ރާއްޖޭގެ 13 ސަރަޙައްދެއްގައި ސިފައިންގެ ތަމްރީނު ތަކެއް ކުރިއަށްގެންދަނީ

ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) އިން ކުރިއަށްގެންދާ ޚާއްޞަ އަސްކަރީ ތަމްރީނުތަކެއް ރާއްޖޭގެ 13 ސަރަޙައްދެއްގައި މިއަދު ފަށައިފިއެވެ.

 މި ތަމްރީނުތަކަކީ ސިފައިންގެ ޤާބިލުކަން އިތުރުކުރުމަށްޓަކައި ސިލްސިލާކޮށް ކުރިއަށްގެންދާ ހަރަކާތްތަކުގެ ބައެކެވެ.

އެމްއެންޑީއެފްއިން މަޢުލޫމާތު ދެއްވާފައިވާ ގޮތުގައި، މިއަދުން ފެށިގެން ކުރިއަށް އޮތް ތިން ދުވަހުގެ މުއްދަތަށް މި ތަމްރީނުތައް ކުރިއަށްދާނެއެވެ. މި ހަރަކާތްތަކުގައި ސިފައިން ހަތިޔާރާއެކު ހަރަކާތްތެރިވާނެ ކަމަށްވެސް އެ މުއައްސަސާއިން ވިދާޅުވެފައިވެއެވެ.

ތަމްރީނުތައް ކުރިއަށްދާ ސަރަޙައްދުތައް
މި އަސްކަރީ ތަމްރީނުތައް ކުރިއަށް ގެންދިއުމަށް ހަމަޖެހިފައިވާ 13 ސަރަޙައްދަކީ: ބަރެސްދޫ، ފޮނަދޫ، ކައްދޫ، މާންދޫ، ގަން (މުކުރިމަގު، މަތިމަރަދޫ، ތުނޑި)، މުންޑޫ، މާބައިދޫ، ބޮކެފުށި، ކަޅައިދޫ، އުވަދެވިފުށި، މަހާކަންފުށި، ގަސްފިނޮޅު އަދި ބޮޑުފިނޮޅު އެވެ.

މި ތަމްރީނުތަކުގައި ބޭނުންކުރުމަށް ހަމަޖެހިފައިވަނީ "ބްލޭންކްސް" އަދި "ޕައިރޯޓެކްނިކްސް" އެވެ. އެމްއެންޑީއެފްއިން ޔަޤީންކަން ދެއްވާފައިވާ ގޮތުގައި މި ތަމްރީނުތައް ކުރިއަށްދާނީ އެއްވެސް މީހަކަށް ނުވަތަ ތަނަކަށް ގެއްލުން ނުވާނެ ފަދަ ގޮތަކަށެވެ.

އަހަރުގެ އެކި ދުވަސްވަރު ރާއްޖޭގެ އެކި ސަރަޙައްދުތަކުގައި އެމްއެންޑީއެފްއިން އެއްގަމާއި ކަނޑުގެ ތަމްރީނުތައް ކުރިއަށް ގެންދެއެވެ. މިއީ ދިވެހި ސިފައިންގެ ލަޝްކަރު ވަރުގަދަކޮށް، ތައްޔާރީ ހާލަތުގައި ބޭތިއްބުމަށްޓަކައި މާލެއާއި އަތޮޅުތަކުގައި ހިންގޭ މުހިންމު ހަރަކާތްތަކެކެވެ.

ރާއްޖޭގައި ހިންގާ މިފަދަ ތަމްރީނުތަކުގެ އިތުރުން، ދިވެހި ސިފައިންގެ ހުނަރާއި ޤާބިލުކަން އިތުރުކުރުމަށްޓަކައި ރާއްޖޭން ބޭރުގެ އެކި ޤައުމުތަކަށް ފޮނުވައިގެންވެސް ތަފާތު އެކި ތަމްރީނު ޕްރޮގްރާމްތައް އެމްއެންޑީއެފްއިން އަންނަނީ ފުރިހަމަކުރަމުންނެވެ.