އެމްޑީޕީގެ މެންބަރު އަންވަރު ބަންދުގައި ބަހައްޓައިގެން ކޯޓަށް ހާޒިރުކުރަން ހޯދަނީ

އެމްޑީޕީގެ ޖަލްސާތަކުގައި އިސްކޮށް ހަރަކާތްތެރިވާ އަދި އެ ޕާޓީގެ ތިމަރަފުށީ ދާއިރާގެ ރައީސް އަންވަރު އިބްރާހީމް ބަންދުގައި ބަހައްޓައިގެން ކޯޓަށް ހާޒިރުކުރުމަށްޓަކައި ފުލުހުން އޭނާ ހޯދަން ފަށައިފިއެވެ.

ފުލުހުން މިއަދު ހާމަކުރި ގޮތުގައި، އަންވަރު ހޯދަމުންދަނީ ސިވިލް ކޯޓަށް ހުށަހަޅާފައިވާ މައްސަލައަކާ ގުޅިގެން ކޯޓަށް ހާޒިރުވާން އެންގުމުން ހާޒިރުވެފައި ނުވާތީއެވެ. އެހެންކަމުން، އޭނާ ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޯޓުން ވަނީ އަމުރެއް ނެރެފައެވެ.

ފުލުހުން ބުނީ މާދަމާގެ ވަގުތެއްގައި އަންވަރު ކޯޓަށް ހާޒިރުކޮށްދިނުމަށް އަމުރުގައިވާތީ، އޭނާ ހޯދުމުގެ މަސައްކަތް މިހާރު ކުރިއަށްދާ ކަމަށެވެ. އަދި އަންވަރާ ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ، ފުލުހުންގެ ކަސްޓޯޑިއަލް ނަންބަރު 9991442 އަށް ގުޅައި އެ މައުލޫމާތު ހިއްސާކޮށްދިނުމަށް ފުލުހުން ވަނީ އެދިފައެވެ.

އަންވަރު އިބްރާހީމަކީ އެމްޑީޕީގެ ހަރަކާތްތަކުގައި ވަރަށް އެކްޓިވްކޮށް އުޅޭ މެންބަރެކެވެ. ހާއްސަކޮށް އެ ޕާޓީން ބާއްވާ ބޮޑެތި ޖަލްސާތައް ހުށަހަޅައިދިނުމާއި، މަގުމަތީގައި ބާއްވާ އެކި އެކި އިހުތިޖާޖުތަކުގެ އިސް ސަފުން އޭނާ އަބަދުވެސް ފެނެއެވެ.

މިފަދަ މައްސަލަތަކުގައި ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް، ފުލުހުން ވަނީ އާންމުންނަށް ޝުކުރު އަދާކޮށްފައެވެ.