުން ފާސްކުރި ޕާޓީ ބަދަލުކުރުމުން ގޮނޑިގެއްލޭ ޤާނޫނަށް އިޝާރަތްކުރައްވައެވެ.
އިދިކޮޅު އެމްޑީޕީ އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝާހިދު ވިދާޅުވީ އިއްޔެ ރައްޔިތުންގެ މަޖިލީހުން ފާސްކުރި ޤާނޫނުއަސާސީގެ އިސްލާޙްތަކަކީ އެއްވެސް ޑިމޮކްރެޓިކް ހަމައަކުން ކަންކުރެވިގެންވާނެ ގޮތެއް ނޫންކަމަށެވެ.
ޝާހިދު ވިދާޅުވީ، މިހާރު މި ގެނެވުނު ބަދަލާއެކު ރައްޔިިތުންގެ މަޖިލިސް މެދުވެރިކޮށް ރައީސުލްޖުމްހޫރިއްޔާ ބޭނުންފުޅުވެއްޖެނަމަ ރާއްޖޭގެ އަނެއް ދެ ބާރުގެ ވެރިން ބަދަލުކުރެވޭނެކަމަށާއި، ފެނިގެން ދަނީ މަޖިލީހުގެ ރައީސް އަދި އުއްތަމަފަނޑިޔާރުވެސް ރައީސްގެ "މުށުތެރެއަށްލާ" ތަން ކަމަށެވެ.
އެގޮތުން މަޖިލީހުގެ ގޮނޑި ގެއްލޭގޮތަށް ޤާނޫނު ފާސްކުރުމުން އަލުން އާ މަޖިލީހެއް އިންތިޚާބު ކުރަންޖެހޭ ކަމަށާއި، އަވަސްއަރުވާލައިގެން މިކަންކުރުމުގެ ފަހަތުގައި އެހެން ކަމެއް ފޮރުވިފައިވާނެ ކަމަށް ޝާހިދު ވަނީ ތުހުމަތުކުރައްވައިފައެވެ.
ޝާހިދު ވިދާޅުވީ އެބޭފުޅުންގެ ކަންބޮޑުވުން އިންތިހާއަށް އެބަހުރި ކަމަށެވެ. އެމްޑީޕީ އުފެދިގެން އައިސްފައި އޮތީ، ޑިމޮކްރަސީ ރާއްޖޭގައި ގާއިމްކުރުމަށް ކަމަށެވެ. އަދި އިއްޔެ ފާސްވެގެން ދިޔަ އިސްލާޙަށް އިޝާރާތް ކޮށް ޝާހިދު ވިދާޅުވީ އެ އިސްލާޙަކީ ޑިމޮކްރަސީއަށް ޗެލެންޖުކުރެވޭ ކަމެއް ކަމަށާއި މިއަދުގެ ސަރުކާރުން ބޭނުންފުޅުވަނީ ރައްޔިތުން މާޔޫސްކޮށްލައްވާފަ ސަރުކާރުން ބޭނުން ކޮންމެ ގޮތަކަށް ކޮންމެ ކަމެއް ކޮށްލުމަށް ކަމަށް ވިދާޅުވެ ޝާހިދު ވަނީ ސަރުކާރުގެ ނިންމުމަށް ވަރަށް ބޮޑަށް ފާޑުވިދާޅުވެފައެވެ.
ދިހަ ގަޑިއިރު ތެރޭގައި ޤާނޫނުއަސާސީ މި ބަދަލުކޮށްލީ. ރައްޔިތުންނަށް ގޮންޖައްސަވާފަ އެކަންކުރީމަ ރައްޔިތުން ދެން މަޑުންތިބޭނެޔޭ ހީފުޅުކުރައްވައިގެން ކުރެއްވި ކަމެއް އެއީ
ޝާހިދު ވިދާޅުވިއެވެ.
ޝާހިދު ވިދާޅުވީ ފެނިގެން މިދަނީ މިސަރުކާރު ބަލިވެގެންދާ ތަން ކަމަށެވެ. އަދި ރާއްޖޭގައި ހިނގަމުންދާ ޑިމޮކްރަސީގެ ލޮޅުންތަކުން އަރައިގަނެވޭނެ ފުރިހަމަ ޔަޤީންކަން އެބައޮތް ކަމަށް ވެސް ޝާހިދު ވިދާޅުވިއެވެ. މީގެއިތުރުން ޝާހިދު ވިދާޅުވީ، މިއީ ޑިމޮކްރަސީ ނޫންކަމަށާއި، އެކަންކަން ދިވެހި ރައްޔިތުން ބަލައި ނުގަންނާނެކަމަށެވެ.
ޕާޓީ ބަދަލު ކުރުމުން ގޮނޑި ގެއްލޭ ގޮތަށް ޤާނޫނެއް އެކުލަވާ ލެވުނީ، އެމްޑީޕީ މެޖޯރިޓީ އޮތް 19 ވަނަ މަޖިލީހުންނެވެ. ނަމަވެސް އޭގައި، މެންބަރު ޕާޓީން ވަކިކުރުމުން ނުވަތަ އަމިއްލަ މެންބަރަކު ޕާޓީއަކާ ގުޅުމުން މެންބަރުކަން ގެއްލޭނެކަން ނުވަތަ ނޫންކަން ކަނޑައަޅާފައި ނުވެއެވެ.