ހާލަންޑުގެ ދެ ގޯލުން ބްރެޒިލް ކަޓުވާލައި، ނޯވޭ ފުރަތަމަ ފަހަރަށް ކުއާޓާ ފައިނަލަށް

ނިއު ޖާޒީގައި ކުޅުނު ނޮކްއައުޓް ދެވަނަ ބުރުގެ މެޗުގައި އާލިން ހާލަންޑް ކާމިޔާބުކޮށްދިން ދެ ލަނޑާއެކު، ފަސް ފަހަރުގެ ޗެމްޕިއަން ބްރެޒިލް ބަލިކޮށް ނޯވޭއިން ފުރަތަމަ ފަހަރަށް ވޯލްޑް ކަޕްގެ ކުއާޓާ ފައިނަލުން ޖާގަ ހޯދައިފިއެވެ.

މި މެޗުގެ ފުރަތަމަ ހާފުގައި ބްރެޒިލަށް ލީޑު ނެގުމަށް ރަނުގެ ފުރުސަތެއް ލިބުނެވެ. ނޯވޭގެ ކްރިސްޓޮފާ އަޔާ، ބްރެޒިލްގެ މެތިއުސް ކޫންޔާއަށް ކުރި ފައުލަކަށް ރެފްރީ ދިން ޕެނަލްޓީ، ބްރޫނޯ ގިމަރޭޒް ފޮނުވާލުމުން ނޯވޭގެ ގޯލްކީޕަރު އޯޔަން ނީލަންޑް ވަނީ ދިފާއުކޮށްފައެވެ. ނީލަންޑް ވަނީ މި މެޗުގައި ބްރެޒިލްގެ ވިނީޝަސް ޖޫނިއާ ފޮނުވާލި ނުރައްކާތެރި ހަމަލާއެއްވެސް ހުއްޓުވާފައެވެ.

މުޅި މެޗުގައި ފެނިގެންދިޔައީ އިނގިރޭސި ޕްރިމިއާ ލީގުގައިވެސް ވާދަވެރިކޮށް ފެންނަ ހާލަންޑާއި ބްރެޒިލްގެ ޑިފެންޑަރު ގަބްރިއަލް މަގަލޭސްގެ ކުރިމަތިލުންތަކެވެ. މެޗުގެ 79 ވަނަ މިނެޓުގައި އެންޑްރިއަސް ޝްޖެލްޑަރަޕް ނެގި ހުރަހެއް ބޮލުން ޖަހައި ގޯލުގެ ތެރެއަށް ފޮނުވާލައިގެން ނޯވޭއަށް ލީޑު ހޯދައިދިނީ ހާލަންޑެވެ. އަދި މެޗުގެ 90 ވަނަ މިނެޓުގައި އޭރިއާ ބޭރުން ފޮނުވާލި ބާރު ހަމަލާއަކުން ހާލަންޑް ވަނީ ނޯވޭގެ ދެވަނަ ލަނޑު ކާމިޔާބުކޮށްދީ މެޗުގެ ނަތީޖާ ކަށަވަރުކޮށްފައެވެ.

މެޗުގެ ފަހު ސިކުންތުކޮޅުގެ ތެރޭގައި ބްރެޒިލަށް ދިން ދެވަނަ ޕެނަލްޓީއަކުން ނޭމާ ލަނޑެއް ކާމިޔާބުކުރި ނަމަވެސް، އެއީ ބްރެޒިލަށް މެޗުގެ ނަތީޖާ ބަދަލުކުރަން ލިބުނު ފުރުސަތަކަށް ނުވިއެވެ. މިއީ 1990 ވަނަ އަހަރުގެ ފަހުން ވޯލްޑް ކަޕްގެ ކުއާޓާ ފައިނަލަށް ނުގޮސް ބްރެޒިލް މުބާރާތުން ކެޓި ފުރަތަމަ ފަހަރެވެ.

ކާލޯ އެންޗެލޮޓީގެ އިރުޝާދުގެ ދަށުން ކުޅުނު މި މެޗުގައި ބްރެޒިލަށް ގިނަ ފުރުސަތުތަކެއް ލިބުނު ނަމަވެސް، އޭގެ ބޭނުން އެދެވޭ ގޮތެއްގައި ހިފިފައެއް ނުވެއެވެ. މި ނަތީޖާއާއެކު އެންޗެލޮޓީގެ މުސްތަގުބަލާ މެދު މިހާރު ވަނީ ސުވާލު އުފެދިފައެވެ. އަދި މި މުބާރާތުގައި ހަތަރު މެޗުން ހަތް ގޯލު ޖަހައިގެން ހާލަންޑް ވަނީ ރަން ބޫޓުގެ ރޭހުގައި ކީލިއަން އެމްބައްޕޭ އާއި ލިއޮނެލް މެސީއާ ހަމަކޮށްފައެވެ.