ބާރަށު ކުނި ގޮނޑު ރަށުން ބޭރުކުރުމުގެ މަސައްކަތް ފަށައިފި

ހއ. ބާރަށުގައި ޒަމާނުއްސުރެ ޖަމާވެފައިވާ ބޮޑު ކުނިގޮނޑު ރަށުން ބޭރުކުރުމުގެ އަމަލީ މަސައްކަތް މިއަދު ފަށައިފިއެވެ. މިއީ އެ ރަށަށް ދިމާވެފައިވާ ކުނި މެނޭޖުކުރުމުގެ ބޮޑު މައްސަލައަށް ދާއިމީ ހައްލެއް ހޯދުމަށް ކުރިއަށްގެންދާ މުހިންމު މަސައްކަތެކެވެ.

ބާރަށު ދާއިރާގެ މެންބަރު އިބްރާހިމް ޝުޖާޢު އެކްސްގައި ކުރެއްވި ޕޯސްޓެއްގައި ވިދާޅުވީ، 5 ވަނަ ދައުރުގެ ޕީއެންސީ ކައުންސިލާ ހަވާލުވިއިރު އޮތް އެންމެ ބޮޑު ގޮންޖެހުމަކީ ރަށުން ކުނި ބޭރުނުކޮށް ކުނި މެނޭޖުކުރުން ކަމަށެވެ. މި މައްސަލަ ހައްލުކުރުމަށްޓަކައި ސަރުކާރުން ރަށުގައި ހިންގާ މަޝްރޫޢުތަކުގެ ތެރެއިން އެހީތެރިކަން ހޯދުމަށް ކައުންސިލުން ވަނީ ސަރުކާރުގައި އެދިފައެވެ.

ކައުންސިލްގެ އެދުމުގެ މަތިން ސަރުކާރުން ވަނީ މިކަމަށް އިޖާބަދީ، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ އެހީތެރިކަމާއެކު ކުނި ބޭރުކުރުމުގެ މަސައްކަތް ފަށާފައެވެ. މި މަސައްކަތުގެ ދަށުން ރަށުގައި ހުރި ޒަމާންވީ ކުނިތައް އެއްކޮށް ރަށުން ބޭރުކުރެވިގެންދާނެއެވެ.

ހއ.ބާރަށަކީ ކުނި މެނޭޖުކުރުމަށް ބޮޑު ގޮންޖެހުމެއް ކުރިމަތިވެފައި އޮތް ރަށެއް.5 ވަނަ ދައުރުގެ PNC ކައުންސިލަށް ކުނި މެނޭޖުކުރުމަށް އޮތް އެންމެ ބޮޑު ގޮންޖެހުމަކަށް ވެފައި އޮތީ ރަށުގައި ޒަމާނުއްސުރެ ޖަމާކުރެވިފައިވާ ބޮޑު ކުނިގޮނޑުގެ މައްސަލަ.ރަށުން ކުނި ބޭރު ނުކޮށް ކުނި މެނޭޖު… pic.twitter.com/Cjjg5mWHBG

— Ibrahim Shujau (@IbrahimShujaau) June 29, 2026

މި މަސައްކަތާ ގުޅޭގޮތުން މެންބަރު ޝުޖާޢު ވިދާޅުވީ، "މިކަމުގައި އާރްޑީސީގެ މެނޭޖިންގ ޑިރެކްޓަރ އިބްރާހީމް ނަޒީމާއި ވެމްކޯގެ މެނޭޖިންގ ޑިރެކްޓަރ މުޖުތަބާ ޖަލީލް ދެއްވި އެއްބާރުލެއްވުމަށް ރަށުގެ ރައްޔިތުންނާއި ކައުންސިލްގެ ނަމުގައި ޝުކުރު ދަންނަވަން" ކަމަށެވެ.

ބާރަށަކީ ކުނި މެނޭޖުކުރުމުގައި ގިނަ ދަތިތަކެއް ކުރިމަތިވެފައިވާ ރަށަކަށްވާއިރު، މި ފެށުނު މަސައްކަތާއެކު ރަށުގެ ތިމާވެށީގެ ހާލަތު ރަނގަޅުވެ، ރައްޔިތުންނަށް ދިމާވެފައިވާ ތަކުލީފުތަކަށް ނިމުމެއް އަންނާނެ ކަމަށް ބެލެވެއެވެ.