ކްރިއޭޓަރ ހަބް އިމާރާތުގެ ފިނިޝިންގ މަސައްކަތް ފަށައިފި

މާލޭގައި ތަރައްޤީކުރަމުންދާ ކްރިއޭޓަރ ހަބްގެ މައި އިމާރާތުގެ އޮނިގަނޑުގެ މަސައްކަތްތައް ނިމި، މިހާރު ކުރިއަށް ދަނީ ފިނިޝިންގެ މަސައްކަތްތައް ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ވިދާޅުވެއްޖެއެވެ. ބީސީސީން މަޢުލޫމާތު ދެއްވާ ގޮތުގައި މިހާރު ކުރިއަށްދަނީ އިމާރާތުގެ އެތެރޭގެ ރޭނުންތަކާއި، ފެނާއި ނަރުދަމާ އަދި ކަރަންޓުގެ މަސައްކަތްތަކާއެކު ފިނިޝިންގ މަރުހަލާގެ މުހިންމު މަސައްކަތްތަކެވެ.

މި މަޝްރޫޢުގެ ކުރިއެރުމަށް ބަލާއިރު، އިމާރާތުގެ ސްޓްރަކްޗަރަލް މަސައްކަތްތަކުގެ 100 އިންސައްތަ ވަނީ އެއްކޮށް ނިންމާލާފައެވެ. މީގެ އިތުރުން ރޭނުމުގެ މަސައްކަތުގެ 97 އިންސައްތަ ނިމިފައިވާއިރު، ފެން ވައިރުކުރުމުގެ މަސައްކަތުގެ 75 އިންސައްތަ ވަނީ ނިމިފައެވެ. އަދި ކަރަންޓު މަސައްކަތާއި ކުލަލުމުގެ މަސައްކަތުގެ 5 އިންސައްތަ މިހާރު ވަނީ ނިމިފައިވާ ކަމަށް ބީސީސީގެ ތަފާސްހިސާބުތަކުން ދައްކައެވެ.

11 ބުރީގެ މި އިމާރާތަކީ ރާއްޖޭގެ އުފެއްދުންތެރި އިޤްތިސާދު ނުވަތަ ކްރިއޭޓަރ އިކޮނޮމީ ފުޅާކުރުމަށް ބީސީސީން ކުރިއަށްގެންދާ މުހިންމު މަޝްރޫއެކެވެ. ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު މުޙައްމަދު ވިދާޅުވީ، "ބީސީސީން މަސައްކަތް ކުރަމުންދަނީ ކްރިއޭޓަރ ހަބް ހުޅުވާއިރު އުފެއްދުންތެރިންނަށް ބޭނުންވާ ހުރިހާ ޚިދުމަތްތަކެއް ލިބޭނެ ފުރިހަމަ ފެސިލިޓީއެއްގެ ގޮތުގައި އެތަން ހުޅުވުމަށް. އަޅުގަނޑުމެންގެ މަޤްސަދަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަސައްވަރާ އެއްގޮތަށް، އުފެއްދުންތެރި އިޤްތިސާދެއް ބިނާކުރުމަށް އެހީތެރިވުން،" ކަމަށެވެ.

ކްރިއޭޓަރ ހަބް ހުޅުވުމުން އާޓިސްޓުންނާއި، ޑިޒައިނަރުންނާއި، ޕްރޮގްރާމަރުންނާއި، ކޮންޓެންޓް އުފައްދާ ފަރާތްތަކަށް ބޭނުންވާ ޒަމާނީ ޕްރޮޑަކްޝަން ސްޓޫޑިއޯތަކާއި ކޯ-ވަރކިންގ ސްޕޭސްތައް ލިބިގެންދާނެއެވެ. މީގެ ތެރޭގައި ފޮޓޯގްރަފީ، ވީޑިއޯ، އޯޑިއޯ ރެކޯޑިންގ އަދި އެޑިޓިންގއަށް ޚާއްސަ ތަންތަނާއި އެންމެ ފަހުގެ ޒަމާނީ ސާމާނު ހިމެނޭނެއެވެ.

މީގެ އިތުރުން، ބީސީސީން ކުދި އަދި މެދުފަންތީގެ ވިޔަފާރިތަކަށް ދޭ މުހިންމު ޚިދުމަތްތައްވެސް މި އިމާރާތުގެ ދަށަށް ބަދަލުކުރެވޭނެއެވެ. މީގެ ތެރޭގައި ވިޔަފާރިތަކަށް ބޭނުންވާ ކޮންސަލްޓެންސީ އާއި އެޑްވައިޒަރީ ޚިދުމަތްތަކުގެ އިތުރުން، އޮތެންޓިކް މޯލްޑިވްސްގެ އައުޓްލެޓެއްވެސް މި އިމާރާތުގައި ޤާއިމުކުރެވޭނެއެވެ. މިއީ ދިވެހި އުފެއްދުންތެރިންނަށް އެމީހުންގެ ހުނަރު ވިޔަފާރިއަކަށް ބަދަލުކުރުމަށް ލިބޭނެ ރަނގަޅު ފުރުޞަތެކެވެ.

ސަރުކާރުން މި މަޝްރޫއު ދެކެނީ ޤައުމީ އިޤްތިޞާދު ސިންދަފާތުކޮށް، ޑިޖިޓަލް އަދި އުފެއްދުންތެރި ދާއިރާތަކުން ޒުވާނުންނަށް އާ ފުރުޞަތުތަކެއް ހުޅުވައިދޭނެ މުހިންމު ވަސީލަތެއްގެ ގޮތުގައެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ކްރިއޭޓަރ ހަބް ރަސްމީކޮށް ހުޅުވުމަށް ހަމަޖެހިފައިވަނީ 11 ނޮވެންބަރު 2026 ގައި ކަމަށް އިޢުލާނުކުރައްވާފައެވެ.