ރާއްޖޭގައި މިހާތަނަށް ހިންގި އެންމެ ބޮޑު އެއް މުރަކަ އާލާކުރުމުގެ ހަރަކާތް ކުރިއަށް ގެންގޮސްފި

ވިޒިޓް މޯލްޑިވްސް ކޯޕަރޭޝަން (ވީ.އެމް.ސީ)، ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) އަދި ޕަބްލިކް ސަރވިސް މީޑިއާ (ޕީ.އެސް.އެމް) ގުޅިގެން، ރާއްޖޭގައި މިހާތަނަށް ހިންގި އެންމެ ބޮޑު އެއް މުރަކަ އާލާކުރުމުގެ ހަރަކާތް ކުޑަގިރި ކައިރީގައި އޮންނަ "ދޯނިއަރ ރެކް" ސަރަހައްދުގައި ކުރިއަށް ގެންގޮސްފިއެވެ.

ޕީ.އެސް.އެމް އިން ބާއްވާ އޭޝިއާ މީޑިއާ ސަމިޓް 2026 ގެ ބައެއްގެ ގޮތުގައި ކުރިއަށް ގެންދިޔަ މި ހަރަކާތުގައި 40 ގައުމަކުން 300 އެއްހާ ބައިނަލްއަގުވާމީ މީޑިއާ މަންދޫބުން ބައިވެރިވިއެވެ.

ދޯނިއަރ ރެކް މަޝްރޫއަކީ ވިޒިޓް މޯލްޑިވްސް ކޯޕަރޭޝަނާއި އެޗް.ޑީ.ސީ ގުޅިގެން ކުރިއަށްގެންދާ "ރީޖެނެރޭޓިވް ޓޫރިޒަމް" އިސްނެގުމެކެވެ. 2025 ވަނަ އަހަރު ފެށި މި މަޝްރޫއަކީ ކަނޑުއަޑީގައި އޮތް ދެ ބޯޓެއް، ދިގު މުއްދަތުގެ މުރަކަ އާލާކުރުމުގެ މަސައްކަތާއެކު ފަރުގެ އޮނިގަނޑަކަށް ބަދަލުކޮށް، ކަނޑުގެ ދިރުންތައް އާލާކުރުމަށާއި ޑައިވްކުރުމުގެ ތަފާތު ތަޖުރިބާއެއް ފޯރުކޮށްދިނުމަށް ތައްޔާރުކޮށްފައިވާ ސަރަހައްދެކެވެ.

މޭ 14 ވަނަ ދުވަހު ބޭއްވި މި ހަރަކާތުގައި، އޭޝިއާ މީޑިއާ ސަމިޓުގެ މަންދޫބުން ވަނީ ހާއްސަކޮށް ފަރުމާކޮށްފައިވާ ފްރޭމްތަކުގައި މުރަކަ އިންދައި، އެ ތަކެތި ދޯނިއަރ ރެކް ސަރަހައްދުގައި ބެހެއްޓުމުގައި އަމަލީގޮތުން ބައިވެރިވެފައެވެ. މި ސަރަހައްދު ފަރުމާކޮށްފައިވަނީ އެއާޕޯޓެއްގެ ސިފަ ޖެހޭގޮތަށް ކަނޑުއަޑީގެ މާހައުލާ ގުޅޭގޮތަށެވެ. މިގޮތުން، ރާއްޖޭގެ އެތެރޭގެ އުދުހުންތަކުގައި އެންމެ ފުރަތަމަ ބޭނުންކުރި ބޯޓުތަކުގެ ތެރޭގައި ހިމެނޭ "ޑޯނިއަރ" މަތިންދާބޯޓު، ފަރުގެ އޮނިގަނޑުގެ ބައެއްގެ ގޮތުގައި ބޭނުންކޮށްފައިވެއެވެ.

މި މަސައްކަތް ކުރިއަށް ގެންގޮސްފައިވަނީ އެޗް.ޑީ.ސީގެ ޓީމާއި، ވޮލަންޓިއަރ ކުރި ފަތުރުވެރިކަމުގެ ދާއިރާގެ ޑައިވް ޓީމުތަކުގެ އެހީތެރިކަމާއެކު، ސައިންޓިފިކް އިރުޝާދުގެ ދަށުންނެވެ. ބައިވެރިންނަށް މުރަކަ ގެންގުޅޭނެ ގޮތާއި އިންދާނެ އުކުޅުތަކުގެ ތަމްރީނު ދީފައިވާއިރު، މިއީ އެ ސަރަހައްދުގެ ފަރު އާލާކުރުމަށް ކުރެވޭ މަސައްކަތަށް ލިބުނު ބޮޑު އެހީތެރިކަމެކެވެ.

މި ހަރަކާތުން ރާއްޖޭގެ ފަތުރުވެރިކަން ތަރައްގީކުރުމުގައި ތިމާވެށި ހިމާޔަތްކުރުން ބައިވެރިކުރާ މިންވަރު ހާމަވެގެންދެއެވެ. މިއީ ރާއްޖެއަކީ ހަމައެކަނި ލަގްޒަރީ މަންޒިލެއްގެ ގޮތުގައި އޮތް އޮތުން ބަދަލުކޮށް، ތަފާތު ތަޖުރިބާތަކާއި ތިމާވެއްޓަށް ހޭލުންތެރި ފަތުރުވެރިކަމެއް ފޯރުކޮށްދޭ ގައުމެއްގެ ގޮތުގައި ދުނިޔެއަށް ދައްކުވައިދޭ ކަމެކެވެ.

މި ހަރަކާތް ކާމިޔާބުކަމާއެކު ކުރިއަށް ގެންދިއުމުގައި ސަރުކާރުގެ ވުޒާރާތަކާއި، ރިސޯޓުތަކާއި، ޑައިވް ސެންޓަރުތަކުގެ އިތުރުން ސަލާމަތީ ހިދުމަތްތަކުން ވަނީ ބޮޑު އެހީތެރިކަމެއް ފޯރުކޮށްދީފައެވެ. މީގެ ތެރޭގައި މިނިސްޓްރީ އޮފް ޓޫރިޒަމް، އެންވަޔަރަންމަންޓް މިނިސްޓްރީ، އެމް.އެން.ޑީ.އެފް، ޕޮލިސް ސަރވިސް އަދި އެމް.ޓީ.ސީ.ސީ ފަދަ މުއައްސަސާތައް ހިމެނެއެވެ.