ކުރީގެ ރައީސް ނަޝީދު ޕްރޮމޯޓުކުރާ ކްރިޕްޓޯ ޕްރޮޖެކްޓަކީ ސްކޭމެއް ކަމަށް ތުހުމަތުކޮށްފި

ކުރީގެ ރައީސް މުޙައްމަދު ނަޝީދާއި ދުނިޔޭގެ އެހެނިހެން ބައެއް ލީޑަރުންގެ ނަން ބޭނުންކޮށްގެން ޕްރޮމޯޓުކުރަމުންދާ "ކޮމަންވެލްތު ޔޫނިއަން" (ސީޑަބްލިއުޔޫ) ކްރިޕްޓޯކަރަންސީ ޓޯކަންއަކީ ބޮޑު ސްކޭމެއް ކަމުގެ ތުހުމަތުތަކެއް ފެންމަތިވެއްޖެއެވެ.

މިދިޔަ އޭޕްރީލް މަހުގެ 9 ވަނަ ދުވަހު ލޯންޗުކުރި މި ޓޯކަންއާ ގުޅޭގޮތުން ސޯޝަލް މީޑިއާގައި ކަންބޮޑުވުން ފާޅުކޮށްފައިވަނީ 'ޖުބްރާން ޝަރީފް' ނަމަކަށް ކިޔާ އެކްސް އެކައުންޓަކުންނެވެ. އޭނާ ހާމަކުރި ގޮތުގައި، މި ޓޯކަންގެ ޖުމްލަ ސަޕްލައިގެ 73 އިންސައްތަ ކޮންޓްރޯލްކުރަނީ އެންމެ ފަރާތަކުންނެވެ. އެގޮތުން 195 ވޮލެޓެއްގައި މި ފައިސާ ރައްކާކޮށްފައިވާއިރު، މިއީ އޮޅުވާލުމެއް ކަމުގެ ބޮޑެތި ނިޝާންތައް ފެންނަން ހުރި ކަމަށް އޭނާ ފާހަގަކުރިއެވެ.

މި ޕްރޮޖެކްޓުގެ އެޑްވައިޒަރީ ބޯޑުގައި ރައީސް ނަޝީދާއި ކުރީގެ ޚާރިޖީ ވަޒީރު ޢަބްދުﷲ ޝާހިދު ހިމެނިވަޑައިގަންނަވާ ކަމަށް އެ ވެބްސައިޓުގައި ބުނެފައިވެއެވެ. ނަމަވެސް ޝާހިދު ވަނީ މިކަން ދޮގުކޮށް، އެ ޕްރޮޖެކްޓާ އެއްވެސް ގުޅުމެއް ނެތްކަމަށް ވިދާޅުވެފައެވެ. އަދި މޮރިޝަސްގެ ކުރީގެ ރައީސާ އަމީނާ ގުރީބް-ފާކިމް ވެސް ވަނީ މިއީ ދޮގެއްކަމަށް ވިދާޅުވެފައެވެ.

ރައީސް ނަޝީދު މި ޕްރޮޖެކްޓާ ގުޅޭގޮތުން ރަސްމީކޮށް އެއްޗެއް ވިދާޅުވެފައި ނުވި ނަމަވެސް، އެމަނިކުފާނު ވަނީ ސީޑަބްލިއުޔޫގެ ބައެއް ޕޯސްޓުތައް ރީޓްވީޓު ކޮށްފައެވެ. ރިޕޯޓުތައް ބުނާ ގޮތުގައި، ޢާންމުކޮށް މީހުންނަށް ފެންނަ ގޮތަށް މިފަދަ ކަންކަމަށް ތާއީދުކުރި ނަމަވެސް، މިއީ ސައްޙަ ޕްރޮޖެކްޓެއްތޯ އަމިއްލައަށް ކަށަވަރުކުރުން މުހިންމެވެ. ކްރިޕްޓޯ މާކެޓުގެ ތަޖުރިބާކާރުން އިންޒާރުދޭ ގޮތުގައި މިއީ އިންވެސްޓަރުންގެ އަތުން ފައިސާ ހޯދުމަށްފަހު ފިލައިގެންދާ ބާވަތުގެ "ރަގް ޕުލް" ސްކޭމަކަށް ވުމުގެ ފުރުޞަތު ވަރަށް ބޮޑެވެ.