ހިޔާގެ އައު ލިފްޓްތަކާއެކު ކޮންމެ ރައްޔިތެއްގެ ހަޔާތުން 61 ގަޑިއިރު ސަލާމަތްވެއްޖެ: އިބްރާހިމް މުޙައްމަދު

ހުޅުމާލޭ ހިޔާ ޓަވަރުތަކުގައި އަލަށް ހަރުކުރި ލިފްޓްތަކުގެ ސަބަބުން އެ ތަނުގައި ދިރިއުޅޭ ކޮންމެ ރައްޔިތެއްގެ ހަޔާތުން ދެ ދުވަހާ ގާތްކުރާ މިންވަރަށް ވަގުތު ސަލާމަތްވެގެންދާނެ ކަމަށް ރައްޔިތުންގެ މަޖިލީހުގެ މެމްބަރު އިބްރާހިމް މުޙައްމަދު ވިދާޅުވެއްޖެއެވެ.

މެމްބަރު އިބްރާހިމް މުޙައްމަދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވިސްނުންފުޅާ އެއްގޮތަށް ހިޔާ ޓަވަރުތަކުގައި ހަރުކުރެވުނު އައު ލިފްޓްތަކުގެ ސަބަބުން، އެ ސަރަހައްދުގައި ދިރިއުޅޭ ކޮންމެ ރައްޔިތަކަށް އެ މީހެއްގެ ހަޔާތުން 2 ދުވަސް އިތުރުވެގެން ގޮސްފައިވާ ކަމަށެވެ. މިއީ ގާތްގަނޑަކަށް 3650 މިނެޓް ނުވަތަ 61 ގަޑިއިރު ކަމަށް އޭނާ ފާހަގަކުރެއްވިއެވެ.

މި ބަދަލަކީ ހިޔާ ފްލެޓްތަކުގައި ދިރިއުޅޭ ރައްޔިތުން ލިފްޓަށް އެރުމަށްޓަކައި ކިޔޫގައި ހޭދަކުރަންޖެހޭ ވަގުތަށް އައި ބޮޑު ލުޔެއްކަން ފާހަގަކުރައްވަމުން، މިއީ ރައްޔިތުންގެ ދިރިއުޅުމަށް ލިބުނު ވަރަށް ބޮޑު ކުރިއެރުމެއްގެ ގޮތުގައި މެމްބަރު ވަނީ ސިފަކުރައްވާފައެވެ.

ހިޔާ ޓަވަރުގައި ރައީސްގެ ވިސްނުންފުޅާ އެއްގޮތައް ހަރުކުރެވިގެން ދިޔަ އައު ލިފްޓްކުގެ ސަބަބުން ދިރިއުޅޭ ކޮންމެ ރަށްޔިތަކަށް 2 ދުވަސް ޙަޔާތައް އެ އިތުރުވެގެން ދިޔައީ . އެއީ ގާތްގަނޑަކަށް 3650 މިނެޓް ގާތްގަނޑަކަށް 61 އެއް ގަޑިއިރު ސަލާމަތްވީ#Dhivehingeraajje #progress

— Ibrahim Muhammad (@ibrahimjanab) July 7, 2026

ހިޔާގެ 16 ޓަވަރުގައި ޖުމްލަ 32 ލިފްޓް ހަރުކުރުމުގެ މަޝްރޫއު ނިންމައި ރަސްމީކޮށް އިފްތިތާހުކުރީ ރޭ ބޭއްވި ހާއްސަ ރަސްމިއްޔާތެއްގައެވެ. މި މަޝްރޫއަކީ ރައީސް ޑރ. މުއިއްޒުގެ ރިޔާސީ ވައުދުފުޅުތަކުގެ ތެރެއިން، ހިޔާގެ ރައްޔިތުންނަށް ދިމާވެފައިވާ އެންމެ ބޮޑު އެއް ތަކުލީފަށް ހައްލު ހޯދައިދިނުމަށް ކުރިއަށްގެންދިޔަ މަޝްރޫއެކެވެ.

ޗައިނާގެ ކުންފުންޏަކާ ހަވާލުކޮށްގެން 18 މިލިއަން ޑޮލަރު ހޭދަކޮށްގެން ކުރިއަށްގެންދިޔަ މި މަޝްރޫއުގެ ދަށުން ހަރުކުރި ލިފްޓްތަކަކީ ސްޓެޗަރު އެރުވޭ ގޮތަށް ފަރުމާކޮށްފައިވާ، ޖާގަ ތަނަވަސް ލިފްޓްތަކެކެވެ. މީގެ ސަބަބުން ހިޔާ ސަރަހައްދުގައި ދިރިއުޅޭ ރައްޔިތުންނަށް ދަތުރުފަތުރުގެ ފަސޭހަކަން ލިބި، ވަގުތު ސަލާމަތްކުރުމަށް ބޮޑު އެހީތެރިކަމެއް ލިބިގެންދާނެއެވެ.