ދައުލަތުގެ މުވައްޒަފުންގެ މުސާރައަށް 3.7 ބިލިއަން ރުފިޔާ ސަރުކާރުން ހޭދަކޮށްފި

މިއަހަރުގެ މިހާތަނަށް ދައުލަތުގެ މުވައްޒަފުންގެ މުސާރައާއި އުޖޫރަ ދިނުމަށްޓަކައި 3.7 ބިލިއަން ރުފިޔާ ހޭދަކޮށްފައިވާކަން މާލީކަންކަމާއި ސަރުކާރު ކުންފުނިތަކާ ބެހޭ ވުޒާރާގެ ތަފާސްހިސާބުތަކުން ހާމަވެއްޖެއެވެ.

މާލީ ވުޒާރާއިން އެންމެ ފަހުން އާންމުކުރި "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، މިއީ މިދިޔަ އަހަރުގެ މި މުއްދަތާ އަޅާބަލާއިރު 13.9 އިންސައްތައިގެ އިތުރުވުމެކެވެ. މިދިޔަ އަހަރުގެ މި މުއްދަތުގައި މުސާރައާއި އުޖޫރައަށް ހޭދަކޮށްފައިވަނީ 3.2 ބިލިއަން ރުފިޔާއެވެ. މުސާރައިގެ އިތުރުން، ޕެންޝަނާއި އެހެނިހެން އިނާޔަތްތައް ހިމެނޭހެން މުވައްޒަފުންނަށް ކުރި ޖުމްލަ ހޭދަ މިހާރު ވަނީ 8.0 ބިލިއަން ރުފިޔާއަށް އަރާފައެވެ.

މިއަހަރުގެ މިހާތަނަށް ދައުލަތުގެ ޖުމްލަ ހަރަދު ވަނީ 23.4 ބިލިއަން ރުފިޔާއަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ހަރަދުވި 19.2 ބިލިއަން ރުފިޔާއާ އަޅާބަލާއިރު 21.7 އިންސައްތަ އިތުރު އަދަދެކެވެ. ހަރަދުތައް މިހާ ބޮޑަށް އުފުލިގެން ދިޔަ މައިގަނޑު ސަބަބުތަކުގެ ތެރޭގައި މުސާރައިގެ އިތުރުން، ދުނިޔޭގެ ބާޒާރުގައި ތެލާއި މުދަލުގެ އަގު އުފުލުމާ ގުޅިގެން ސަބްސިޑީއަށް ކުރަންޖެހުނު ހޭދަ ބޮޑުވުން ހިމެނެއެވެ.

ހާއްސަކޮށް މެދުއިރުމަތީގެ ހަމަނުޖެހުންތަކާ ގުޅިގެން ބައިނަލްއަގުވާމީ ބާޒާރުގައި ތަކެތީގެ އަގު އުފުލުނު ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަނީ ރައްޔިތުންނަށް ފޯރުކޮށްދޭ އަސާސީ ހިދުމަތްތަކާއި ތަކެތީގެ އަގު ހިފެހެއްޓުމަށް ބޮޑު އިސްކަމެއް ދީފައެވެ. އެގޮތުން، ސަބްސިޑީގެ ގޮތުގައި ކުރި ހަރަދު ވަނީ މިދިޔަ އަހަރަށްވުރެ 1.4 ބިލިއަން ރުފިޔާ އިތުރުވެފައެވެ.

މާލީ ވުޒާރާގެ ތަފާސްހިސާބުތަކުން ދައްކާގޮތުގައި، ދައުލަތުގެ ރިކަރަންޓް އެކްސްޕެންޑިޗާ ނުވަތަ ހިނގަމުންދާ ހަރަދު މިހާރު ހުރީ 20.3 ބިލިއަން ރުފިޔާގައެވެ. އަދި އުމްރާނީ ތަރައްގީގެ މަޝްރޫއުތަކަށް ކުރާ ކެޕިޓަލް ހަރަދު ވަނީ 3.0 ބިލިއަން ރުފިޔާއަށް އަރާފައެވެ.

ހަރަދުތައް އިތުރުވަމުން ދިޔަ ނަމަވެސް، ދައުލަތަށް ލިބޭ އާމްދަނީން އާންމު ހަރަދުތައް ހަމަޖެއްސޭނެކަން ކަށަވަރުކޮށްދޭ ޕްރައިމަރީ ސާޕްލަސްގެ ގޮތުގައި 1.7 ބިލިއަން ރުފިޔާ ވަނީ ރެކޯޑުކުރެވިފައެވެ. އެހެންނަމަވެސް، ދައުލަތުގެ ދަރަނި އަދާކުރުމާއި އިންޓްރެސްޓްގެ ހަރަދުތައް ހިމެނުމުން، ބަޖެޓުގެ މުޅި ޖުމްލަ ހިސާބުތަކުން ދައްކަނީ 975.9 މިލިއަން ރުފިޔާގެ ޑެފިސިޓެއް އުޅޭ ކަމަށެވެ.

ހަނގުރާމައިގެ ސަބަބުން ދުނިޔޭގެ ބާޒާރަށް އަންނަ ބަދަލުތަކާއެކުވެސް އާންމު ހިދުމަތްތައް މެދުނުކެނޑި ރައްޔިތުންނަށް ފޯރުކޮށްދިނުމަށް ސަރުކާރުން މަސައްކަތްކޮށް، އެކަމުން ސަރުކާރުން ދަނީ ކާމިޔާބުތަކެއް ހޯދަމުންނެވެ.