ކަރެކްޝަނާއި ފުލުހުން ގުޅިގެން ޖަލުތަކުގައި ކުރިއަށްގެންދިޔަ އޮޕަރޭޝަން ނިންމާލައިފި

ދިވެހިރާއްޖޭގެ ޖަލުތަކުގެ ރައްކާތެރިކަމާއި، ސަލާމަތީ ކަންކަން އިތުރަށް ވަރުގަދަ ކުރުމަށްޓަކައި މޯލްޑިވްސް ޕޮލިސް ސަރވިސް އާއި މޯލްޑިވްސް ކަރެކްޝަނަލް ސަރވިސް ގުޅިގެން ހިންގި ޚާއްސަ ޖޮއިންޓް އޮޕަރޭޝަން ކާމިޔާބުކަމާއެކު ނިންމާލައިފިއެވެ.

 މި އޮޕަރޭޝަނަކީ ޖަލުތަކުގެ އަމާންކަން ދެމެހެއްޓުމަށް ކުރެވުނު މުހިންމު މަސައްކަތެކެވެ.

މިދިޔަ ޖޫން މަހުގެ 22 ވަނަ ދުވަހުން ފެށިގެން މި ޖުލައި މަހުގެ 13 ވަނަ ދުވަހުގެ ނިޔަލަށް ކުރިއަށް ގެންދިޔަ މި އޮޕަރޭޝަން ބަހާލާފައިވަނީ ހަތަރު ބުރަކަށެވެ. މި ހަރަކާތްތައް މައިގަނޑު ގޮތެއްގައި ހިންގާފައިވަނީ މާލެ، ހުޅުމާލެ، ކ. މާފުށި އަދި ކ. ހިންމަފުށީގައެވެ. ސްޕެޝަލިސްޓް އޮޕަރޭޝަންސްގެ ބެލުމުގެ ދަށުން ކުރިއަށް ގެންދިޔަ މި އޮޕަރޭޝަންގައި ގިނަ ދާއިރާތަކަކުން ފުލުހުން ވަނީ ބައިވެރިވެފައެވެ.

މޯލްޑިވްސް ކަރެކްޝަނަލް ސަރވިސްއިން ފާހަގަކުރި ގޮތުގައި، ޖަލުތަކުގެ ސަލާމަތީ ކަންކަން ހަރުދަނާ ކުރުމަށް ފުލުހުންނާ ގުޅިގެން މިހާތަނަށް ހިންގި އޮޕަރޭޝަންތަކުގެ ތެރެއިން މިއީ އެންމެ ފުޅާދާއިރާއެއްގައި އަދި އެންމެ ކާމިޔާބުކަމާއެކު ކުރިއަށް ގެންދިޔަ އެއް އޮޕަރޭޝަނެވެ. މި އޮޕަރޭޝަންގެ ސަބަބުން ޖަލުތަކުގެ ސަލާމަތީ ނިޒާމަށް ހެޔޮ ބަދަލުތަކެއް އަންނާނެ ކަމަށް ބެލެވެއެވެ.

އޮޕަރޭޝަން ކޮމާންޑަރު ސުޕްރިންޓެންޑެންޓް އޮފް ޕޮލިސް އިސްހާޤު އާދަމްފުޅު ވިދާޅުވީ، "ތިން ހަފުތާއަށް ދެމިގެންދިޔަ މި ބޮޑު ހަރަކާތުގައި ފުލުހުންގެ އެކިއެކި ޑިޕާޓްމަންޓުތަކުން ދެއްވި ފުރިހަމަ އެއްބާރުލުމާމެދު ވަރަށް ބޮޑަށް ހިތްހަމަޖެހިވަޑައިގަންނަވާ" ކަމަށެވެ. އަދި ހުރިހާ މުއައްސަސާތަކާއި ފުލުހުންގެ ޚިދުމަތުގެ އެކި ބައިތަކުން ގުޅިގެން ކުރި މަސައްކަތުން އޮޕަރޭޝަނުން ބޭނުންވި މަގުސަދު ހާސިލުވެފައިވާކަން އޭނާ ފާހަގަކުރެއްވިއެވެ.

މި އޮޕަރޭޝަންގައި އަމަލީގޮތުން ބައިވެރިވި ޓީމުތަކުގެ ތެރޭގައި އެސްއޯގެ ސްވަޓް ޓީމު، ކޭނައިން ޔުނިޓު، މާލެ އަދި ހުޅުމާލެ ޕޮލިސް، ޑްރަގް އެންފޯސްމަންޓް އަދި މެރިން ޕޮލިސް ހިމެނެއެވެ. މީގެއިތުރުން ޕްރޮޓެކްޓިވް ސެކިއުރިޓީ، މީޑިއާ، އިންޓެލިޖެންސް، ފޮރެންސިކްސް، މޭޖަރ ކްރައިމް އިންވެސްޓިގޭޝަން އަދި ފެމިލީ އެންޑް ޗައިލްޑް ޕްރޮޓެކްޝަނުން ވެސް ވަނީ މި އޮޕަރޭޝަންގައި މުހިންމު ދައުރެއް އަދާކޮށްފައެވެ.