ނުކުޅެދުންތެރިކަން ހުންނަ މީހުންނަށް ޚާއްސަ ހަބް ޖުލައިގައި ހުޅުވަނީ

ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ކުރިއެރުވުމަށް ޚާއްސަކޮށްގެން ތަރައްޤީކުރާ "އެމްޕަވަމަންޓް ހަބް" ގެ މަސައްކަތްތައް ނިންމައި، އަންނަ ޖުލައި މަހުގެ ތެރޭގައި އެތަނުގެ ޚިދުމަތް ފެށުމަށް މަސައްކަތް ކުރަމުންދާ ކަމަށް މިނިސްޓްރީ އޮފް ހެލްތު، ފެމިލީ އެންޑް ވެލްފެއަރއިން ވިދާޅުވެއްޖެއެވެ.

މި މަރުކަޒަކީ ހުޅުމާލެ ފޭސް 2 ގެ އަމާން އުދަރެސް 7 ވަނަ ޓަވަރުގެ ފުރަތަމަ ފަންގިފިލާގައި ޤާއިމުކުރާ ތަނެކެވެ.

ހުނަރު ތަރައްޤީކޮށް ވަޒީފާގެ ފުރުޞަތުތައް ފަހިކޮށްދިނުން
މި މަރުކަޒުގެ މައިގަނޑު މަޤްޞަދަކީ ރަސްމީ ތަޢުލީމު ނިންމުމަށްފަހު މުޖުތަމަޢުއަށް ނިކުންނަ ނުކުޅެދުންތެރިކަން ހުންނަ ފަރާތްތަކަށް ބޭނުންވާ މަސައްކަތުގެ ތަޖުރިބާއާއި ހުނަރުތައް އުނގަންނައިދިނުމެވެ. އެގޮތުން އިޤްތިޞާދީ ގޮތުން ފުދުންތެރި ބަޔަކަށް އެފަރާތްތައް ހެދުމަށްޓަކައި ކަލިނަރީ، ހޮސްޕިޓަލިޓީ، ރީޓެއިލް، އައިޓީ އަދި އަތްތެރި މަސައްކަތުގެ ދާއިރާތަކުން ތަފާތު ތަމްރީނު ޕްރޮގްރާމްތައް މި ހަބުގައި ކުރިއަށް ގެންދާނެއެވެ.

މީގެއިތުރުން، ބައިވެރިން ތައްޔާރުކުރާ އުފެއްދުންތައް ދައްކާލުމަށް ޚާއްޞަ ޖާގައަކާއި، އެ ތަކެތި ވިއްކުމަށް ފިހާރައެއްވެސް މި މަރުކަޒުގައި ހުންނާނެއެވެ. އަދި ނުކުޅެދުންތެރިކަން ހުންނަ މީހުން ތަމްސީލުކުރާ މަދަނީ ޖަމިއްޔާތަކަށް ބައްދަލުވުންތަކާއި ހަރަކާތްތައް ބޭއްވުމަށް ޚާއްޞަ ޖާގައެއް ކަނޑައެޅިފައިވެއެވެ.

ފަސޭހަކަމާއެކު ބޭނުންކުރެވޭނެ ފަރުމާއެއް
މި މަރުކަޒު ފަރުމާކޮށްފައިވަނީ ނުކުޅެދުންތެރިކަން ހުންނަ މީހުންނަށް އެންމެ ފަސޭހައިން ބޭނުންކުރެވޭނެ ގޮތަށެވެ. އެގޮތުން ފުރޮޅުލީ ގޮޑި ބޭނުންކުރާ މީހުންނާއި ފެނުމުން މަޚުރޫމުވެފައިވާ މީހުންނަށް ޚާއްޞަ "ޓެކްޓައިލް ޕާތުވޭ" ތަކާއި، އޯޓިޒަމް ހުންނަ ފަރާތްތަކަށް ޚާއްޞަ "ސެންސަރޫ ރޫމް" އެއްވެސް މިތަނުގައި ހިމެނެއެވެ.

އެއް ފުރާޅެއްގެ ދަށުން ގިނަ ޚިދުމަތްތަކެއް
މި މަޝްރޫޢަކީ އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުން ޚަރަދުކޮށްގެން، އިޖުތިމާޢީ ތަރައްޤީއާއި ބެހޭ ވުޒާރާއާއި އެފްޑީސީ ގުޅިގެން ކުރިއަށްގެންދާ މަސައްކަތެކެވެ. މިއީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތަފާތު ޚިދުމަތްތައް އެއް ފުރާޅެއްގެ ދަށުން ފޯރުކޮށްދެވޭނެ ރާއްޖޭގެ ފުރަތަމަ މަރުކަޒެވެ. މިހާރު ކުރިއަށްދަނީ އިމާރާތް ރޭނުމުގެ އެންމެ ފަހުގެ މަސައްކަތްތަކެވެ.