ޕީއެންސީ އެތެރޭގެ އިންތިޚާބުގައި ހިނގި މާރާމާރީއާ ގުޅިގެން އިތުރު މީހަކު ހައްޔަރުކޮށްފި

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބުގެ ވޯޓުލުން ކުރިއަށްދިޔަ ވަގުތު ހިނގި މާރާމާރީއާ ގުޅިގެން އިތުރު މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ބުނީ މި މައްސަލައާ ގުޅިގެން އަލަށް ހައްޔަރުކޮށްފައިވަނީ އުމުރުން 24 އަހަރުގެ ދިވެހި ފިރިހެނެއް ކަމަށެވެ. އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން އާދީއްތަ ދުވަހުގެ ރޭގެ ވަގުތެއްގައެވެ.

މި މައްސަލައާ ގުޅިގެން އާދީއްތަ ދުވަހުގެ ކުރީކޮޅުވެސް ދެ މީހަކު ވަނީ ހައްޔަރުކޮށްފައެވެ. އެއީ އުމުރުން 23 އަހަރާއި 24 އަހަރުގެ ދެ ދިވެހި ފިރިހެނުންނެވެ. މިއާއެކު މި މައްސަލައިގައި މިހާތަނަށް ފުލުހުންގެ ބެލުމުގެ ދަށަށް ގެނެވުނު މީހުންގެ ޖުމުލަ އަދަދު ވަނީ ތިނަކަށް އަރާފައެވެ.

ފުލުހުން ތަޙުޤީޤު ކުރަމުންދަނީ، އިންތިޚާބު ކުރިއަށްދިޔަ ސްކޫލަށް ބަޔަކު ވަދެ، އެތަނުގެ މުދަލަށް ގެއްލުންދީ، އެ ވަގުތު އެތަނުގައި ތިބި މީހުންނާ މެދު މާރާމާރީ ހިންގާފައިވާ މައްސަލައެކެވެ. މި ހާދިސާ ހިނގާފައިވަނީ ޕީއެންސީގެ ދާއިރާތަކުގެ އިންތިޚާބުގެ ވޯޓުލުން ކުރިއަށް ދިޔަ ވަގުތުގައެވެ.

މި މައްސަލަ ފުލުހުން އިތުރަށް ތަޙުޤީޤު ކުރަމުންދާއިރު، މާރާމާރީ ހިންގުމުގެ ސަބަބުން ބައެއް މީހުންނަށް އެކި ވަރުގެ އަނިޔާ ލިބިފައިވާކަމަށް މަޢުލޫމާތު ލިބެއެވެ.