އޭޕްރީލް މަހު މީރާއަށް 2.63 ބިލިއަން ރުފިޔާގެ އާމްދަނީއެއް ލިބިއްޖެ

ނިމިދިޔަ އޭޕްރީލް މަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް އާމްދަނީގެ ގޮތުގައި ޖުމްލަ 2.63 ބިލިއަން ރުފިޔާ ބަލައިގަނެފައިވާ ކަމަށް އެ އިދާރާއިން ހާމަކޮށްފިއެވެ.

މީރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިއީ އޭޕްރީލް 2026 ވަނަ އަހަރަށް ލިބޭނެ ކަމަށް ކުރިން އަންދާޒާކުރި މިންވަރަށްވުރެ 16.6 އިންސައްތަ އިތުރު އަދަދެކެވެ. ނަމަވެސް، 2025 ވަނަ އަހަރުގެ އޭޕްރީލް މަހާ އަޅާބަލާއިރު މިއީ 0.3 އިންސައްތައިގެ ދަށްވުމެކެވެ.

އަންދާޒާކުރި ވަރަށްވުރެ އާމްދަނީ އިތުރުވުމުގެ މައިގަނޑު ސަބަބެއްގެ ގޮތުގައި މީރާއިން ފާހަގަކުރަނީ ރިސޯޓުތަކުގެ ކުއްޔާއި، ޖީއެސްޓީ އަދި ވާކް ޕާމިޓް ފީގެ ގޮތުގައި ލިބުނު ފައިސާ އިތުރުވުމެވެ. މީގެ އިތުރުން، އޭޕްރީލް މަހު ލިބުނު އާމްދަނީގެ 32.6 އިންސައްތައަކީ ކުރީގެ ސުންގަނޑިތަކަށް ދައްކަންޖެހޭ ފައިސާ ކަމަށާއި، 14.2 އިންސައްތައަކީ ނުދެއްކި ހުރި ފައިސާ ހޯދުމަށް ކުރި މަސައްކަތުން ލިބުނު އާމްދަނީކަން އެ އިދާރާއިން ފާހަގަކުރެއެވެ.

ދުނިޔޭގައި މިހާރު ހިނގަމުންދާ ހަނގުރާމަތަކުގެ ސަބަބުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 2025 ވަނަ އަހަރުގެ އޭޕްރީލް މަހާ އަޅާބަލާއިރު 19.8 އިންސައްތަ ވަނީ ދަށްވެފައެވެ. މީގެ ސަބަބުން ޓޫރިޒަމް ޖީއެސްޓީ، ގްރީން ޓެކްސް، އެއާޕޯޓް ޓެކްސް އަދި ފީތަކުން ލިބުނު އާމްދަނީ ވަނީ ދަށްވެފައެވެ. މި ބަދަލުތަކާ ގުޅިގެން މީރާއިން ވަނީ ކުރިން އަންދާޒާކުރި ފަތުރުވެރިންގެ އަދަދުތައް މުރާޖައާކޮށް ދަށްކޮށްފައެވެ.

އަދުގެ ސަރުކާރުން މީރާއަށް ނުދައްކާ ހުރި ފައިސާ ހޯދުމަށް ކުރި ހާއްސަ މަސައްކަތުން އޭޕްރީލް މަހު 543 މިލިއަން ރުފިޔާ ވަނީ ހޯދާފައެވެ. އޭގެ ތެރޭގައި ހިމެނެނީ:

• ނޯޓިސް ފޮނުވައިގެން: 372 މިލިއަން ރުފިޔާ
• ޑިއުސް ކްލިއަރެންސް މެދުވެރިކޮށް: 96 މިލިއަން ރުފިޔާ
• އިންސްޓޯލްމަންޓް އެއްބަސްވުންތަކުން: 64 މިލިއަން ރުފިޔާ
• ފޯނު ކޯލްތަކާއި އެކްޝަން ޕޮލިސީގެ ދަށުން: 9 މިލިއަން ރުފިޔާ

އޭޕްރީލް މަހުގެ އާމްދަނީގައި އެންމެ ބޮޑު ހިއްސާއެއް ވަނީ ޖީއެސްޓީއެވެ. އެއީ 1.7 ބިލިއަން ރުފިޔާ (63.6%) އެވެ. ދެން އެންމެ ބޮޑު އާމްދަނީއެއް ލިބިފައިވަނީ:

• ގްރީން ޓެކްސް: 185 މިލިއަން ރުފިޔާ
• އާމްދަނީން ނަގާ ޓެކްސް: 178 މިލިއަން ރުފިޔާ
• އެއާޕޯޓް ޑިވެލޮޕްމަންޓް ފީ އަދި ޑިޕާޗާ ޓެކްސް: ކޮންމެ ބަޔަކުން 152 މިލިއަން ރުފިޔާ
• ރިސޯޓް ކުލި: 129 މިލިއަން ރުފިޔާ

މީރާއިން މައުލޫމާތު ދޭ ގޮތުގައި، މިދިޔަ މަހު ބަލައިގަތް ޖުމްލަ އާމްދަނީގެ ތެރޭގައި 121 މިލިއަން އެމެރިކާ ޑޮލަރު ހިމެނެއެވެ. އާމްދަނީ އިތުރުކުރުމަށްޓަކައި ޓެކްސް ނުދައްކާ ފަރާތްތަކުން ފައިސާ ހޯދުމުގެ މަސައްކަތް އެ އިދާރާއިން ދަނީ މެދުނުކެނޑި ކުރަމުންނެވެ.