ރައީސް ނަޝީދު އެމްޑީޕީގެ ޗެއަރޕާސަން ކަމަށް ވާދަކުރައްވަނީ

އެމްޑީޕީގެ ޗެއާޕާސަންގެ މަގާމަށް ކުރިމަތިލައްވަން ކުރީގެ ރައީސް މުހައްމަދު ނަޝީދު ނިންމަވައިފިއެވެ. އެ މަނިކުފާނު މިކަން ހާމަކުރެއްވީ "ބޮޑު ބަދަލު"ގެ ނަމުގައި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލާއެކު މިއަދު ބޭއްވެވި ނޫސްވެރިންގެ ބައްދަލުވުމެއްގައެވެ.

ނޫސްވެރިންނާ ވާހަކަދައްކަވަމުން ރައީސް ނަޝީދު ވިދާޅުވީ، އެމްޑީޕީގެ ޗެއާޕާސަންގެ މަގާމަށް ކުރިމަތިލައްވަން ނިންމެވީ ޕާޓީގެ ކަންކަން ރަނގަޅު ކުރެއްވޭނީ އެ މަގާމުގައި ހުންނަވައިގެން ކަމަށް ގަބޫލުކުރެއްވޭތީ ކަމަށެވެ. އަދި އެފްރިކާގައި މިހާރު އަދާކުރައްވަމުން ގެންދަވާ މަގާމު ދޫކޮށްލައްވައި ރާއްޖެ ވަޑައިގެންނެވީ ވެސް އެ ބޭނުންފުޅުގައި ކަމަށް އެމަނިކުފާނު ވިދާޅުވިއެވެ.

ރައީސް ނަޝީދުގެ މި ނިންމެވުމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވަނީ ތާއީދު ކުރައްވާފައެވެ. ފައްޔާޒް ވިދާޅުވީ އެމްޑީޕީގެ ޗެއާޕާސަންގެ މަގާމަށް ރައީސް ނަޝީދު ގެންނެވުމަށް އޭނާ ފުރިހަމައަށް ތާއީދު ކުރައްވާ ކަމަށެވެ. ރައީސް ނަޝީދަކީ އެމްޑީޕީގެ އެންމެ ފުރަތަމަ އިންތިހާބީ ޗެއާޕާސަން ވެސް މެއެވެ.

އެމްޑީޕީގެ ޗެއާޕާސަންގެ މަގާމު ހުސްވީ އެ މަގާމުގައި ހުންނެވި ފައްޔާޒް އިސްމާއީލް އިސްތިއުފާ ދެއްވުމާ ގުޅިގެންނެވެ. އޭގެ ފަހުން ވަގުތީ ގޮތުން އެ މަގާމާ ހަވާލުވެވަޑައިގަތީ އަބްދުލްޣަފޫރު މޫސާއެވެ. ނަމަވެސް ޕާޓީގެ ތެރޭގައި އުފެދުނު ހިޔާލުތަފާތުވުންތަކާ ގުޅިގެން، މިހާރު ޕާޓީ ހިންގުން ވަނީ ހަ މެންބަރުންގެ މައްޗަށް އެކުލެވޭ ހާއްސަ ކޮމިޓީއަކާ ހަވާލުކޮށްފައެވެ.

މި ވަގުތީ ކޮމިޓީގައި ހިމެނިވަޑައިގަންނަވަނީ ރައީސް އިބްރާހިމް މުހައްމަދު ސޯލިހް، ފައްޔާޒް އިސްމާއީލް، ރައީސް މުހައްމަދު ނަޝީދު، ވަގުތީ ޗެއާޕާސަން އަބްދުލްޣަފޫރު މޫސާ، ޕާޓީގެ ރައީސް އަބްދުﷲ ޝާހިދު އަދި ޕީޖީ ލީޑަރު ނާޒިލްއެވެ. އައު ޗެއާޕާސަނަކު އިންތިހާބު ކުރެވެންދެން ޕާޓީގެ ހިންގުމުގެ ކަންކަން ބަލަހައްޓާނީ މި ކޮމިޓީންނެވެ.