ލިޔުންތެރިންނަކީ ގައުމުގެ ކުރިއެރުމުގައި ވަރަށް މުހިންމު ދައުރެއް އަދާކުރާ ބައެއް: ޝާކިރު

ލިޔުންތެރިންނަކީ މުޖުތަމައުގެ ހޭލުންތެރިކަމާއި ގައުމުގެ ކުރިއެރުމުގައި ވަރަށް މުހިންމު ދައުރެއް އަދާކުރާ ބައެއްކަމަށް ދިވެހި ބަހުގެ އެކަޑަމީގެ ރައީސް ޙަސަން ޝާކިރު މުޙައްމަދު ވިދާޅުވެއްޖެއެވެ. 

މިއަދު ފާހަގަކުރަމުންދާ ލިޔުންތެރިންގެ ދުވަހުގެ މުނާސަބަތުގައި، ދިވެހިބަހުގެ އެކެޑަމީގެ ރައީސް ޝާކިރު ވިދާޅުވީ ރާއްޖޭގެ ހުރިހާ ލިޔުންތެރިންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވައިފިއެވެ. މި މުނާސަބަތުގައި ދެއްވި ޚިތާބުގައި ލިޔުންތެރިން ގައުމަށް ކޮށްދެއްވާ އަގުހުރި ޚިދުމަތްތަކުގެ މައްޗަށް އެކެޑަމީގެ ރައީސް ވަނީ އަލިއަޅުއްވާލައްވާފައެވެ.

އެކެޑަމީގެ ރައީސްގެ ޚިތާބުގައި ވިދާޅުވީ، ލިޔުންތެރިންނަކީ މުޖުތަމައުގެ ހޭލުންތެރިކަމާއި ގައުމުގެ ކުރިއެރުމުގައި ވަރަށް މުހިންމު ދައުރެއް އަދާކުރާ ބައެއް ކަމަށެވެ. ވަކިން ހާއްސަކޮށް، ދިވެހި އަދަބިއްޔާތާއި ބަސް ކުރިއެރުވުމަށް ލިޔުންތެރިން ކުރައްވާ މަސައްކަތްތަކަކީ ފާހަގަކުރަންޖެހޭ ފަދަ އިޚުލާސްތެރި މަސައްކަތްތަކެއްކަން އެމަނިކުފާނު ފާހަގަކުރެއްވިއެވެ.

ލިޔުންތެރިކަމުގެ އަމާނާތްތެރިކަމާ ގުޅޭގޮތުން ވާހަކަދައްކަވަމުން "ލިޔުންތެރިއަކަށް އޮތް އެންމެ ބޮޑު ޒިންމާއަކީ ތެދުވެރިކަމާއި އަމާނާތްތެރިކަމާއެކު ގަލަން ހިއްޕެވުން" ކަމަށް އެކެޑަމީގެ ރައީސް ވިދާޅުވިއެވެ. ކޮންމެ ޒަމާނެއްގައި ވެސް ލިޔުންތެރިން ލިޔާ ލިޔުންތަކަކީ މުޖުތަމައަށް އޭގެ އަސަރު ފޯރާނެ އެއްޗެއްކަމުން، ގައުމީ މަސްލަހަތަށް އިސްކަންދިނުމަށް އެމަނިކުފާނު އިލްތިމާސްކުރެއްވިއެވެ.

މީގެ އިތުރުން، އާ ޖީލުގެ ލިޔުންތެރިން މި ދާއިރާއަށް ނުކުމެ، ފަންނީ ހުނަރުވެރިކަމާއެކު ދިވެހިބަހުން ލިޔުންތެރިކަން ކުރިއެރުވުމަށް މަސައްކަތް ކުރުމަކީ މިއަދު ކުރަންޖެހިފައިވާ މުހިންމު ވާޖިބެއްކަމުގައި ވެސް ޚިތާބުގައި ފާހަގަކުރައްވާފައިވެއެވެ. ލިޔުންތެރިންގެ ހީވާގި މަސައްކަތުން ގައުމުގެ މުސްތަގުބަލު ބައްޓަންކުރުމުގައި ބޮޑު އެހީތެރިކަމެއް ލިބިގެންދާނެ ކަމަށް ވެސް ވިދާޅުވިއެވެ.

ޚިތާބު ނިންމަވާލައްވަމުން، ރާއްޖޭގެ ހުރިހާ ލިޔުންތެރިންނަށް ފާގަތި އަދި ކާމިޔާބު މުސްތަގުބަލަކަށް އެދިވަޑައިގެން، ދިވެހި އަދަބިއްޔާތަށް ލިބެމުންދާ ކުރިއެރުމުގައި ލިޔުންތެރިންގެ ހިއްސާ ދެމެހެއްޓެވުމަށް އެދިވަޑައިގަތެވެ.