ބޯހިޔާވަހިކަމުގެ އާ މަޝްރޫއުތަކެއް ކުރިއަށް އޮތް މަހެއްހާ ދުވަސްތެރޭ އިފްތިތާހު ކުރަނީ

ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން، ކުރިއަށް އޮތް މަހެއްހާ ދުވަހުގެ ތެރޭގައި ރަށްރަށަށް އަމާޒުކޮށްގެން ބޯހިޔާވަހިކަމުގެ އައު މަޝްރޫޢުތަކެއް އިފްތިތާޙްކުރުމަށް ސަރުކާރުން ތައްޔާރުވެއްޖެއެވެ.

މިކަމާ ގުޅޭގޮތުން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ސްޓޭޓް މިނިސްޓަރ އަޙްމަދު ނާޒިމް މުޙައްމަދު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މާލެ ސަރަޙައްދަށް ބަރޯސާވުން ކުޑަކޮށް، އަމިއްލަ ރަށުގައި ތިބެގެން އާއިލާއާއެކު އުޅެވޭނެ ފުރުސަތު ފަހިކޮށްދިނުމަކީ ސަރުކާރުގެ މައިގަނޑު އަމާޒު ކަމަށެވެ.

ދެ މޮޑެލްއަކަށް ބޯހިޔާވަހިކަން ފޯރުކޮށްދިނުން

މި ފަހަރު އިފްތިތާޙްކުރާ މަޝްރޫޢުތައް މައިގަނޑު ގޮތެއްގައި ބަހާލެވިފައިވަނީ ދެ މޮޑެލްއަކަށެވެ:

އެފޯޑަބަލް ހައުސިންގ: އާންމު ރައްޔިތުންނަށް އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަށްޓަކައި ރަށްރަށުގައި ތަރައްޤީކުރާ ހައުސިންގ މަޝްރޫޢުތަކެވެ. މީގެ މައިގަނޑު ބޭނުމަކީ ރިސޯޓުތަކުގައި މަސައްކަތްކުރާ މުވައްޒަފުންނާއި، އާމްދަނީ މަދު ފަރާތްތަކަށް ފަސޭހައިން ގެދޮރުވެރިކަން ކަށަވަރުކޮށްދިނުމެވެ.

އަމިއްލަ ގޯތީގައި ގެދޮރު ބިނާކުރުމުގެ ފައިނޭންސިންގ: އަމިއްލަ ގޯތި އޮވެ، މާލީ ތަނަވަސްކަން ނެތުމުގެ ސަބަބުން ގެދޮރު ނޭޅިފައި ތިބި ފަރާތްތަކަށް މާލީ އިދާރާތައް މެދުވެރިކޮށް ފަސޭހަ ފައިނޭންސިންގ ނިޒާމެއްގެ ދަށުން ލޯނު ލިބޭނެ މަގު ފަހިކޮށްދިނުމެވެ.

ސަރުކާރުން ހާމަކުރައްވާ ގޮތުގައި، މި މަޝްރޫޢުތަކުގެ ސަބަބުން ރަށްރަށުން މާލެއަށް ހިޖުރަކުރާ މިންވަރު މަދުވެ، އަތޮޅުތެރޭގައި އަރބަން ސެންޓަރުތައް ތަރައްޤީވުމަށް މަގުފަހިވާނެއެވެ. ވަކިން ހާއްސަކޮށް، ރިސޯޓުތަކުގައި މަސައްކަތްކުރާ ފަރާތްތަކަށް އެމީހުން މަސައްކަތްކުރާ ސަރަޙައްދާ ގާތުން ޢާއިލާއާއެކު ދިރިއުޅުމުގެ ފުރުސަތު މިކަމުގެ ސަބަބުން ލިބިގެންދާނެއެވެ.

މިހާރުވެސް ސަރުކާރުން އަންނަނީ މާލީ ދަތިކަމާހުރެ ހުއްޓިފައިވާ ބޯހިޔާވަހިކަމުގެ މަޝްރޫޢުތައް އަލުން ފެށުމަށް ގިނަ މަސައްކަތްތަކެއް ކުރަމުންނެވެ. އެގޮތުން 43 ރަށަކުން މިހާރުވެސް ވަނީ މިފަދަ ސްކީމްތަކުގައި ބައިވެރިވުމަށް ޝައުޤުވެރިކަން ފާޅުކޮށްފައެވެ. ކުރިއަށް އޮތް މަސްދުވަހުގެ ތެރޭގައި މި  މަޝްރޫޢުތައް އިފްތިތާޙްކުރެވުމާއެކު، ރާއްޖޭގެ ބޯހިޔާވަހިކަމުގެ ސިޔާސަތަށް ބޮޑު ކުރިއެރުމެއް އަންނާނެއެވެ.