ޚަބަރު
ގެމަނަފުށީގައި ބިދޭސީއަކަށް ވަޅިން ހަމަލާދީ ޒަހަމްކޮށްލައިފި
ގެމަނަފުށި - ފޮޓޯ ވިސިޓް ގެނަމަފުށި ފޭސްބޫކް
ގއ. ގެމަނަފުށީގައި ދެ ބިދޭސީއެއްގެ ދެމެދުގައި ހިނގި މާރާމާރީއެއްގައި، ތޫނު އެއްޗަކުން ހަމަލާދީ މީހަކު ވަރަށް ބޮޑަށް ޒަހަމްކޮށްލައިފިއެވެ.
މި ހާދިސާއާ ގުޅޭގޮތުން ފުލުހުން މައުލޫމާތު ދެއްވި ގޮތުގައި، ގެމަނަފުށީގައި ދެ ބިދޭސީންގެ ދެމެދުގައި މާރާމާރީއެއް ހިނގައިގެން އުޅޭކަމުގެ ރިޕޯޓް ފުލުހުންނަށް ލިބިފައިވަނީ ރޭގެ މެންދަމާ ގާތްވެފައި ވަނިކޮށް، ގާތްގަނޑަކަށް 23:00 އެހައިކަންހާއިރުއެވެ. މި މާރާމާރީގައި އެކަކަށް ވަނީ ވަޅިން ހަމަލާދީ ޒަހަމްކޮށްލާފައެވެ.
އަނިޔާވި މީހާއަށް އެންމެ ފުރަތަމަ ފަރުވާ ދީފައިވަނީ ގެމަނަފުށީ ސިއްހީ މަރުކަޒުގައެވެ. ނަމަވެސް، ލިބިފައިވާ ޒަހަމްތަކުގެ ސަބަބުން އިތުރު ފަރުވާއަށްޓަކައި އެ މީހާ މިހާރު ވަނީ ގއ. ވިލިނގިލީގައި ހުންނަ އަތޮޅު ހޮސްޕިޓަލަށް ބަދަލުކޮށްފައެވެ.
މި ހާދިސާއާ ގުޅިގެން ފުލުހުން ވަނީ ހަމަލާދިން ކަމަށް ތުހުމަތުކުރެވޭ ސަރަހައްދުން ބިދޭސީ ފިރިހެނަކު ހައްޔަރުކޮށް، ފުލުހުންގެ ބެލުމުގެ ދަށަށް ގެންގޮސްފައެވެ. މި މާރާމާރީ ހިނގަން މެދުވެރިވި ސަބަބެއް ފުލުހުން އަދި ހާމައެއް ނުކުރެއެވެ.
ފުލުހުން ދަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި އިތުރަށް ތަހުގީގު ކުރަމުންނެވެ.
Ads by MSS
