އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު ލަމްއާން މަގާމުން އިސްތިއުފާ ދެއްވައިފި

ވެލާނާ އިންޓަނޭޝަނަލް އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ލަމްއާން މިއަދު އެ މަގާމުން އިސްތިއުފާ ދެއްވައިފިއެވެ.

މިއަދު، 30 އޭޕްރިލް 2026 ގައި ލަމްއާން މަގާމުން އިސްތިއުފާ ދެއްވިކަން ކަށަވަރުވެފައިވާއިރު، އޭނާ މި މަގާމުން ވަކިވެވަޑައިގަތީ ސަރުކާރުގެ އެހެން ކުންފުންޏެއްގެ އިސް މަގާމަކާ ހަވާލުވެވަޑައިގަތުމަށްޓަކައި ކަމަށް މައުލޫމާތު ލިބެއެވެ. ނިއުރޭޑިއަންޓް ސްޕޯޓްސް ކްލަބްގެ ވައިސް ޗެއާމަންގެ މަގާމުވެސް ފުރުއްވަމުން ގެންދަވާ ލަމްއާން، އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރުގެ މަގާމަށް އައްޔަން ކުރެއްވީ 1 ފެބްރުއަރީ 2024 ގައެވެ.

ލަމްއާން އަކީ މީގެ ކުރިން ކުރީގެ ރައީސް އަބްދުﷲ ޔާމީންގެ ޒައާމަތުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުވެސް ކުރު މުއްދަތަކަށް ފުރުއްވާފައިވާ ބޭފުޅެކެވެ.

ލަމްއާން އިސްތިއުފާ ދެއްވުމާ ގުޅިގެން، ދެން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރެއްގެ މަގާމުގައި ހުންނަވާނީ މުޖުތަބާ ލަތީފް އެކަންޏެވެ. އެ ކުންފުނީގެ މެނޭޖިން ޑިރެކްޓަރުގެ މަގާމު ފުރުއްވަމުން ގެންދަވަނީ އިބްރާހިމް ޝަރީފް މުހައްމަދެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ކުންފުނިތަކުގެ ހިންގުމަށް ގެންނަވަމުންދާ ބަދަލުތަކުގެ ތެރެއިން، ލަމްއާން ދެން ވަޑައިގަންނަވާނީ ކޮން ކުންފުންޏެއްގެ އިސް މަގާމަކަށް ކަން އަދި ރަސްމީކޮށް ހާމަކޮށްފައެއް ނުވެއެވެ. ނަމަވެސް އޭނާ މަގާމުން ވަކިވެވަޑައިގަތުމަކީ އެމްއޭސީއެލްގެ އިސް ހިންގުމަށް އައި ބޮޑު ބަދަލެކެވެ.