ހުޅުމާލޭގެ ހޭޅިފަށުގައި ގިނަ އަދަދެއްގެ ގަސް އިންދައިފި

ހުޅުމާލެ ދެވަނަ ފިޔަވަހީގެ ގޮނޑުދޮށުގައި ބުލެވާޑް ހެދުމުގެ ފުރަތަމަ މަރުހަލާގެ ދަށުން، ރާއްޖޭގެ މާހައުލާ ގުޅޭ އެތައް ސަތޭކަ ގަހެއް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންދައިފިއެވެ. މި މަސައްކަތުގެ ތެރެއިން އިންދާފައިވަނީ ރާއްޖޭގެ ގޮނޑުދޮށްތަކުން އާންމުކޮށް ފެންނަ ދިވެހި ގަސްތަކެވެ.

އެޗްޑީސީގެ ޗީފް އޮޕަރޭޝަނަލް އޮފިސަރު (ސީއޯއޯ) އަހުމަދު އިބްރާހިމް ސޯޝަލް މީޑިއާގައި ވިދާޅުވި ގޮތުގައި، މި ސަރަހައްދުގައި އިންދި ގަސްތަކުގެ ތެރޭގައި ދިއްގާ، ފުނަ، ކާނި، ހިރުނދު، މިދިލި އަދި ކިނބި ހިމެނެއެވެ. އޭނާ ވިދާޅުވީ މިއީ ތިމާވެށީގެ ބައެއް ކަމުގައިވާ، އަދި ކޮންމެ ދުވަހަކުހެން ވަރަށް ބޮޑަށް ބޭނުންވާ ހިޔަލާއި ފެހިކަން ގެނެސްދޭނެ ބާވަތްތައް ކަމަށެވެ.

އަހުމަދު އިބްރާހިމް ފާހަގަކުރެއްވި ގޮތުގައި މި ގަސްތަކަކީ މީގެ 13 އަހަރު ކުރިން، އެ ބިން ފުރަތަމަ ހިއްކިއިރު ވެސް އިންދަން ޖެހޭ ގަސްތަކެކެވެ. ކުރިއަށް އޮތް ތަނުގައި ވެސް ހުޅުމާލެ ދެވަނަ ފިޔަވަހި ތަރައްގީ ކުރުމަށްޓަކައި ގިނަ ވަގުތު ހޭދަކުރައްވާނެ ކަމަށް އޭނާ ވިދާޅުވިއެވެ.

"މުޅި ސަރަހައްދުގައި މީހުން ދިރިއުޅޭ ޓަވަރުތައް އުފުލެމުންދާ ހިނދު، މި ޕާކްތަކާއި ގޮނޑުދޮށުގެ ސަރަޙައްދުތައް ވެގެންދާނީ ރައްޔިތުންނަށް ނޭވާލައި ހަމަޖެހިލައި ހިންދެމިލައި، އާއިލާ އާއި ރައްޓެހިންނާއެކު ވަގުތު ހޭދަކޮށް، ތޮއްޖެހިފައިވާ ޝަހަރެއްގައި ދިރިއުޅުމުގެ ނަފްސާނީ ބުރައިން އަރާމުކޮށްލެވޭ ތަންތަނަށް،" އަހުމަދު ވިދާޅުވިއެވެ.

މި ހަރަކާތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެއް ކަމަށްވާ ރާއްޖޭގައި ފަސް މިލިއަން ގަސް އިންދުމުގެ ޕްރޮގްރާމްގެ ބައެކެވެ. މި ޕްރޮގްރާމްގެ ދަށުން އެޗްޑީސީން އެކަނި ވެސް އެއް މިލިއަން ގަސް އިންދަން ނިންމާފައިވާއިރު، އެ ކުންފުނިން މިހާތަނަށް ވަނީ އެއް ލައްކައަށް ވުރެ ގިނަ ގަސް އިންދާފައެވެ.