ސަރުކާރުގެ އިދާރީ އޮނިގަނޑަށް ގެނެވުނު ބަދަލާއެކު ދާޚިލީ ވުޒާރާގެ ދަށަށް 9 އިދާރާއެއް ގެންގޮސްފި

ސަރުކާރުގެ އިދާރީ އޮނިގަނޑަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންނެވި ބަދަލުތަކާއެކު،  ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާގެ ދަށަށް 9 އިދާރާއެއް ބަދަލުކުރައްވައިފިއެވެ. 

މި ބަދަލާއެކު އެ ވުޒާރާގެ މެންޑޭޓަށް ބޮޑެތި ބަދަލުތަކެއް އައިސް، ވުޒާރާގެ ނަން ވަނީ "މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ" (ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވުޒާރާ) ގެ ނަމަށް ބަދަލުކުރައްވާފައެވެ.

މި ވުޒާރާގެ ވަޒީރުގެ މަގާމަށް ރައީސުލްޖުމްހޫރިއްޔާ އައްޔަން ކުރައްވާފައިވަނީ ކުރިންވެސް އެ މަގާމުގައި ހުންނެވި އިޙްސާން އަލީއެވެ. ގެނެވުނު އިދާރީ ބަދަލުތަކުގެ ތެރޭގައި ކުރިން މަތީ ތަޢުލީމާ ބެހޭ ވުޒާރާގެ ދަށުން ހިންގަމުން އައި ބައެއް މަސައްކަތްތަކާއި އިދާރާތައް މިހާރު ވަނީ ދާޚިލީ ވުޒާރާގެ ދަށަށް ބަދަލުކުރެވިފައެވެ.

ދާޚިލީ ވުޒާރާގެ ދަށަށް ބަދަލުކުރެވުނު އިދާރާތައް

• މޯލްޑިވްސް އިމިގްރޭޝަން
• ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު)
• ނޭޝަނަލް ޑްރަގް އެޖެންސީ (އެންޑީއޭ)
• ޑިޕާޓްމަންޓް އޮފް ޖުވެނައިލް ޖަސްޓިސް
• ނޭޝަނަލް ސައިބަރ ސެކިއުރިޓީ އެޖެންސީ
• ލޭބަރ ރިލޭޝަންސް އޮތޯރިޓީ
• ކޮމިއުނިކޭޝަންސް އޮތޯރިޓީ އޮފް މޯލްޑިވްސް
• މޯލްޑިވްސް ޑިޖިޓަލް ސަރވިސް
• ނޭޝަނަލް ކެރިއަރސް ސަރވިސް

މި އިދާރާތަކުގެ ތެރެއިން ނޭޝަނަލް ކެރިއަރސް ސަރވިސް އަކީ މީގެ ކުރިން މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން ހިންގަމުން އައި އިދާރާއެކެވެ. ނަމަވެސް ސަރުކާރުގެ އޮނިގަނޑަށް ގެނައި އިޞްލާޙުތަކާއެކު، މަސައްކަތްތެރިންނާއި ވަޒީފާއާ ގުޅުންހުރި މުހިންމު މަސައްކަތްތައް މިހާރު ވަނީ ދާޚިލީ ވުޒާރާގެ މެންޑޭޓުގެ ތެރޭގައި ހިމަނާފައެވެ.

މި ބަދަލަކީ ސަރުކާރުގެ ހިންގުން ހަރުދަނާކޮށް، ދާޚިލީ ސަލާމަތާއި މަސައްކަތްތެރިންގެ ޙައްޤުތަކާއި ފަންނިއްޔާތާ ގުޅުންހުރި ކަންކަން އެއް ފުރާޅެއްގެ ދަށުން ވިލަރެސްކުރުމަށް ރައީސުލްޖުމްހޫރިއްޔާ ނިންމެވި ނިންމެވުމެކެވެ.