މަސްވެރިކަމާ ދަނޑުވެެރިކަމުގެ ދާއިރާއިން ރައްޔިތުންނަށް ދެވޭ ޚިދުމަތްތައް ފުރިހަމަ ކުރުމަށް މަޝްވަރާކޮށްފި

މަސްވެރިކަމާއި ދަނޑުވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް، ސިވިލް ސަރވިސް ކޮމިޝަނުގެ ރައީސް އަލްއުސްތާޛު މުޙައްމަދު މުޖްތާޒް އާއި އެ ކޮމިޝަނުގެ މެންބަރުންނާ ބައްދަލުކުރައްވައި، ރައްޔިތުންނަށް ފޯރުކޮށްދޭ ޚިދުމަތްތައް ހަރުދަނާކުރުމާ ގުޅޭގޮތުން މުހިންމު މަޝްވަރާތަކެއް ބާއްވަވައިފިއެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެއްވީ މިނިސްޓްރީން ފޯރުކޮށްދޭ ޚިދުމަތްތަކުގެ ފެންވަރު މަތިކުރުމާއި، ރާއްޖޭގެ ސިވިލް ސަރވިސްގެ ނިޒާމު އިތުރަށް ހަރުދަނާކޮށް ތަރައްޤީކުރުމާ ގުޅޭގޮތުންނެވެ. މިގޮތުން، އިދާރީ އޮނިގަނޑުގެ ތެރެއިން ޚިދުމަތްތައް އަވަސްކުރުމަށް ކުރެވިދާނެ ކަންކަމަށް އަލިއަޅުއްވާލެއްވިއެވެ.

މީގެ އިތުރުން، މަސްވެރިކަމާއި ދަނޑުވެރިކަމުގެ ދާއިރާއިން ރައްޔިތުންނަށް ދެވޭ ޚިދުމަތްތައް އިތުރަށް ފުރިހަމަކުރުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން ދެ ފަރާތުގެ މެދުގައި ޚިޔާލު ބަދަލުކުރެވުނެވެ. މި ދާއިރާތަކަކީ ރާއްޖޭގެ އިޤްތިޞާދާ ސީދާ ގުޅުންހުރި ދާއިރާތަކަކަށް ވުމާއެކު، ޚިދުމަތްތަކުގެ ފެންވަރު ހިފެހެއްޓުމުގެ މުހިންމުކަން ވަޒީރު ފާހަގަކުރެއްވިއެވެ.

ވަޒީރު އަޙްމަދު ޝިޔާމް، ސިވިލް ސަރވިސް ކޮމިޝަނުގެ ރައީސް އަލްއުސްތާޛު މުޙައްމަދު މުޖްތާޒްއާއި ކޮމިޝަނުގެ މެންބަރުންނާ ބައްދަލުކުރެއްވުން.

މި ބައްދަލުވުމުގައި މަޝްވަރާކުރެއްވީ މިނިސްޓްރީން ފޯރުކޮށްދޭ ޚިދުމަތްތަކުގެ ފެންވަރު މަތިކުރުމާއި ރާއްޖޭގެ ސިވިލް ސަރވިސްގެ ނިޒާމު އިތުރަށް… pic.twitter.com/EPWJZU64C9

— Min of Fisheries, Agriculture and Ocean Resources (@MFAORmv) June 22, 2026

މި ބައްދަލުވުމުގައި ވުޒާރާގެ މަސައްކަތްތައް ކުރިއަށް ގެންދިއުމުގައި މިހާރު ކުރިމަތިވަމުންދާ ގޮންޖެހުންތަކާއި ދަތިތައް ދެނެގަނެ، އެކަންކަން ޙައްލުކުރުމަށް ކުރެވިދާނެ މަސައްކަތްތަކާ ގުޅޭގޮތުން ވެސް ފުޅާ ދާއިރާއެއްގައި މަޝްވަރާކުރެވުނެވެ. މި ބައްދަލުވުމުގެ ސަބަބުން މިނިސްޓްރީ އާއި ސިވިލް ސަރވިސް ކޮމިޝަނާ ދެމެދު އޮތް ގުޅުން އިތުރަށް ބަދަހިވެ، ޚިދުމަތްތަކަށް ހެޔޮ ބަދަލުތަކެއް އަންނާނެ ކަމަށް ބެލެވެއެވެ.