އީފާސް އިން އޮންލައިން ފޭސްވެރިފިކޭޝަންގެ ޚިދުމަތް އަލުން ފަށައިފި

ނެޝަނަލް ޑިޖިޓަލް އައިޑެންޓިޓީ އީފާސް އިން އޮންލައިން ފޭސްވެރިފިކޭޝަންގެ ޚިދުމަތް އަލުން ފަށައިފި ކަމަށް ނޭޝަނަލް ސެންޓަރ ފޯ އިންފޯމޭޝަން ޓެކްނޮލޮޖީ އިން ބުނެފިއެވެ.

އެންސީއައިޓީ އިން ބުނެފައިވަނީ އެ ސެންޓަރުން ތަރައްޤީކޮށް ބަލަހައްޓަމުންދާ އީފާސް ނިޒާމުގައި ބޭނުންކުރަމުންދާ އޮންލައިންކޮށް މޫނު ދެނެގަންނަ (ފޭސް ވެރިފިކޭޝަން) ޚިދުމަތް ދިނުމަށް ކުރިން ހަވާލުކޮށްފައިވާ "ސަމް އެންޑް ސަބްސްޓެންސް ޕްރައިވެޑް ލިމިޓެޑް" ކުންފުނިން އެ މަސައްކަތް ވަކިކޮށް އައު ވެންޑާއަކާއި މަސައްކަތް ހަވާލުކުރުމަށްފަހު އަލުން އޮންލައިން ފޭސް ވެރިފިކޭޝަންގެ ޚިދުމަތް ފަށައިފައިވަ ކަމަށެވެ.

މިވަގުތު މި ޚިދުމަތް ލިބޭނީ އީފާސް ވެބް މެދުވެރިކޮށް ކަމަށާއި އަދި އާންމުކޮށް ބޭނުންކުރާ ހުރިހާ ބްރައުޒާތަކުން އީފާހަށް ލޮގިންކޮށް މި ޚިދުމަތް ލިބޭނެކަމަށް އެސެންޓަރުން ބުނެފައިވެއެވެ.

ފޭސް ވެރިފިކޭޝަން ހެދުމަށް މިހާރު ބޭނުންކުރަމުންދަނީ ލެޓްވިއާގައި ރަޖިސްޓަރީ ކޮށްފައިވާ ރެގިއުލާ ފޮރެންސިކްސް ކުންފުނީގެ އެޕްލިކޭޝަންއެއް ބޭނުންކޮށްގެނެވެ. އަދި މިކަން ހިގާނީ ބޭރުގެ އެއްވެސް ފަރާތަކަށް އެއްވެސް ރައްޔިތެއްގެ ފޮޓޯއެއް ނުވަތަ އެނޫންވެސް އެހެން ޒާތީ މައުލޫމާތެއް ހިއްސާކުރުމަކާއި ނުލައި އެސެންޓަރުގެ އެތެރޭގައި ކަމަށްވެސް އެންސީއައިޓީ އިން ބުނެފައިވެއެވެ.

ރެގިއުލާ ފޮރެންސިކްސް އަކީ 30 އަހަރުގެ ތަޖުރިބާއާއި އެކު ސެކިއުރިޓީގެ ދާއިރާއިން ގިނަ ޑިޖިޓަލް ޚިދުމަތްތަކެއް ފޯރުކޮށްދޭ ޤާބިލް އަދި ބައިނަލްއަޤްވާމީ ބޮޑެތި ކުންފުނިތަކާއި ތަފާތު އެކި ޤައުމުތަކަށްވެސް ޚިދުމަތް ދެމުންދާ އިތުބާރު ހުރި ކުންފުންޏެއް ކަމަށް އެސެންޓަރުން ވަނީ ބުނެފައެވެ.

އީފާސްގެ ފޭސްވެރިވިކޭޝަން އަށް ގެނައި މިބަދަލާއި ގުޅިގެން އެންސީއައިޓީ އާއި ހަވާލުވެވަޑައިގެން ހުންނެވި އެންމެ އިސްވެރިޔާ، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ، ސްޓޭޓް މިނިސްޓަރ، ޑރ. މުހައްމަދު ކިނާނަތު ވިދާޅުވެފައިވަނީ އަމާޒަކީ އީފާސްގެ ނިޒާމް ދުވަހެއް ދުވަހަކަށް ހަރުދަނާކޮށް މި ނިޒާމަކީ ދިވެހިރާއްޖޭގެ ޑިޖިޓަލް ހިދުމަތްތައް ފުޅާކުރުމުގައި އެންމެ އިސްދައުރެއް އަދާކުރާ، ރައްޔިތުންނާއި މުއައްސަސާތަކުގެ އިތުބާރާއި ޔަޤީންކަން ލިބިފައިވާ ނިޒާމަކަށް ހެދުން ކަމަށެވެ.

މީގެއިތުރަށް ކިނާނަތު ވިދާޅުވެފައިވަނީ މި އަމާޒުހާސިލްކުރުމުގައި އަބަދުވެސް ރައްޔިތުންގެ އަޑުއަހައި އިހުސާސްތައް ދެނެގެން ޚިދުމަތް ދިނުމަށް ވަރަށް ބޮޑަށް އިސްކަންދެއްވާނެކަމަށެވެ.

އީފާހުގެ މުހިންމު އެއް ބޭނުމަކީ ދައުލަތުން ފޯރުކޮށްދޭ ޑިޖިޓަލް ހިދްމަތްތައް ފޯރުކޮށްދިނުމުގައި އެ ޚިދުމަތް ދެވެނީ ޚިދުމަތަށް އެދޭ އަސްލު ފަރާތައްކަން ކަށަވަރުކުރުން ކަމަށް އެސެންޓަރުން ބުނެއެވެ.

މީގެ ބޭނުމަކަށްވަނީ އެހެން މީހުންގެ އައިޑެންޓިޓީ ވަގަށް ނަގައި އޮޅުވާލައިގެން މުއާމަލާތްތައް ހިންގުމުގެ ފުރުސަތު ހަނިކުރުން ކަމަށާއި، އޮންލައިން ފޭސްވެރިފިކޭޝަންގެ ޚިދުމަތް ތަޢާރަފުކުރުމުގެ ކުރިން އީފާހުގެ ވެރިފަރާތް ކަށަވަރުކުރަމުން އައީ އެކަމަށް ހާއްސަކުރެވިފައިވާ މަރުކަޒުތަކަށް އެފަރާތްތަކުން ހާޒިރުވެ ނުވަތަ ވީޑީއޯ ކޯލް ކޮށްގެން ބެލުމަށްފަހު އެމަޢުލޫމާތު މެނުއަލްކޮށް އަޕްޑޭޓްކޮށްގެން ކަމަށްވެސް އެސްސީއައިޓީ އިން ބުނެއެވެ.