ހޮރްމޫޒް ކަނޑުއޮޅި އަލުން ބަންދުކޮށް، އީރާނުގެ އަސްކަރީ ބޯޓުތަކުން ޓޭންކަރަކަށް ހަމަލާދީފި

ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޮރްމޫޒް ކަނޑުއޮޅި އަލުން ބަންދުކޮށް، އެ ސަރަހައްދުން ދަތުރުކުރި ޓޭންކަރަކަށް އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) ގެ ބޯޓުތަކުން ހަމަލާދީފިއެވެ.

ޔޫކޭ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ބުނި ގޮތުގައި މި ހާދިސާ ހިނގާފައިވަނީ އޮމާންގެ އިރުއުތުރުން ގާތްގަނޑަކަށް 37 ކިލޯމީޓަރު ބޭރުގައެވެ.

ޓޭންކަރުގެ ކެޕްޓަނާ ހަވާލާދީ ޔޫކޭއެމްޓީއޯ އިން ބުނީ، އީރާނުގެ ދެ ބޯޓަކުން އެއްވެސް އިންޒާރަކާ ނުލައި ޓޭންކަރަށް ބަޑީގެ ހަމަލާތަކެއް ދީފައިވާ ކަމަށެވެ. ނަމަވެސް، މި ހަމަލާގައި ޓޭންކަރަށާއި އޭގެ ފަޅުވެރިންނަށް އެއްވެސް ގެއްލުމެއް ލިބިފައި ނުވާ ކަމަށް ރިޕޯޓްތައް ބުނެއެވެ. ޓޭންކަރްޓްރެކާސް ޑޮޓްކޮމް އިން ބުނި ގޮތުގައި އީރާނުގެ މި އަމަލާ ގުޅިގެން އިންޑިއާގެ ސުޕަ ޓޭންކަރެއް ހިމެނޭހެން ބައެއް އުޅަނދުތަކަށް ވަނީ ދަތުރު މެދުކަނޑާލައި އަނބުރާ ދާން މަޖުބޫރުވެފައެވެ.

ކަނޑުއޮޅީގެ ކޮންޓްރޯލް އަލުން އީރާނުގެ އަސްކަރިއްޔާއަށް
އީރާނުގެ ޖޮއިންޓް މިލިޓަރީ ކޮމާންޑުން ނެރުނު ބަޔާނެއްގައި ބުނެފައިވަނީ، ހޮރްމޫޒް ކަނޑުއޮޅީގެ ފުރިހަމަ ކޮންޓްރޯލް މިހާރު ވަނީ އަލުން އެ ގައުމުގެ އަސްކަރިއްޔާގެ ދަށަށް ގެނެވިފައި ކަމަށެވެ. އަދި އެމެރިކާއިން އީރާނުގެ ބަނދަރުތައް ބަންދުކޮށްގެން ތިބި ތިބުން ނިމުމަކަށް ނުގެންނަނީސް، ކަނޑުއޮޅިން ދަތުރުކުރުން ހުއްދަ ނުކުރާނެ ކަމުގެ އިންޒާރު ވެސް ވަނީ ދީފައެވެ.

އީރާނުގެ މަޖިލީހުގެ ނޭޝަނަލް ސެކިއުރިޓީ ކޮމިޝަނުގެ މުގައްރިރު އިބްރާހީމް އަޒީޒީ ވިދާޅުވީ، ކަނޑުއޮޅިން ދަތުރުކުރާ އުޅަނދުތަކުން އީރާނުގެ ކަނޑުގެ ސިފައިންގެ ހުއްދަ ހޯދައި، ފީ ދައްކަން ޖެހޭނެ ކަމަށެވެ. މިއީ އިސްރާއީލާއި ހިޒްބުالله އާ ދެމެދު އިއުލާންކުރި 10 ދުވަހުގެ ސުލްހައިގެ އެއްބަސްވުމާ ގުޅިގެން، ކަނޑުއޮޅި ހުޅުވާލާފައިވާ ކަމަށް އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވިތާ އެންމެ ދުވަހެއް ފަހުން އައި ބަދަލެކެވެ.

އެމެރިކާގެ ބްލޮކޭޑް ދެމިއޮންނާނެ ކަމުގެ އިންޒާރު
އެމެރިކާގެ ރައީސް ޑޮނަލްޑް ޓްރަމްޕް ފުރަތަމަ ކަނޑުއޮޅި ހުޅުވާލުމަށް ތާއީދުކުރެއްވި ނަމަވެސް، ފަހުން ވަނީ އީރާނުގެ ނިއުކްލިއާ ޕްރޮގްރާމާ ގުޅޭ އެއްބަސްވުމަކަށް ނާދެވެނީސް އެމެރިކާގެ ބްލޮކޭޑް ދެމިއޮންނާނެ ކަމަށް ވިދާޅުވެފައެވެ. ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރާ މި މުހިންމު މަގު ބަންދުކުރުމަކީ އީރާނުން ބޭނުންކުރާ އެންމެ ބޮޑު އެއް ބާރެވެ.

މި ހަމަލާތަކާއި ކަނޑުއޮޅި ބަންދުކުރުމުގެ ސަބަބުން، އިސްރާއީލާއި އެމެރިކާ އަދި އީރާނާ ދެމެދު ހިނގަމުންދާ ހަތް ހަފުތާގެ ހަނގުރާމަ ހުއްޓުވުމަށް ޕާކިސްތާނުން މެދުވެރިއެއްގެ ދައުރު އަދާކޮށްގެން ކުރިއަށްގެންދާ މަސައްކަތްތަކަށް ވަނީ އިތުރު ގޮންޖެހުންތަކެއް ކުރިމަތިވެފައެވެ.