ޙާޖީންގެ ހުރިހާ އިންތިޒާމްތަކެއް ވަރަށް ފުރިހަމައަށް ވަނީ ޤާއިމްކުރެވިފައި: ވަޒީރު ޝަހީމް

މިއަހަރު ޙައްޖަށް ފުރާ ޙާޖީންގެ ހުރިހާ އިންތިޒާމްތަކެއް ވަރަށް ފުރިހަމައަށް ޤާއިމްކުރެވިފައިވާކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ދިވެހިރާއްޖޭގެ ޙައްޖުވެރިން ފުރުމުގެ ކުރިން ވެލާނާ އިންޓަރނޭޝަނަލް އެއަރޕޯޓުގައި ވެފައިވާ އެންމެ ފަހުގެ ތައްޔާރީތައް ބައްލަވާލެއްވުމަށް ކުރެއްވި ޒިޔާރަތަށްފަހު އެވެ.

ވަޒީރު ވިދާޅުވީ، ޙައްޖުވެރިން ފުރުމުގެ ކުރިން އެއާޕޯޓްގެ ތައްޔާރީތައް ބަލައިލުމަށް ކުރެއްވި ޒިޔާރާތުގައި، އެންމެހައި އިންތިޒާމްތަކެއް ވަރަށް ފުރިހަމަވެފައިވާކަން ފާހަގަކުރެވިފައިވާ ކަމަށެވެ. އަދި މައްކާގައި ވެސް މޯލްޑިވްސް ޙައްޖު ކޯޕަރޭޝަނުގެ ހޮޓަލްގައި ފުރިހަމަ އިންތިޒާމްތަކެއް ޤާއިމުކުރެވިފައިވާކަމަށް ވަޒީރު ވިދާޅުވިއެވެ. ހަމަ އެހެންމެ، ދިވެހި ރައްޔިތުންގެ ޚިދުމަތުގައި ދެމިތިބުމަށް ޙައްޖު މިޝަނުން ވެސް ޙަރަކާތްތެރިވަމުންދާކަމަށް ވަޒީރު ވިދާޅުވިއެވެ.

ހައްޖުވެރިން ފުރުމުގެ ކުރިން އެއާޕޯޓްގެ ތައްޔާރީތައް ބަލައިލުން. ﷲ ގެ މަތިވެރި ރަޙުމަތުން އެންމެހައި އިންތިޒާމްތަކެއް ވަނީ ފުރިހަމަ ކުރެވިފަ. މައްކާގައި ވެސް މޯލްޑިވްސް ޙައްޖު ކޯޕަރޭޝަނުގެ ހޮޓަލްގައި ވަނީ ފުރިހަމަ އިންތިޒާމް ޤާއިމު ކުރެވިފަ. ހައްޖު މިޝަނުން ވެސް ދަނީ… pic.twitter.com/u1WNhJ2ORP

— Mohamed Shaheem Ali Saeed (@Mohamedshaheem1) May 15, 2026

މިއަހަރުވެސް ދިވެހި ޙައްޖުވެރިން ދަތުރުކުރުމަށް ހަމަޖެހިފައިވަނީ މައްކާ ރޫޓު އިނީޝިއޭޓިވްގެ އިންތިޒާމުތަކުގެ ތެރެއިންނެވެ. ޙައްޖުވެރިންގެ ދަތުރު ލުއިފަސޭހަކޮށްދިނުމުގެ ގޮތުން ސަޢުދީ ޢަރަބިއްޔާއިން ކުރިއަށް ގެންދާ މައްކާ ރޫޓު އިނީޝިއޭޓިވްގައި ދިވެހިރާއްޖެ ހިމަނާފައިވަނީ 1446 ވަނަ އަހަރުގެ ޙައްޖު މޫސުމުގައެވެ. އެގޮތުން މިދިޔަ އަހަރު ދިވެހިރާއްޖޭގައި މި ޚިދުމަތް އިފްތިތާޙްކޮށްދެއްވީ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުއެވެ.

މިއަހަރުގެ ޙައްޖު ދަތުރުގައި ޙާޖީންނަށް ފޯރުކޮށްދޭންޖެހޭ އެންމެހާ ޚިދުމަތްތައް ފޯރުކޮށްދީ، ޙާޖީން ހިތްހަމަޖެހިވަޑައިގަންނަވާނެކަމަށް އުންމީދުކުރައްވާކަމަށް ވަޒީރު ވިދާޅުވިއެވެ.