ޓެކްނިކަލް މައްސަލައަކާ ހުރެ "ބޯހިޔާވަހިކަން" ޕޯޓަލްގެ ޚިދުމަތް މެދުކެނޑިއްޖެ

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ގްރޭޓަރ މާލެ ސަރަޙައްދުން ގޯއްޗާއި ފްލެޓަށް އެދި ފޯމު ހުށަހެޅުމަށް ބޭނުންކުރާ "ބޯހިޔާވަހިކަން" ޕޯޓަލްއަށް ޓެކްނިކަލް މައްސަލައެއް ދިމާވެ، އެޕްލިކޭޝަން ހުށަހެޅުމުގެ ޚިދުމަތް ވަގުތީގޮތުން މެދުކެނޑިއްޖެއެވެ.

މިކަމާ ގުޅޭގޮތުން މިނިސްޓްރީ އޮފް އިިންފްރާސްޓްރަކްޗަރ، ހައުސިންގ އެންޑް އާރބަން ޑިވެލޮޕްމަންޓުން އެކްސްގައި ކުރި ޕޯސްޓެއްގައި ބުނެފައިވަނީ، ޕޯޓަލްއަށް ދިމާވި ޓެކްނިކަލް މައްސަލަ ޙައްލުކުރުމަށް އެ މިނިސްޓްރީގެ ފަންނީ ޓީމުން މިހާރު ދަނީ ބާރަށް މަސައްކަތް ކުރަމުންނެވެ. އަދި މައްސަލަ ޙައްލުވިހާ އަވަހަކަށް އެކަން ޢާންމުކޮށް އިޢުލާނު ކުރާނެ ކަމަށްވެސް މިނިސްޓްރީން ބުނެފައިވެއެވެ.

"ބޯހިޔާވަހިކަން އެންމެންނަށް" ސިޔާސަތުގެ ދަށުން ގްރޭޓަރ މާލެ ސަރަޙައްދުން ގޯއްޗާއި ފްލެޓަށް އެދި އެޕްލިކޭޝަން ހުށަހެޅުމަށް ގާއިމްކޮށްފައިވާ "ބޯހިޔާވަހިކަން" ޕޯޓަލްއަށް ޓެކްނިކަލް މައްސަލައެއް ދިމާވެ އެޕްލިކޭޝަން ހުށަހެޅުގެ ޚިދުމަތް ވަގުތީގޮތުން ވަނީ މެދުކެނޑިފައެވެ.

މި މައްސަލަ… pic.twitter.com/52GTDYn9am

— Ministry of Infrastructure, Housing and Urban Dev. (@MIHUDmv) June 15, 2026

މި މައްސަލަ ދިމާވެފައި މިވަނީ ގޯއްޗާއި ފްލެޓަށް އެދި ހުށަހެޅުމުގެ ސުންގަޑި މިރޭ ދަންވަރު 12:00 އަށް ހަމަވާން ގާތްވެފައި ވަނިކޮށެވެ. ފުރުޞަތު ހަމަވާން ކުޑަވަގުތުކޮޅަކަށް ވެފައި ވަނިކޮށް ޕޯޓަލްއަށް މައްސަލަ ދިމާވުމުން، ވަގުތު އިތުރު ކުޜުމާއިމެދު އެއްވެސް ވާހަކައެއް މިނިސްޓްރީން ހާމަކޮށްފައެއްނުވެއެވެ.

މި މައްސަލައިގެ ސަބަބުން ރައްޔިތުންނަށް ދިމާވެދާނެ ދަތިތަކަށްޓަކައި ހައުސިންގ މިނިސްޓްރީން ވަނީ ނިހާޔަތަށް މަޢާފަށް އެދިފައެވެ. ނަމަވެސް، މި މައްސަލައާ ގުޅިގެން ފޯމު ހުށަހެޅުމުގެ ސުންގަޑި އިތުރުކުރާނެ ކަމެއް ނުވަތަ ނޫންކަމެއް މިނިސްޓްރީން އަދި ހާމަކޮށްފައެއް ނުވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބޯހިޔާވަހިކަމުގެ މަޝްރޫޢުތަކަށް އިސްކަންދެއްވައިގެން ކުރިއަށްގެންދަވާ މި ސިޔާސަތުގެ ދަށުން، ގިނަ އަދަދެއްގެ ބަޔަކު ދަނީ މި ޕޯޓަލް މެދުވެރިކޮށް އެޕްލިކޭޝަން ހުށަހަޅަމުންނެވެ.