ނިމުނު ހަފްތާގައި ކުއްލި ނުރައްކަލުގެ 11 ހާދިސާއެއް ރިޕޯޓްކޮށްފައިވޭ: އެމްއެންޑީއެފް

ނިމިދިޔަ ހަފްތާގެ ތެރޭގައި ރާއްޖޭގެ އެކި ސަރަހައްދުތަކުގައި ކުއްލި ނުރައްކަލުގެ 11 ހާދިސާއެއް ހިނގައިގެން ރިޕޯޓްކޮށްފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.

އެމްއެންޑީއެފް އިން އެކްސްގައި ކުރި ޕޯސްޓެއްގައި ބުނެފައިވަނީ، މި މަހުގެ 14 އިން 20 ވަނަ ދުވަހުގެ ނިޔަލަށް ހިނގި މި ހާދިސާތަކުގައި އެމްއެންޑީއެފް ފަޔަރ އެންޑް ރެސްކިއު ސާވިސް އިން ހަރަކާތްތެރިވެ، އެހީތެރިކަން ފޯރުކޮށްދީފައިވާ ކަމަށެވެ. މީގެ ތެރޭގައި އެންމެ ގިނައީ އަލިފާނުގެ ހާދިސާތަކެވެ.

ފަޔަރ އެންޑް ރެސްކިއު ސާވިސްގެ ތަފާސްހިސާބުތަކަށް ބަލާއިރު، އަލިފާނުގެ 9 ހާދިސާއަކާއި، މެޑިކަލް އިވެކުއޭޝަންގެ އެއް ހާދިސާ އަދި އެހެނިހެން ބާވަތުގެ އެއް ހާދިސާ ހިމެނެއެވެ. މި ހާދިސާތަކުގައި ސިފައިން ވަނީ ވަގުތުން އިޖާބަދީ، ހާލަތު ކޮންޓްރޯލް ކުރުމަށް މަސައްކަތް ކޮށްފައެވެ.

ވޭތުވެދިޔަ ހަފުތާގައި (ޖޫން 14އިން ޖޫން 20އަށް) ރާއްޖޭގެ އެކި ސަރަހައްދުތަކުގައި ހިނގި ކުއްލި ނުރައްކާތަކުގެ، 11 ހާދިސާއަކަށް އެމްއެންޑީއެފް ފަޔަރ އެންޑް ރެސްކިއު ސަރވިސް (އެފްއާރްއެސް)އިން ހަރަކާތްތެރިވެ، އެހީތެރިކަން ފޯރުކޮށްދީފައިވޭ. pic.twitter.com/vIXR7dGHVg

— Maldives National Defence Force (@MNDF_Official) June 21, 2026

ސަރަހައްދީ ކޮމާންޑްތަކަށް ބަލާއިރު، އެންމެ ގިނަ ހާދިސާ ރިޕޯޓްކޮށްފައިވަނީ މާލެ އޭރިއާ ކޮމާންޑަށެވެ. އެގޮތުން މާލެ ސަރަހައްދުން 8 ހާދިސާއެއް ރިޕޯޓްކޮށްފައިވާއިރު، ސަދަން އޭރިއާ ކޮމާންޑަށް 3 ހާދިސާއެއް ރިޕޯޓްކޮށްފައިވާ ކަމަށް އެމްއެންޑީއެފްގެ ތަފާސްހިސާބުތަކުން ދައްކައެވެ.

އެމްއެންޑީއެފް އިން އިތުރަށް ބުނެފައިވަނީ، އެކި ބާވަތުގެ ކާރިސާތަކުން ދިވެހި ރައްޔިތުންގެ ފުރާނައާއި މުދާ ސަލާމަތްކޮށްދިނުމަށް އެ މުއައްސަސާއިން 24 ގަޑިއިރު މެދުނުކެޑި މަސައްކަތް ކުރަމުންދާނެ ކަމަށެވެ.