ގޯލްޑް ކަޕް: ހުރާ ބަލިކޮށް ދެވަނަ ބުރުގެ ޖާގަ ކަށަވަރުކުރި 6 ވަނަ ޓީމަކަށް އައްޑޫ ސިޓީ

ނައިންޓީ ޕްލަސް ގޯލްޑް ކަޕްގެ ގްރޫޕް-ސީގައި އައްޑޫ ސިޓީއިން ހުރާ ބަލިކޮށް ދެވަނަ ބުރުގެ ޖާގައެއް ކަށަވަރުކޮށްފިއެވެ. ގަލޮޅު ދަނޑުގައި ހޯމަ ދުވަހުގެރޭ ކުޅުނު މި މެޗު އައްޑޫ އިން ކާމިޔާބުކޮށްފައިވަނީ 1-0 އިންނެވެ.

މި މެޗަށް ނިކުތް އިރު 2 ޕޮއިންޓާއެކު ގްރޫޕްގެ 3 ވަނައިގައި އޮތުމުން، އައްޑޫއަށް ކޮންމެހެން ވެސް މޮޅެއް މުހިންމުވިއެވެ. އަދި ހުރާ ބަލިކޮށް 3 ޕޮއިންޓު ހޯދުމާއެކު، އެ ޓީމު މިހާރު އޮތީ ގްރޫޕްގެ އެއް ވަނައިގައެވެ. 

މި ގްރޫޕްގެ ފަހު މެޗުގައި ގުރައިދޫ އާއި ކުރެންދޫ ބައްދަލުކުރާއިރު، ގުރައިދޫއިން އެ މެޗު ކާމިޔާބުކޮށްފިނަމަ ގްރޫޕްގެ އެއްވަނަ ލިބޭނީ އެ ޓީމަށެވެ. އަދި އޭރުން މުބާރާތާއި އަލްވަދާއު ކިޔަން ޖެހޭނީ ކުރެންދޫއެވެ. ނަމަވެސް، ކުރެންދޫ އިން މެޗު ކާމިޔާބުކޮށްފިނަމަ ގްރޫޕްގެ އެއްވަނަ ލިބޭނީ އައްޑޫ އަށެވެ. އަދި އޭރުން ހުރާ ޖެހޭނި މުބާރާތާއި އަލްވަދާއު ކިޔާށެވެ.

ހުރާ އާއި އައްޑޫ ސިޓީގެ މެޗުގައި ފެނުނު ހަމައެކަނި ގޯލު ކާމިޔާބުކޮށްފައިވަނީ މެޗުގެ ފުރަތަމަ ހާފުގައެވެ. އެ ގޯލު ކާމިޔާބުކޮށްދިނީ ފުރަތަމަ ޑިވިޝަނުގެ ގިނަ ކްލަބްތަކާއި ގައުމީ ފުޓްބޯޅަ ޓީމަށް ވެސް ކުޅުނު އިބްރާހިމް ވަހީދު ހަސަނެވެ.

އައްޑޫގެ ލީޑު ފުޅާ ކުރުމަށް ތަޖުރިބާކާރު ކުޅުންތެރިޔާ އިސްމާއިލް އީސާ (މެސީ) އާއި ހާޒިމް ފައުޒީ އަށް ވެސް ރަގަޅު ފުރުސަތުތަކެއް ލިބިފައި ވެއެވެ. ނަމަވެސް އެ ފުރުސަތުތައް ވަނީ ގޯލަކަށް ބަދަލުކުރެވޭ ގޮތް ނުވެފައެވެ.

އައްޑޫ ސިޓީގެ ގޯލަށް އެންމެ ނުރައްކާ ކުރީ ހުރާއަށް ލިބުނު ހިލޭ ޖެހުމަކުން، އެ ޓީމުގެ މުހައްމަދު ތަޝްމީން ފޮނުވާލި ބޯޅައަކުންނެވެ. އެ ބޯޅައިގެ ހުރަހަކަށްވީ، އައްޑޫ ސިޓީގެ ކީޕަރުގެ އަތާއި ގޯލުގެ ދަނޑިއެވެ. އެ ބޯޅަ ބޭރަށް ދިޔައީ ކީޕަރުގެ އަތުގައި ޖެހިފައި ދަނޑީގައި ވެސް ޖެހުމަށްފަހުއެވެ.

މި މުބާރާތުގައި މިއަދު ހަވީރު ކުޅޭނީ ގްރޫޕް-ސީގެ ފަހުމެޗެވެ. އެ މެޗުގައި ބައްދަލުކުރާނި ކުރެންދޫއާއި ގުރައިދޫއެވެ. ރޭގަނޑު އޮންނަ މެޗުގައި ބައްދަލުކުރާނީ ގްރޫޕް-ޑީގެ ނައިފަރާއި ކެންދޫއެވެ.