ސިފައިންގެ "ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް" ރައީސުލްޖުމްހޫރިއްޔާ އިފްތިތާޙުކޮށްދެއްވައިފި

ދިވެހި އަސްކަރިއްޔާގެ ފަންނީ ޤާބިލުކަން އިތުރުކުރުމަށާއި، ޒުވާނުންނަށް ބޭނުންވާ ފަންނީ ހުނަރުތައް އުނގަންނައިދިނުމަށްޓަކައި އެމްއެންޑީއެފް ސަރވިސް ކޯރގެ ދަށުން އަލަށް އުފެއްދި "ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް" ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ރަސްމީކޮށް އިފްތިތާޙުކޮށްދެއްވައިފިއެވެ.

މި މަރުކަޒު ހުޅުއްވައިދެއްވީ ދިވެހި ސިފައިންގެ ޚިދުމަތަށް 134 އަހަރު ފުރުމުގެ މުނާސަބަތުގައި ރޭ ބޭއްވި ކުލަގަދަ ރަސްމީ ޖަލްސާގައެވެ.

ބ. ކިހާދޫގައި ޤާއިމުކޮށްފައިވާ މި ސްކޫލަކީ ދިވެހި އަސްކަރިއްޔާގެ ތާރީޚުގައިވެސް ފަންނީ އަދި ޢިލްމީ ދާއިރާއިން ސިފައިން ބިނާކުރުމަށް އެޅުނު ވަރަށް މުހިންމު ފިޔަވަޅެކެވެ. ދިފާޢީ އަދި ވަޠަނީ ޚިދުމަތާ ބެހޭ ވުޒާރާއިން މަޢުލޫމާތު ދެއްވާގޮތުގައި، މިއީ ފަންނީ ހުނަރުވެރިކަން އިތުރުކުރުމަށް ރާއްޖޭގައި މިހާތަނަށް ހުޅުވުނު މިފަދަ ފުރަތަމަ ތަމްރީނު މަރުކަޒެވެ.

މި ސްކޫލްގެ އެންމެ ބޮޑު އެއް ބޭނުމަކީ ރައީސުލްޖުމްހޫރިއްޔާގެ އިސްނެންގެވުމާއެކު ފައްޓަވާފައިވާ "ދިވެހި ވަޠަނީ ޚިދުމަތް" މަޝްރޫޢުގެ ދަށުން ޒުވާނުންނަށް ބޭނުންވާ ފަންނީ ތަމްރީނުތައް ފޯރުކޮށްދިނުމެވެ. މިހާރުވެސް މި ސްކޫލުގައި ރާއްޖޭގެ އެކި ކަންކޮޅުތަކުން ޖުމްލަ 65 ދަރިވަރުން ތަމްރީނު ހޯދަމުންދާއިރު، އޭގެ ތެރޭގައި 16 އަހަރާއި 19 އަހަރާ ދެމެދުގެ 49 ފިރިހެން ކުދިންނާއި 16 އަންހެން ކުދިން ހިމެނެއެވެ.

ކިޔަވައިދޭނެ މުހިންމު ދާއިރާތައް:

އޮޓޯމޮބައިލް އިންޖިނިއަރިންގ
މެރިން އިންޖިނިއަރިންގ
އިލެކްޓްރީޝަން އަދި ރެފްރިޖެރޭޝަން
ވެލްޑިންގ އަދި އޮފީސް މެނޭޖްމަންޓް

މޯލްޑިވްސް ކޮލިފިކޭޝަން އޮތޯރިޓީ (އެމް.ކިއު.އޭ) އިން ޤަބޫލުކުރާ ލެވެލް 3 ގެ ފެންވަރަށް ކުރިއަށްގެންދާ މި ކޯސްތަކަކީ 4 މަސްދުވަހުގެ މުއްދަތަށް ހިންގޭ ޕްރޮގްރާމްތަކެކެވެ. މި ތަމްރީނުތަކުގެ ސަބަބުން ދަރިވަރުންނަށް ވަޒީފާގެ ބާޒާރުގައި ބޭނުންވާ ފަންނީ ހުނަރުތައް ލިބިގެންދާނެއެވެ.

ފަންނީ ތަމްރީނުތަކުގެ އިތުރުން، މި ސްކޫލުގައި ކިޔަވާ ދަރިވަރުންގެ އަޚްލާޤާއި، ދީނީ ހޭލުންތެރިކަމާއި، ވަގުތަށް ކަމޭހިތުމުގެ ސިފަ އަށަގަންނުވައި، ޤައުމީ ލޯބި ހުރި ޒިންމާދާރު ބަޔަކަށް އެކުދިން ހެދުމަށް އެމްއެންޑީއެފްގެ ތަޖުރިބާކާރު އިންސްޓްރަކްޓަރުން މަސައްކަތް ކުރައްވާނެއެވެ.

ސިފައިންގެ އަހަރީ ދުވަހުގެ މި ޖަލްސާގައި ރާއްޖޭގެ އަސްކަރިއްޔާގެ މާޒީއާއި ކުރިމަގާ ގުޅޭ ޚާއްޞަ ވީޑިއޯއެއް ދައްކާފައިވާއިރު، އަސްކަރިއްޔާއަށް ގިނަ ދުވަހު ޚިދުމަތް ކުރެއްވި ބޭފުޅުންގެ އަގުވަޒަންކޮށް މެޑަލިވެސް ވަނީ އަރުވާފައެވެ.