އޭސީސީ އާއި އީސީގެ ނައިބުރައީސުންނާއި ބައެއް މެމްބަރުން ވަކިކުރަން މަޖިލީހުން ފާސްކޮށްފި

އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ނައިބުރައީސުންނާއި ބައެއް މެމްބަރުން މަޤާމުން ވަކިކުރަން ރައްޔިތުންގެ މަޖިލީހުން ފާސްކޮށްފިއެވެ.

 ބައެއް މިނިވަން މުއައްސަސާތަކުގެ މެންބަރުންނާގުޅޭ ޝަކުވާތަކެއް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހުށައެޅުމާއި ގުޅިގެން އެ މައްސަލަ ކޮމިޓީން ވަނީ ބަލައިގަނެ ދިރާސާކުރުމުގެ މަސައްކަތް ކުރިއަށް ގެންގޮސްފައިވެއެވެ. 

އެގޮތުން މެންބަރުކަމުގެ މަޤާމުން މެމްބަރުން ވަކިކުރުމަށް ކޮމިޓީއަށް ހުށައަޅާފައިވަނީ މިނިވަން ތިން ކޮމިޝަނެއްގެ މައްސަލައެވެ. އޭގެތެރޭގައި ހިމެނެނީ އޭސީސީގެ ނައިބު ރައީސް ޢަބްދުއްސަލާމާއި އެ ކޮމިޝަންގެ މެންބަރު ޠާހާ މުޙައްމަދެވެ. އަދި އިލެކްޝަންސް ކޮމިޝަންގެ ނައިބު ރައީސް ޢަލީ ނަޝާތާއި މެންބަރު މުޙައްމަދު އާސިފް އަދި ޑރ. މުޙައްމަދު ޒާހިރުގެ އިތުރުން ސިވިލް ސަރވިސް ކޮމިޝަނުގެ ރައީސް އަޙްމަދު ނާސިޙެވެ.

ސިއްރުކޮށްގެން ކުރިއަށްގެންދިޔަ ކޮމިޓީ ބައްދަލުވުމުގައި ފާސްކުރީ ސިވިލް ސަރވިސް ކޮމިޝަނުގެ ރައީސް ފިޔަވައި އެހެން ހުރިހައި މެންބަރުން މަޤާމުން ވަކިކުރުމަށެވެ. ނާސިޙް މަޤާމުން ވަކިނުކުރުމަށް ނިންމި ސަބަބެއް ހާމަކޮށްފައެެއް ނުވެއެވެ.

އޭސީސީގެ ނައިބު ރައީސާއި މެންބަރެއް އަދި އިލެކްޝަންސް ކޮމިޝަނުގެ ނައިބު ރައީސާއި ދެ މެންބަރުން މަޤާމުން ވަކިކުރުމަށް ނިންމީ އެ ކޮމިޝަންތަކުގެ ޤާނޫނުގައި ބަޔާންކޮށްފައިވާ ސުލޫކީ މިންގަނޑާ ޚިލާފަށް ބައެއް މެންބަރުން ޢަމަލުކޮށްފައިވާކަމަށް ތުހުމަތުކުރެވޭތީއެވެ. 

މީގެއިތުރުން ކޮމިޝަންތަކުގެ މަސްއޫލިއްޔަތުތަކާ ޚިލާފަށް އޭގެ ތެރެއިން ބައެއް މެންބަރުން މަސައްކަތް ކޮށްފައިވާތީ ކުރެވޭ ތުހުމަތުމަތުތަކާއި ގުޅިގެންނެވެ.

އެގޮތުން އެ ކޮމިޝަންތަކުގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެކަމަށާއި، އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތެއް އިސް ކޮށްގެން ނުވާނެ ކަމަށް ޤާނޫނުގައި ބުނެފައިވީނަމަވެސް އެކަންކަމާ އެ މެންބަރުން ޚިލާފުވެފައިވާކަމަށް ތުހުމަތުކުރެވޭކަމަށް ރައްޔިތުންގެ މަޖިލީހުގެ ތަޅުމަށް އަމީން އާންމު މީގެ ކުރިން އިއްވެވި ސިޓީގައި ވިދާޅުވެފައިވެއެވެ.

މިނިވަން ދެ މުއައްސަސާއެއްގެ ބައެއް މެންބަރުން މަޤާމުން ވަކިކުރުމަށް ކޮމިޓީން ފާސްކޮށްފައިވާއިރު، އެ މެންބަރުން ކޮމިޝަންތަކުން ވަކިވާނީ ރައްޔިތުންގެ މަޖިލީހުގެ ތަޅުމަށް ކޮމިޓީ ރިޕޯޓު ހުށައަޅައި، ފާސްކުރުމުން ކަން ފާހަގަކޮށްލަން ޖެހެއެވެ.