މާލެ ސަރަހައްދުގެ 4 މައިދާނެއްގައި އީދު ނަމާދުގެ ބޮޑު ޖަމާއަތް ބާއްވަނީ

މިއަހަރުގެ އަޟްހާ އީދު ނަމާދު މާލެ ސަރަހައްދުގެ ހަތަރު މައިދާނެއްގައި ބޮޑު ޖަމާއަތުގައި ކުރުމަށް އިސްލާމީ ކަންތައްތަކާ ބެހޭ ވުޒާރާއިން ނިންމައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން މިއަދު އާންމުކުރި މައުލޫމާތުގައިވާ ގޮތުން، މާލެ، ހުޅުމާލެ އަދި ވިލިމާލޭގައި ބޮޑު ޖަމާއަތުގައި އީދު ނަމާދު ކުރުން އޮންނާނީ އަންނަ ޖޫން މަހުގެ 16 ވާ އާދީއްތަ ދުވަހުގެ ހެނދުނު 7:00 ގައެވެ.

ބޮޑު ޖަމާއަތުގައި ނަމާދު ކުރުމަށް ހަމަޖެހިފައިވާ މައިދާންތަކަކީ:

މާލެ: މާފަންނު ސްޓޭޑިއަމް
ވިލިމާލެ: ވިލިމާލެ ބޯޅަދަނޑު
ހުޅުމާލެ ފޭސް 1: ސިންތެޓިކް ޓްރެކް
ހުޅުމާލެ ފޭސް 2: ކުޅިވަރު އެކުވެނި (ސްޕޯޓްސް ކޮމްޕްލެކްސް)
މައިދާންތަކުގެ އިތުރުން، މާލެ ސަރަހައްދުގެ ގިނަ މިސްކިތްތަކެއްގައި ވެސް އީދު ނަމާދު ކުރުން ކުރިއަށްދާނެއެވެ. އެގޮތުން މާލޭގެ 17 މިސްކިތެއްގައި، ވިލިމާލޭގެ 2 މިސްކިތެއްގައި، ހުޅުމާލެ ފޭސް 1 ގެ 5 މިސްކިތެއްގައި އަދި ހުޅުމާލެ ފޭސް 2 ގެ 2 މިސްކިތެއްގައި އީދު ނަމާދު ކުރުން އޮންނާނެ ކަމަށް އެ ވުޒާރާއިން މައުލޫމާތު ދެއެވެ.

ކަލަންޑަރުގައިވާ ގޮތުން މިއަހަރުގެ އަޟްހާ އީދު ދުވަހަކީ މި ހިނގާ ޖޫން މަހުގެ 16 ވާ އާދީއްތަ ދުވަހެވެ.

މާލެ ސަރަހައްދުގައި ކޮންމެ އަހަރަކު ވެސް ބޮޑު ޖަމާއަތުގައި އީދު ނަމާދު ކުރަމުން އަންނަނީ، ގިނަ އަދަދެއްގެ މީހުންނަށް އެއްފަހަރާ ބައިވެރިވެވޭނެ އިންތިޒާމު ހަމަޖައްސައި، އިސްލާމީ އުހުއްވަތްތެރިކަން އާލާކުރުމުގެ މަގްސަދުގައެވެ. ނަމަވެސް، މޫސުން ތަން ނުދޭނަމަ ބޮޑު ޖަމާއަތުގެ ނަމާދު މިސްކިތްތަކަށް ބަދަލުކުރެވޭނެ ކަމަށް ވެސް އެ ވުޒާރާއިން މީގެ ކުރިން ބުނެފައިވެއެވެ.