ކެންސަރު ނޫން ބަލިތަކަށް ރާއްޖެއިން ބޭރަށް ފޮނުވާ މީހުންގެ އަދަދު މަދުކުރެވިއްޖެ

ރާއްޖޭގެ ސިއްޙީ ނިޒާމަށް ގެނެވެމުންދާ ބަދަލުތަކާއެކު، ބޮޑެތި ބަލިތަކަށް ފަރުވާ ހޯދުމަށް ރާއްޖެއިން ބޭރަށް ފޮނުވަންޖެހޭ މީހުންގެ އަދަދު ވަރަށް ބޮޑަށް މަދުކުރެވިފައިވާ ކަމަށް ސިއްޙަތާ ބެހޭ ވަޒީރު ގީލާ އަލީ ވިދާޅުވެއްޖެއެވެ.

ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، 2023 އިން 2025 އަށް އޮތް ތިން އަހަރުގެ މުއްދަތުގެ ތެރޭގައި، ކެންސަރު ނޫން އެހެނިހެން ބަލިތަކަށް ފަރުވާ ހޯދުމަށް ރާއްޖެއިން ބޭރަށް ފޮނުވަންޖެހުނު މީހުންގެ އަދަދުން 821 މީހުން މަދުކުރެވިފައިވާ ކަމަށެވެ. މިއީ ރާއްޖޭގައި ސިއްޙީ ޚިދުމަތްތައް ފުޅާކޮށް، ގިނަ ފަރުވާތަކެއް ރާއްޖެއިން ލިބޭނެ އިންތިޒާމު ހަމަޖެހުމުން އައި ބަދަލެއްކަން ވަޒީރު ފާހަގަކުރެއްވިއެވެ.

ނަމަވެސް، އެހެން ބަލިތަކަށް ފޮނުވާ މީހުން މަދުވި ނަމަވެސް، ކެންސަރު ބަލީގެ ފަރުވާއަށް ބޭރަށް ފޮނުވާ އަދަދު އިތުރުވަމުންދާކަން ވަޒީރު ފާހަގަކުރެއްވިއެވެ. ތަފާސްހިސާބުތަކުން ދައްކާ ގޮތުގައި 2023 އިން 2025 އަށް ޖުމްލަ 483 މީހުން ވަނީ ކެންސަރުގެ ފަރުވާއަށް ރާއްޖެއިން ބޭރަށް ފޮނުވާފައެވެ. އަދި ކެންސަރާ ގުޅޭ އެކި ޓެސްޓުތައް ހެދުމަށް ބޭރަށް ފޮނުވި މީހުންގެ އަދަދު އަހަރަކަށްވުރެ އަހަރެއް އިތުރުވަމުންދާކަން ވަޒީރު ހާމަކުރެއްވިއެވެ. އެގޮތުން 2023 ވަނަ އަހަރު 1,638 މީހުން ފޮނުވިއިރު، 2025 ވަނަ އަހަރު އެ އަދަދު 2,000 އަށްވުރެ މައްޗަށް އަރާފައިވެއެވެ.

ވަޒީރު ވިދާޅުވީ ސަރުކާރުގެ މިހާރުގެ އެންމެ ބޮޑު އަމާޒަކީ ކެންސަރުގެ ފަރުވާ ރާއްޖޭގައި ހަރުދަނާކުރުން ކަމަށެވެ. މިހާރުވެސް ކީމޯތެރަޕީގެ ޚިދުމަތް ރާއްޖެއިން ފުޅާދާއިރާއެއްގައި ލިބެމުންދާކަން ފާހަގަކުރައްވަމުން ވަޒީރު ވިދާޅުވީ، މިދިޔަ އަހަރު ކީމޯ ހޯދި 655 މީހުންގެ ތެރެއިން ބޭރަށް ދާންޖެހުނީ އެންމެ 39 މީހުންނަށް ކަމަށެވެ. މީގެ އިތުރުން، އުރަމަތީގެ ކެންސަރު ދެނެގަތުމަށް ހަދާ މެމޯގްރާމްގެ ޚިދުމަތް ރާއްޖޭގެ އެކި ސަރަޙައްދުތަކުގައި ޤާއިމުކޮށް، މިހާތަނަށް 750 މީހުން ރާއްޖޭގައި ތިބެގެން މި ޓެސްޓު ހަދާފައިވާކަމަށް ވަޒީރު ވިދާޅުވިއެވެ.

"ސަރުކާރުން މިކުރާ މަސައްކަތަކީ ހަމައެކަނި ފައިސާ ޚަރަދުކުރުމެއް ނޫން. މިއީ ދުޅަހެޔޮ އާބާދީއެއް ބިނާކުރުމަށް ކުރާ އިންވެސްޓްމަންޓެއް،" ވަޒީރު ވިދާޅުވިއެވެ.

ސަރުކާރުން މިހާރު ދަނީ ރާއްޖޭގައި ކެންސަރު ހޮސްޕިޓަލެއް ބިނާކޮށް، ޕެޓް ސްކޭނާއި ރޭޑިއޭޝަން ފަރުވާ ފަދަ ޒަމާނީ ޚިދުމަތްތައް ރާއްޖޭގައި ފެށުމަށް ތައްޔާރުވަމުންނެވެ. މި މަޝްރޫޢު ނިމުމުން، ކެންސަރު ބަލީގެ ފަރުވާއަށް ރާއްޖެއިން ބޭރަށް ކުރަންޖެހޭ ބޮޑު ހޭދައަށް ދާއިމީ ޙައްލެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.