ދުންފަތުގެ ޑިއުޓީ ރިވިއުކުރާ އިސްލާހަށް ޣަފޫރު ތާއީދުކުރައްވައިފި

ދުންފަތުގެ ބާވަތްތަކުން ނަގާ ޑިއުޓީ މުރާޖާކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިސްލާހަށް، އިދިކޮޅު އެމްޑީޕީއަށް ނިސްބަތްވާ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ތާއީދުކުރައްވައިފިއެވެ.

މިއަދު ބޭއްވުނު މަޖިލީހުގެ ޖަލްސާގައި، ކޮމަންޑޫ ދާއިރާގެ މެންބަރު މުހައްމަދު އިބްރާހީމް ހުށަހަޅުއްވާފައިވާ ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ޣަފޫރު ވިދާޅުވީ، ދުންފަތުގެ ޑިއުޓީ ބޮޑުކުރި ދުވަހުވެސް ރައްޔިތުންނަށް އުފުލޭވަރުގެ ބުރައެއް ނޫނީ ޖައްސައިގެން ނުވާނެ ކަމަށް ވިދާޅުވެފައިވާނެ ކަމަށެވެ. އަދި މިފަދަ ނިންމުންތައް ނިންމުމުގެ ކުރިން ފުރިހަމަ ދިރާސާއެއް ހެދުމަކީ ކޮންމެހެން މުހިންމު ކަމެއްގެ ގޮތުގައި އޭނާ ފާހަގަކުރެއްވިއެވެ.

"ސިނގިރޭޓް އަގުބޮޑުކުރީ، އެއްވެސް ހާލެއްގައި ސިނގިރޭޓް ބޯތީ އުނދަގޫވެގެނެއް ނޫން،" ބަހުސްގެ ތެރެއިން ޣަފޫރު ވިދާޅުވިއެވެ.

 އޭނާ އިތުރަށް ބަޔާންކުރެއްވި ގޮތުގައި، ދުންފަތުގެ ޑިއުޓީ ކުއްލިއަކަށް ބޮޑުކުރުމުގެ ސަބަބުން ވައްކަމާއި ގަވާއިދާ ހިލާފަށް ތަކެތި އެތެރެކުރުމަށް މަގުފަހިވެފައިވާ ކަމަށެވެ. މީގެ އިތުރުން، ދައުލަތަށް ލިބޭ އާމްދަނީއަށްވެސް މީގެ ނޭދެވޭ އަސަރުކުރަމުންދާ ކަމަށް އޭނާ ވިދާޅުވިއެވެ.

ޣަފޫރުގެ ވާހަކަފުޅުގައި ރާއްޖެއަށް ވޭޕް ކާޓްރިޖުތައް ވަގަށް އެތެރެކުރާ މައްސަލައަށް އަލިއަޅުވާލައްވައި، މިހާރުގެ ސަރުކާރުން ސިނގިރޭޓުގެ އަގު ބޮޑުކޮށްގެން ކޮރަޕްޝަނާއި ވައްކަމަށް ފުރުސަތު ހުޅުވާލާފައިވާ ކަމަށް ތުހުމަތު ކުރެއްވިއެވެ. އޭނާ ވިދާޅުވި ގޮތުގައި ސަރުކާރުން ހުށަހަޅާފައިވާ އިސްލާހަށް ތާއީދުކުރަނީ މިފަދަ ވައްކަންތައް ހުއްޓުވައި، ރައްޔިތުންނަށް ކުރިމަތިވެފައިވާ މާލީ ތަކުލީފުތަކަށް ލުޔެއް ހޯދައިދިނުމަށެވެ.

މި ތުހުމަތުތަކާ ގުޅިގެން، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވަނީ ރިޔާސަތުން ރައްދު ދެއްވާފައެވެ. އަބްދުއްރަހީމް ވިދާޅުވީ، މާޒީގައި ރާއްޖޭގެ ވެރިކަން ކުރި ސަރުކާރުތަކުން ހިންގާފައިވާ ވައްކަންތަކުގެ ސަބަބުން ރައްޔިތުން އެކަމަށް ނޫނެކޭ ބުނެ، 2023 ވަނަ އަހަރު ބޮޑު ބަދަލަކާއެކު ރައީސް ޑރ. މުހައްމަދު މުއިއްޒުގެ ސަރުކާރު ގެނައީ ފުރިހަމަ އިތުބާރާއެކު ކަމަށެވެ.

މަޖިލީހުގެ ރައީސް އިތުރަށް ވިދާޅުވީ، ރިޔާސަތުގައި އިންނަވައިގެން ބަހުސްގައި ބައިވެރިވެވަޑައިނުގެންނެވި ނަމަވެސް، މި ސަރުކާރަކީ ރައްޔިތުންގެ ލާބައާއި، މަންފާއަށް މަސައްކަތްކުރާނެ ސަރުކާރެއް ކަމުގެ ޔަގީންކަން ދެއްވާ ކަމަށެވެ. އަދި ރައްޔިތުން އެދޭ ފަދަ ހެޔޮ ވެރިކަމެއް ގާއިމުކުރުމަށްޓަކައި މަޖިލީހުގެ ތެރެއިން ކުރެވެން ހުރި ހުރިހާ މަސައްކަތެއް ކުރައްވާނެ ކަމަށްވެސް އަބްދުއްރަހީމް ވިދާޅުވިއެވެ.

މި އިސްލާހަކީ ދުންފަތުގެ ބާވަތްތަކުން ނަގާ ޑިއުޓީގެ މިންވަރު އަލުން ބަލައި، އިގްތިސާދީ ގޮތުންނާއި އިޖުތިމާއީ ގޮތުން އަންނަ ބަދަލުތަކަށް ރިއާޔަތްކުރުމަށް ހުށަހެޅިފައިވާ މުހިންމު ބިލެކެވެ.