700އަށް ވުރެ ގިނަ ފަތުރުވެރިންނާއެކު ކްރޫޒްލައިނާއެއް ރާއްޖެ އަތުވެއްޖެ

ގިނަ އަދަދެއްގެ ފަތުރުވެރިންނާއިއެކު ކްރޫޒްލައިނާއެއް ރާއްޖެއަށް އަތުވެއްޖެއެވެ. ނޯވޭގެ ކްރޫޒްލައިނެއް ކަމަށްވާ "އެމްއެސް ވިކިންގ ޔި ޑުން" ރާއްޖެ އައުމުން، އޭގެއިން ދަތުރުކުރި ފަތުރުވެރިން ވަނީ މާލެއަށް ފައިބާފައެވެ.

މި ކްރޫޒްލައިން ރާއްޖެ އައިސްފައިވަނީ ސްރީލަންކާގެ ކޮލަންބޯއިންނެވެ. މީގެ ކުރިން މި ކްރޫޒްލައިނަރ ވަނީ ތައިލެންޑާއި މެލޭޝިޔާގައިވެސް މަޑުކޮށްފައެވެ. މި ދަތުރުގައި ޖުމްލަ 732 ފަތުރުވެރިންނާއި 486 ކްރޫ މެންބަރުން ބައިވެރިވެފައިވާއިރު، މޯލްޑިވްސް އިމިގްރޭޝަނުން މިހާރު ވަނީ އެ ފަރާތްތަކަށް ކްލިއަރެންސް ދީފައެވެ.

މި ކްރޫޒްލައިނުން ރާއްޖެއަށް އައި ފަތުރުވެރިންގެ ތެރޭގައި އެންމެ ގިނައީ ޗައިނާގެ ފަތުރުވެރިންނެވެ. މިއީ ރާއްޖޭގެ ފަތުރުވެރިކަމުގެ މާކެޓުގައި މުހިންމު ދައުރެއް އަދާކުރާ ގައުމެކެވެ.

Seaport officers facilitated immigration en-route clearance for 732 passengers and 486 crew members aboard the MS Viking Yi Dun, which arrived in Malé today from Colombo, Sri Lanka. pic.twitter.com/Bd3YC7wb00

— Maldives Immigration (@ImmigrationMV) June 23, 2026

ރާއްޖެއަކީ އަބަދުވެސް ކްރޫޒްލައިނާތަކުގެ މެދުގައި މަޤްބޫލު މަންޒިލަކަށް ވާއިރު، މިއަހަރުގެ މިހާތަނަށް ރާއްޖެއަށް 10 ކްރޫޒްލައިން ވަނީ އައިސްފައެވެ. މިއީ މިދިޔަ އަހަރާ އަޅާބަލާއިރު އިތުރުވުމެކެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން، އަހަރުގެ މިހާތަނަށް ކްރޫޒްލައިންތަކުން ރާއްޖެއަށް 14,847 ފަތުރުވެރިން ޒިޔާރަތްކޮށްފައިވެއެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 8,263 ފަތުރުވެރިންނެވެ. އެހެންކަމުން މިއީ ފާއިތުވި އަހަރާ އަޅާބަލާއިރު ކްރޫޒްލައިން ފަތުރުވެރިކަމަށް ލިބުނު ބޮޑު ކުރިއެރުމެކެވެ.