ހިންމަފުށީގެ ހުޅަނގުން ބާޖެއް އޮޔާދާތީ ދަތުރުވެރިން ސަމާލުވުމަށް އިލްތިމާސްކޮށްފި

ކ. ހިންމަފުށީގެ ހުޅަނގު ފަރާތުން ބޮޑު ދަގަނޑު ބާޖެއް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުން މިކަމަށް ބޮޑަށް ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

އެމްއެންޑީއެފުން މައުލޫމާތު ދީފައިވާ ގޮތުގައި، މި ބާޖު ފެނިފައިވަނީ ހިންމަފުށީގެ ހުޅަނގުން ގާތްގަނޑަކަށް 3.50 ނޯޓިކަލް މޭލު ބޭރުންނެވެ. މި ބާޖު މިހާރު އޮޔާދަނީ ކ. ހިންމަފުއްޓާއި ގިރިފުއްޓާ ދެމެދުން އިރުމައްޗަށްކަމަށް އެމްއެންޑީއެފުން ވިދާޅުވެއެވެ.

މި ހާދިސާއާ ގުޅިގެން އެންމެ ބޮޑު ކަންބޮޑުވުމަކަށް ވެފައިވަނީ، އޮޔާދާ މި ބާޖުގައި އެއްވެސް ވަރަކަށް އަލިކަމެއް ނެތުމެވެ. މީގެ ސަބަބުން ކަނޑުދަތުރުކުރާ ފަރާތްތަކަށް، ހާއްސަކޮށް ރޭގަނޑުގެ ވަގުތުތަކުގައި ބާޖު ދެނެގަތުމަށް ދަތިވެ، ނުރައްކާތެރި ހާދިސާއެއް ހިނގުމުގެ ފުރުސަތު އޮތްކަމަށް އެމްއެންދީއެފުން ވިދާޅުވިއެވެ.

އެހެންކަމުން، މި ސަރަހައްދުން ދަތުރުކުރައްވާ ހުރިހާ ފަރާތްތަކުން، ހާއްސަކޮށް ރޭގަނޑު ދަތުރުކުރައްވާ އުޅަނދުފަހަރުގެ ކެޕްޓަނުންނާއި ފަޅުވެރިން، އިތުރަށް ސަމާލުވެލެއްވުމަށް ވަނީ އަންގާފައެވެ.