ދުނިޔޭގެ ވޮލީބޯޅަ ދުވަސް ކުލަގަދަކޮށް ވީއޭއެމްއިން ފާހަގަކޮށްފި

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ދުނިޔޭގެ ވޮލީބޯޅަ ދުވަސް ކުލަގަދަކޮށް ފާހަގަކޮށްފިއެވެ. 

ރާއްޖޭގެ ވޮލީބޯޅައިގެ އާ ޖީލެއް ބިނާކުރުމަށް ހިތްވަރު ދިނުމުގެ މަގުސަދުގައި މި ކަމަށްޓަކައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރ އަބްދުލްރައްޒާގު އިބްރާހީމެވެ. 

މި އިވެންޓުގައި ވޮލީބޯލް އެކަޑަމީތައް ކަމަށްވާ ބްލޫސް ފޯ ވޮލީބޯލް، މުނީޒް ވޮލީބޯލް މޫވްމަންޓް، އުބޭ އެކަޑަމީ، އަދި ކަނބަލުން ސްޕޯޓްސް އެކަޑަމީގެ ޒުވާން އެތުލީޓުން ބައިވެރިވެފައިވާއިރު، ރާއްޖޭގެ ވޮލީބޯޅައިގެ ލެޖެންޑުން ވެސް މި ހަރަކާތުގައި ވަނީ ބައިވެރިވެފައެވެ. އަދި  ރާއްޖޭގެ ސީނިއާ ގައުމީ ވޮލީބޯޅަ ޓީމުގެ ފިރިހެން އަދި އަންހެން ކުޅުންތެރިން ވެސް މި ހަރަކާތުން ފެނިގެންދިޔައެވެ.

Minister of State for Youth Empowerment, Sports and Fitness Abdul Razak Ibrahim attended the World Volleyball Day celebration event organised by Volleyball Association of Maldives.
Young athletes from Blues for Volleyball, Muneez Volleyball Movement, Ubey Academy, and Kanbalun… pic.twitter.com/nEUOmxsTf6

— Ministry of Youth Empowerment, Sports and Fitness (@MoYSF_mv) July 8, 2026

މި ދުވަހުގެ އުފާ ފާޅުކުރުމުގެ ގޮތުން ހާއްސަ ކޭކެއް ފަޅުމުގެ ރަސްމިއްޔާތެއް ވެސް ކުރިއަށް ގޮސްފައިވާއިރު، ވީއޭއެމްއިން ވަނީ  މި ހަރަކާތް ކާމިޔާބުކަމާއެކު ކުރިއަށް ގެންދިއުމުގައި އެހީތެރިވެދެއްވި ހުރިހާ ކުޅުންތެރިންނާއި، ކޯޗުންނާއި، ވޮލަންޓިއަރުން އަދި ސަޕޯޓަރުންނަށް ޝުކުރު އަދާކުރައްވާފައެވެ. 

ވޮލީއަކީ ދިވެހީންގެ މެދުގައި އެންމެ މަޤްބޫލް އެއް ކުޅިވަރަށްވާއިރު، ވޮލީގެ ކަންކަން ބެލެހެއްޓުމަށް ވީއޭއެމް ރާއްޖޭގައި އުފައްދާފައިވަނީ 1984 ވަނަ އަހަރުއެވެ.