ފަރަންސޭސިވިލާތުން އދ. ގައި ވާހަކަދައްކަން ފެށުމުން އެމެރިކާގެ ވަފުދު ބައްދަލުވުން ދޫކޮށް އިހުތިޖާޖުކޮށްފި

އދ. ގެ ސަލާމަތީ މަޖިލީހުގައި ފަރަންސޭސިވިލާތުގެ މަންދޫބު ވާހަކަދައްކަވަން ފެއްޓެވުމުން، އެމެރިކާގެ ވަފުދުން ބައްދަލުވުން ދޫކޮށް ނިކުމެ ވަރުގަދަ އިހުތިޖާޖެއް ކޮށްފިއެވެ. މި ހާދިސާ ހިނގާފައިވަނީ މިދިޔަ ހޯމަ ދުވަހު ރަޝިޔާ-ޔޫކްރެއިން ހަނގުރާމައާ ގުޅޭގޮތުން ބޭއްވި ކުއްލި ބައްދަލުވުމެއްގައެވެ.

މި އިހުތިޖާޖަކީ އިންސާނީ ހައްގުތަކާ ގުޅޭގޮތުން އެމެރިކާއިން ވޯޓުދޭ ގޮތް، ދުނިޔޭގެ ޚުދުމުޚުތާރު ގައުމުތަކާ އެއްވަރުކޮށް ފަރަންސޭސިވިލާތުން ދެއްކި ވާހަކަތަކާ ގުޅިގެން ކުރި ކަމެކެވެ. މި މައްސަލަ ހޫނުވީ، އދ. ގެ ހިއުމަން ރައިޓްސް ހައި ކޮމިޝަނަރު ވޮލްކާރ ތާރކްގެ ދައުރު އިތުރުކުރުމަށް ނެގި ވޯޓުގައި، އުތުރު ކޮރެއާ އާއި ރަޝިޔާއާ އެކު އެމެރިކާއިން ދެކޮޅަށް ވޯޓު ދިނުމާ ގުޅިގެންނެވެ.

ޖެނީވާގައި ހުންނަ ފަރަންސޭސިވިލާތުގެ މިޝަނުން 'އެކްސް' ގައި ބުނެފައިވަނީ، އެމެރިކާއަކީ މިހާރު އިންސާނީ ހައްގުތަކުގެ ނަމޫނާއެއް ނޫން ކަމަށާއި، އެގައުމު އޮތީ އުތުރު ކޮރެއާ، ނިކަރާގުއާ، މާލީ އަދި ރަޝިޔާ ފަދަ ގައުމުތަކާ އެކު އެކަހެރިވެފައި ކަމަށެވެ. މިއަށް ރައްދު ދެއްވަމުން އެމެރިކާގެ ސަފީރު މައިކް ވޯލްޓްޒް ވިދާޅުވީ، ފަރަންސޭސިވިލާތުން ވޯޓު ދިނީ ދިމިގްރާތީ ގައުމުތަކަށް ނަސޭހަތްދީ، އަނިޔާވެރި ގައުމުތަކާ ގާތް ގުޅުމެއް ބާއްވާ ބޭފުޅަކަށެވެ.

ވޮލްކާރ ތާރކް އަކީ ރަޝިޔާއިން ޔޫކްރެއިންގައި ކުރާ ހަނގުރާމައަށާއި، ޣައްޒާގައި އިސްރާއީލުން ހިންގާ އަސްކަރީ އަމަލުތަކަށް ފާޑުވިދާޅުވެފައިވާ ބޭފުޅެކެވެ. އޭނާގެ ދެވަނަ ދައުރަށް 144 ގައުމަކުން ތާއީދުކުރިއިރު، ދެކޮޅަށް ވޯޓު ދިނީ އެމެރިކާ ހިމެނޭހެން 10 ގައުމަކުންނެވެ.

އެމެރިކާގެ ސަފީރު ޑެން ނެގްރިއާ ވިދާޅުވީ، ފަރަންސޭސިވިލާތުން އެމީހުންގެ އިހުތިރާމް ކުޑަ ވާހަކަތައް ހުއްޓާނުލާހާ ހިނދަކު މިފަދަ އިހުތިޖާޖުތައް ކުރިއަށްދާނެ ކަމަށެވެ. މީގެ އިތުރުން، އެމެރިކާގެ ސަފީރު ޖެފް ބާޓޯސް ވަނީ އދ. އަށް އެމެރިކާއިން ދޭ އެހީތަކާއި ބައިވެރިވުންތައް އަލުން މުރާޖައާ ކުރާނެ ކަމުގެ އިންޒާރު ދެއްވާފައެވެ.

ފަރަންސޭސި ސަފީރު ޖެރޯމް ބޮނަފޮންޓް، ވޮލްކާރ ތާރކް ސިފަކުރެއްވީ "އިންސާފުގެ އަޑު" ގެ ގޮތުގައެވެ. އދ. ގެ ތަރުޖަމާނު ފަރްހާން ހައްގު ވަނީ އެމެރިކާގެ ވަފުދުން ބައްދަލުވުން ދޫކޮށް ދިޔަ މައްސަލާގައި އެއްޗެއް ވިދާޅުވާން އިންކާރު ކުރައްވާފައެވެ. ނަމަވެސް، ހުރިހާ މެންބަރު ގައުމުތަކުންވެސް މަޖިލީހުގެ ނިންމުންތަކަށް އިހުތިރާމް ކުރާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވިއެވެ.