ވާރުތަކުރާ ބަލިތަކެއް ފެތުރުން ހުއްޓުވިކަމުގެ ލިޔުން އަރުވައިފި

މައިންގެ ކިބައިން ދަރިންނަށް އެޗްއައިވީ، ހެޕަޓައިޓިސް ބީ އަދި ސިފިލިސް ވާރުތަކުރުން ނުވަތަ 'ޓްރިޕަލް އެލިމިނޭޝަން' ހާސިލުކުރި ދުނިޔޭގެ ފުރަތަމަ ޤައުމުގެ ގޮތުގައި ދިވެހިރާއްޖެ ކަނޑައަޅައި، އެކަމުގެ ރަސްމީ ލިޔުން ދިވެހި ސަރުކާރާ ހަވާލުކޮށްފިއެވެ.

މި ތާރީޚީ ސެޓްފިކެޓާ ހަވާލުވެވަޑައިގެންނެވީ ޖެނީވާގައި ކުރިއަށްދާ 77 ވަނަ ވޯލްޑް ހެލްތު އެސެމްބްލީގެ ތެރެއިން، ޞިއްޙަތާ ބެހޭ ވަޒީރު ފާތިމަތު ގީލާ އަލީއެވެ.

ދުނިޔޭގެ ޞިއްޙަތު ޖަމުޢިއްޔާ (ޑަބްލިއުއެޗްއޯ)އިން ވަނީ ދިވެހިރާއްޖެއަކީ މައިންގެ ކިބައިން ދަރިންނަށް ހެޕަޓައިޓިސް ބީ ވާރުތަވުން ހުއްޓުވާލެވުނު ޤައުމެއްގެ ގޮތުގައި މިހާރު ކަށަވަރުކޮށްދީފައެވެ. މީގެ ކުރިން 2019 ވަނަ އަހަރު ރާއްޖެއިން ވަނީ އެޗްއައިވީ އަދި ސިފިލިސް މައިންގެ ކިބައިން ދަރިންނަށް ފެތުރުން ހުއްޓުވާލެވުނު ކަމުގެ ކަށަވަރުކަން ހޯދާފައެވެ. މިއާއެކު، މި ތިން ބަލި އެކުގައި ނައްތާލި ދުނިޔޭގެ ފުރަތަމަ ޤައުމުގެ ޝަރަފު ރާއްޖެއަށް ވަނީ ލިބިފައެވެ.

މި ކާމިޔާބީއާ ގުޅޭގޮތުން ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އަދަނޮމް ގެބްރެއެސަސް މީގެކުރިން ވިދާޅުވީ، "ދިވެހިރާއްޖެއިން ވަނީ ވަރުގަދަ އުސޫލުތަކާއެކު މައިންނާއި ކުޑަކުދިންގެ ޞިއްޙަތަށް ދެމެހެއްޓެނިވި އިންވެސްޓްމަންޓް ކުރުމުން، މި ނުރައްކާތެރި ބަލިތަކާއި އޭގެ ސަބަބުން ކުރިމަތިވާ ވޭން ހުއްޓުވާލެވިދާނެކަން ސާބިތުކޮށްދީފައި،" ކަމަށެވެ. އަދި މިއީ މި ލަނޑުދަނޑި ހާސިލުކުރަން މަސައްކަތްކުރާ ހުރިހާ ޤައުމުތަކަކަށް ލިބުނު އުއްމީދެއް ކަމަށްވެސް އޭނާ ފާހަގަކުރެއްވިއެވެ.

މި ކާމިޔާބާއި ގުޅިގެން ރާއްޖޭގެ ކުރީގެ ޞިއްޙަތާބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވީ، މިއީ މައިންނާއި ކުޑަކުދިންގެ އިތުރުން ކުރިއަށް އޮތް ޖީލުތައް ރައްކާތެރިކުރުމަށް ރާއްޖެއިން ކުރާ މަސައްކަތުގެ ނަތީޖާ ކަމަށެވެ. "މިތިން ބަލި ނައްތާލުމުގެ ކާމިޔާބީ ހޯދުމަކީ ހަމައެކަނި އަޅުގަނޑުމެންގެ ޞިއްޙީ ދާއިރާއަށް ލިބުނު ކާމިޔާބީއެއް ނޫން، އެއީ އެއްވެސް މީހަކު އިސްތިސްނާ ނުކޮށް، ދެމެހެއްޓެނިވި، ހަމަހަމަ އަދި ފެންވަރު ރަނގަޅު ޞިއްޙީ ޚިދުމަތްތަކެއް ފޯރުކޮށްދިނުމަށް ސަރުކާރުން ރައްޔިތުންނަށް ވެފައިވާ ވަޢުދެއް،" ކުރީގެ ޞިއްޙީ ވަޒީރު ނާޒިމް ވިދާޅުވިއެވެ.

Minister @geelaali received the certification recognizing the Maldives as the first country to achieve Triple Elimination of mother-to-child transmission of HIV, Syphilis, and Hepatitis B at #WHA79. #TripleEMTCT #Maldives #SIDS pic.twitter.com/hFj227CIQi

— Ministry of Health, Family and Welfare (@MoHmv) May 19, 2026

ތަފާސްހިސާބުތަކަށް ބަލާއިރު، ރާއްޖޭގައި މާބަނޑު އަންހެނުންގެ 95 އިންސައްތައަށްވުރެ ގިނަ މީހުންނަށް ވިހެއުމުގެ ކުރީގެ ފަރުވާ ލިބޭއިރު، ހުރިހާ މީހުންނަށްވެސް މި ތިން ބައްޔަށް ޓެސްޓުކުރުމުގެ ފުރުސަތު އޮވެއެވެ. މީގެ ނަތީޖާއެއްގެ ގޮތުން 2022 އަދި 2023 ވަނަ އަހަރު އެޗްއައިވީ ނުވަތަ ސިފިލިސްއާއެކު އެއްވެސް ކުއްޖަކު ރާއްޖޭގައި އުފަންވެފައެއް ނުވެއެވެ.

މި ކާމިޔާބީއަކީ ސަރުކާރާއި، އަމިއްލަ ޞިއްޙީ ޚިދުމަތްދޭ ފަރާތްތަކާއި، މަދަނީ ޖަމްޢިއްޔާތަކުގެ އިތުރުން ބައިނަލްއަޤްވާމީ ބައިވެރިން ގުޅިގެން ކުރި ބުރަ މަސައްކަތުގެ ނަތީޖާއެވެ. ޚާއްޞަކޮށް ބިދޭސީން ހިމެނޭހެން އެންމެންނަށް ހަމަހަމަކަމާއެކު ޚިދުމަތް ފޯރުކޮށްދިނުމަށް ރާއްޖެއިން ގެންގުޅޭ އުސޫލުތަކަށް ބައިނަލްއަޤްވާމީ އިދާރާތަކުން ވަނީ ތައުރީފުކޮށްފައެވެ.