އޮމަދޫ ފުލުހުންގެ މަރުކަޒުގެ މަސައްކަތް ހަލުވިކަމާއެކު ކުރިއަށްދަނީ

އދ. އޮމަދޫގައި ބިނާކުރަމުންދާ ފުލުހުންގެ މަރުކަޒުގެ މަސައްކަތް ހަލުވިކަމާއެކު ކުރިއަށްދާކަން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

މިކަން ހާމަކުރައްވަ އެކްސްގައި ކުރި ޕޯސްޓެއްގައި އެ ކުންފުނިން ބުނީ، މަޝްރޫއުގެ ދަށުން މިހާރު ކުރިއަށްދަނީ، ފުރާޅު ހެދުމުގެ މަސައްކަތްތައް ކަމަށެވެ. އަދި މީގެ އިތުރުން، ވަށާ ފާރު ރޭނުމުގެ މަސައްކަތާއި، ޕޮލިސް ޕޯސްޓުގެ ފާރުތައް ބިނާ ކުރުމުގެ މަސައްކަތް ވެސް ކުރިއަށްދާ ކަމަށް އެމްޓީސީސީ އިން ބުނެއެވެ.

މި މަސައްކަތުގެ އަމަލީ މަސައްކަތް ފަށާފައިވަނީ، މިދިޔަ އަހަރުގެ އޮކްޓޯބަރު މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އ.ދ. އަތޮޅަށް ކުރެއްވި ދަތުރުފުޅެއްގެ ތެރެއިންނެވެ. 

ފުލުހުންގެ މަރުކަޒުގެ ބިންގާ އަޅުއްވާދެއްވީ،  ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާންއެވެ.

Project Update: Development of Police post in ADh. Omadhoo

Roofing work, boundary wall masonry work and police post building masonry work is currently ongoing at the project site.

Follow more updates at: https://t.co/SfVAzkW2pp#MTCCProjects #TeamMTCC #RayyithungeKunfuni… pic.twitter.com/wJoHPZZTVf

— MTCC Plc (@MTCCPlc) August 1, 2026

2000 އަކަފޫޓުގެ ފުލުހުންގެ މަރުކަޒަކަށް ބޭނުންވާ އެންމެހައި ޚިދުމަތެއް އެމްޓީސީސީއިން ގާއިމުކުރުމަށް މި މަޝްރޫއުގެ ދަށުން ވަނީ ހަމަޖެހިފައެވެ.

އަދި ސަރުކާރުން މި މަޝްރޫއަށް 2.2 މިލިއަން ރުފިޔާ ޚަރަދުކުރުމަށް ވެސް ވަނީ ނިންމާފައެވެ.

ރާއްޖޭގެ ހުރިހައި ރަށެއްގައި ފުލުހުންގެ  ހިދުމަތް ގާއިމުކުރުމަކީ ސަރުކާރުން ވަރަށް ބޮޑު އިސްކަމެއްދެއްވާ ކަމެއްކަމަށްވާއިރު، އެ ކަމަށް ބޭނުންވާ އިމާރަތްތައް މިހާރު އަންނަނީ ރަށްރަށުގައި ބިނާކުރަމުންނެވެ. އެގޮތުން، ކުރިއަށް އޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ފުލުހުންގެ ހިދުމަތަށް ބޭނުންވާ އެންމެހައި އިމާރާތްތައް ތަރައްގީކުރުމަކީ ސަރުކާރުގެ ލަނޑުދަނޑިއެވެ.