މީދޫ ކައުންސިލުގެ ރައީސް ހޮވުމަށް ބާއްވާ ދެވަނަ ބުރުގެ ވޯޓުލުން ފަށައިފި

ދ. މީދޫ ކައުންސިލްގެ ރައީސް ހޮވުމަށް ބޭއްވި އިންތިޚާބުގެ ނަތީޖާ އެއްވަރުވުމާ ގުޅިގެން، އެ މަގާމަށް މެންބަރަކު އިންތިޚާބު ކުރުމަށް ބާއްވާ ދެވަނަ ބުރުގެ ވޯޓުލުން މިއަދު ހެނދުނު ރަސްމީކޮށް ފަށައިފިއެވެ.

މިއަދު ހެނދުނު 8:00 ގައި ވޯޓުލުން ފަށާފައިވާއިރު، މި އިންތިޚާބުގައި ވޯޓުލުމަށްޓަކައި ޖުމްލަ ތިން ވޯޓު ފޮއްޓެއް ވަނީ ބަހައްޓާފައެވެ. އެއީ މީދޫގައި ބަހައްޓާފައިވާ ދެ ފޮއްޓާއި، މާލޭގައި ދިރިއުޅޭ މީދޫގެ ރައްޔިތުންނަށް ޚާއްޞަކޮށްގެން ދަރުމަވަންތަ ސްކޫލުގައި ބަހައްޓާފައިވާ ވޯޓު ފޮއްޓެވެ. 

އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، މި އިންތިޚާބުގައި ވޯޓުލުމުގެ ޙައްޤު ލިބިގެންވާ މީހުންގެ ޖުމްލަ އަދަދަކީ 1,049 އެވެ. މީގެ ތެރެއިން މީދޫގައި ވޯޓުލުމަށް ރަޖިސްޓަރީވެފައިވަނީ 587 މީހުންނެވެ. އަދި މާލޭގައި ވޯޓުލުމަށް 462 މީހުން ރަޖިސްޓަރީކޮށްފައިވާ ކަމަށް އެ ކޮމިޝަނުން ވިދާޅުވިއެވެ.

މި އިންތިޚާބުގެ އިތުރު ބުރެއް ބާއްވަން ޖެހުނު ސަބަބަކީ، މިދިޔަ އޭޕްރީލް މަހު ބޭއްވުނު ލޯކަލް ކައުންސިލް އިންތިޚާބުގެ ނަތީޖާއާ މެދު ހައިކޯޓުން ކުރި ހުކުމެކެވެ. މީދޫ ކައުންސިލްގެ ރައީސް ކަމަށް ވާދަކުރައްވަނީ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ފަރާތުން މުޙައްމަދު ޝާހިދާއި، ވެރިކަން ކުރާ ޕްރޮގްރެސިވް ކޮންގްރެސް ކޯލިޝަން (ޕީއެންސީ) ގެ ފަރާތުން ސުހާ އިބްރާހީމެވެ.

ދ. މީދޫ ކައުންސިލް ރައީސް މަޤާމުގެ އިތުރުބުރުގެ ވޯޓު ނެގުން ފެށިގެން ކުރިއަށްދަނީ. ވޯޓުނެގުން ކުރިއަށްދާނީ މިއަދު ހަވީރު 4:00ގެ ނިޔަލަށް pic.twitter.com/UaYUxSdIFS

— Elections Commission (@ElectionsMv) June 13, 2026

ކުރިން ބޭއްވި އިންތިޚާބުގެ ވަގުތީ ނަތީޖާ ދެއްކި ގޮތުން ސުހާއަށް 393 ވޯޓު އަދި ޝާހިދަށް 392 ވޯޓު ލިބުނެވެ. ނަމަވެސް އެމްޑީއޭއިން ހުށަހެޅި ޝަކުވާއަކާ ގުޅިގެން ވޯޓު އަލުން ގުނުމުން، ސުހާއަށް ލިބުނު ދެ ވޯޓެއް ބާތިލު ކަމަށް އިލެކްޝަންސް ކޮމިޝަނުން ނިންމިއެވެ. މި ނިންމުން ސުހާގެ ފަރާތުން ހައިކޯޓުގައި އިސްތިއުނާފު ކުރުމުން، ކޯޓުން ހުކުމް ކުރީ ބާތިލުކުރި ދެ ވޯޓުގެ ތެރެއިން އެއް ވޯޓަކީ ސައްހަ ވޯޓެއް ކަމަށެވެ. އެ ވޯޓުގައި ފާހަގަ މަތިން އިތުރަށް ފަވާފައިވީ ނަމަވެސް، ވޯޓު ދިނީ ކާކަށްކަން ސާފުކޮށް އެނގެން އޮތުމުން ކޯޓުން އެއީ ސައްހަ ވޯޓެއްގެ ގޮތުގައި ކަނޑައެޅީއެވެ. މި ހުކުމާއެކު ދެ ކެންޑިޑޭޓުންގެ ވޯޓު ވަނީ 392 އިން އެއްވަރުވެފައެވެ.

އިލެކްޝަންސް ކޮމިޝަނުން ވިދާޅުވި ގޮތުގައި، މިއަދު ކުރިއަށްދާ ދެވަނަ ބުރުގެ ވޯޓުލުން މިހާތަނަށް ކުރިއަށްދަނީ ވަރަށް އަމާންކަމާއެކުގައެވެ. މި އިންތިޚާބުގެ ނަތީޖާއާއެކު މީދޫ ކައުންސިލްގެ ރައީސްގެ މަގާމަށް ވަޑައިގަންނަވާނެ ބޭފުޅަކު ކަށަވަރުވެގެންދާނެއެވެ.