ހިންނަވަރު ފުޓްސަލް ދަނޑުގެ މަސައްކަތް ނިމުމަކާއި ގާތައް

ޅ. ހިންނަވަރުގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ތަރައްޤީކުރާ ފުޓްސަލް ދަނޑުގެ މަސައްކަތްތައް ނިމުމަކާ ގާތްވެފައިވާކަމަށް ރޯޑް ޑިވަލޮޕްމެންޓް ކޯޕަރޭޝަން (އާރުޑީސީ) އިން ހާމަކޮށްފިއެވެ.

މި މަޝްރޫޢަކީ އެ ރަށުގެ ޒުވާނުންނަށް ކުޅިވަރުގެ ފުރުޞަތުތައް ފަހިކޮށްދިނުމަށް ސަރުކާރުން ކުރިއަށްގެންދާ މުހިންމު މަޝްރޫޢެކެވެ.

އާރުޑީސީން މިއަދު އެކްސްގައި ކުރި ޕޯސްޓެއްގައި ބުނެފައިވަނީ، މިވަގުތު ކުރިއަށްދަނީ ދަނޑުގެ ވޯކްވޭ ސްކްރީޑް އެޅުމާއި، ފާރުގައި ކުލަލުމުގެ އިތުރުން ފެންސު ޖެހުމާއި ދުވާރުގެ އެންމެ ފަހުގެ މަސައްކަތްތައް ކަމަށެވެ. މީގެ އިތުރުން ގްރައުންޑް ލެވެލިން އަދި ކޮމްޕެކްޓް ކުރުމުގެ މަސައްކަތުގެ 90 އިންސައްތަ މިހާރު ވަނީ ނިމިފައެވެ.

ސަރުކާރުން ހިންނަވަރުގައި އާ ފުޓްސަލް ދަނޑެއް ތަރައްޤީ ކުރަން ފެށީ، އެ ރަށުގައި މީގެ ދިހަވަރަކަށް އަހަރު ކުރިން އަޅާފައި އޮތް ދަނޑު ވަރަށް ބޮޑަށް ހަލާކުވެ، ބޭނުންނުކުރެވޭ ހާލަތަށް ގޮސްފައި ވަނިކޮށެވެ. 

ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ޅ. ހިންނަވަރުގައި ޤާއިމުކުރާ ފުޓްސަލް ދަނޑުގެ މަސައްކަތްތަކުގެ ތެރެއިން މިވަގުތު ކުރިއަށްދަނީ ވޯކްވޭ ސްކްރީޑް އާއި ފާރުގައި ކުލަލުމުގެ އިތުރުން ފެންސު ޖެހުމާއި ދުވާރުގެ އެންމެ ފަހުގެ މަސައްކަތް.#TeamRDC pic.twitter.com/nDH6eeBuqX

— Road Development Corporation Ltd (@rdcmaldives) May 20, 2026

މި މަޝްރޫޢަކީ ސަރުކާރުން 1.7 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ. މި މަސައްކަތް އާރުޑީސީއާ ހަވާލުކޮށްފައިވަނީ 29 މާރިޗު 2025 ގައެވެ. މި ދަނޑު ނިމުމާއެކު ހިންނަވަރުގެ ކުޅިވަރު ކުޅޭ ފަރާތްތަކަށް ޒަމާނީ ފެންވަރުގެ ވަޞީލަތްތަކާއެކު ކުޅިވަރު ކުޅުމުގެ ފުރުޞަތު ލިބިގެންދާނެއެވެ.