ރަޝިޔާގެ ހަނގުރާމައިގައި މަރުވި އުތުރު ކޮރެޔާގެ ސިފައިންގެ ހަނދާނުގައި މިއުޒިއަމެއް ހުޅުވައިފި

އޫކްރޭން ހަނގުރާމައިގައި ރަޝިޔާގެ ފަރާތުން ހަނގުރާމަކުރަނިކޮށް މަރުވި އުތުރު ކޮރެޔާގެ ސިފައިންގެ ހަނދާނުގައި، އެ ގައުމުގެ ވެރިރަށް ޕިއޮންގޔަންގްގައި ޚާއްޞަ މިއުޒިއަމެއް ހުޅުވައިފިއެވެ.

 "މެމޯރިއަލް މިއުޒިއަމް އޮފް ކޮމްބެޓް ފީޓްސް އެޓް ދަ އޯވަސީސް މިލިޓަރީ އޮޕަރޭޝަންސް" ގެ ނަމުގައި ހުޅުވި މި މިއުޒިއަމް އިފްތިތާހުކޮށްދެއްވީ އުތުރު ކޮރެޔާގެ ލީޑަރު ކިމް ޖޮންގ އުންއެވެ.

އިއްޔެގައި ބޭއްވި މި ރަސްމިއްޔާތަކީ ރަޝިޔާގެ ކާސްކް ސަރަހައްދަށް އޫކްރޭނުން ދިން ހަމަލާތަކުން އެ ސަރަހައްދު މިނިވަންކުރުމަށް ކުރިއަށް ގެންދިޔަ އޮޕަރޭޝަން ނިމުނުތާ އެއް އަހަރު ފުރުން ފާހަގަކުރުމުގެ ގޮތުން ބޭއްވި ރަސްމިއްޔާތެއް ކަމަށް އުތުރު ކޮރެޔާގެ ދައުލަތުގެ މީޑިއާ (ކޭ.ސީ.އެން.އޭ) އިން ރިޕޯޓްކޮށްފައިވެއެވެ.

މި ރަސްމިއްޔާތުގައި ކިމް ޖޮންގ އުންގެ އަރިހުގައި ރަޝިޔާގެ އިސްވެރިން ބައިވެރިވެވަޑައިގެންނެވިއެވެ. އޭގެ ތެރޭގައި ރަޝިޔާގެ ސްޓޭޓް ދޫމާގެ ޗެއާމަން ވިއަޗެސްލާވް ވޮލޮޑިން އާއި ޑިފެންސް މިނިސްޓަރު އެންޑްރޭ ބެލޫސޯވް ހިމެނިވަޑައިގަންނަވައެވެ. ރަސްމިއްޔާތުގެ ތެރެއިން ކިމް ވަނީ ހަނގުރާމައިގައި މަރުވި ސިފައިންގެ މަހާނައިގައި މާބޮނޑި ބަހައްޓާދީފައެވެ.

ކިމް ޖޮންގ އުން ދެއްވި ތަގުރީރުގައި ވިދާޅުވީ، މަރުވި ސިފައިންނަކީ އުތުރު ކޮރެޔާގެ ރައްޔިތުންގެ ހިތްވަރުގަދަކަމުގެ ނަމޫނާއެއް ކަމަށާއި، އެއީ ރަޝިޔާ އާއި އުތުރު ކޮރެޔާގެ ގުޅުން އިތުރަށް ވަރުގަދަވެގެންދާނެ ކަމެއް ކަމަށެވެ. އަދި އެމެރިކާ އާއި ބައެއް ހުޅަނގުގެ ގައުމުތަކުން ރަޝިޔާއާ ދެކޮޅަށް ހިންގާ އިސްތިއުމާރީ ރޭވުންތަކާ ދެކޮޅަށް ދެ ގައުމުން ގުޅިގެން މަސައްކަތްކުރާނެ ކަމަށްވެސް އޭނާ ވިދާޅުވިއެވެ.

ދެކުނު ކޮރެޔާގެ އިންޓެލިޖެންސް އިދާރާތަކުން އަންދާޒާކުރާ ގޮތުގައި، ރަޝިޔާގެ ފަރާތުން ހަނގުރާމަކުރުމަށް އުތުރު ކޮރެޔާއިން ގާތްގަނޑަކަށް 15،000 ސިފައިން ފޮނުވާފައިވެއެވެ. އަދި އޭގެ ތެރެއިން 2،000 އެއްހާ ސިފައިން މަރުވެފައިވާ ކަމަށް ބެލެވެއެވެ. ނަމަވެސް، ރަޝިޔާ އާއި އުތުރު ކޮރެޔާއިން މިހާތަނަށް މަރުވި ސިފައިންގެ ރަސްމީ އަދަދެއް ހާމަކޮށްފައެއް ނުވެއެވެ.

މި ބައްދަލުވުމުގެ ތެރެއިން ރަޝިޔާގެ ޑިފެންސް މިނިސްޓަރު ބެލޫސޯވް ވިދާޅުވީ، 2027 އިން 2031 އަށް ދެ ގައުމުގެ ދެމެދުގައި އަސްކަރީ ގުޅުން ބަދަހިކުރުމުގެ އާ އެއްބަސްވުމެއްގައި ސޮއިކުރުމަށް ތައްޔާރުވަމުންދާ ކަމަށެވެ. އަދި ރަޝިޔާގެ ރައީސް ވުލަޑީމިއަރ ޕޫޓިން ފޮނުއްވި ސިޓީއެއްގައި ވިދާޅުވެފައިވަނީ، މި މިއުޒިއަމަކީ ދެ ގައުމުގެ ދެމެދުގައި އޮތް އެކުވެރިކަމާއި އެއްބައިވަންތަކަމުގެ ރަމްޒެއް ކަމަށެވެ.

ދުނިޔޭގެ ސިޔާސީ މަސްރަހު ދިރާސާކުރާ ފަރާތްތަކުން ބުނާ ގޮތުގައި، އުތުރު ކޮރެޔާއިން ރަޝިޔާއަށް ސިފައިންނާއި ހަތިޔާރު ފޯރުކޮށްދެނީ އޭގެ ބަދަލުގައި ރަޝިޔާގެ އިގްތިސާދީ އެހީތެރިކަމާއި ނިއުކްލިއާ އަދި މިސައިލް ޓެކްނޮލޮޖީ ހޯދުމުގެ ބޭނުމުގައެވެ. މިއީ ދެކުނު ކޮރެޔާ އާއި އެމެރިކާއިން ނުހަނު ކަންބޮޑުވުން ފާޅުކުރަމުންދާ ކަމެކެވެ.