ޕީއެންސީގެ ނައިބު ރައީސްކަމަށް މިނިސްޓަރު ރާފިޢު ކުރިމަތިލައްވަނީ

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުން އިންތިޚާބުކުރާ އެ ޕާޓީގެ ނައިބު ރައީސްކަމުގެ ރޭހަށް، މިނިސްޓަރ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސް ޢަބްދުﷲ ރާފިޢު ކުރިމަތިލައްވައިފިއެވެ.

މިނިސްޓަރު ރާފިޢު މިކަން ހާމަކުރެއްވީ އެމަނިކުފާނުގެ ސޯޝަލް މީޑިއާ އެކައުންޓް މެދުވެރިކޮށް މިއަދު ކުރެއްވި ޕޯސްޓެއްގައެވެ. އެ ޕޯސްޓުގައި މިނިސްޓަރު ވިދާޅުވީ، މާތް ﷲގެ ވާގިފުޅާއެކު، ކޮންގްރެސް ޕާޓީގެ މަތީ މަޖިލީހުގެ ފަރާތުން އިންތިޚާބުކުރާ ޕާޓީގެ ނައިބު ރައީސްކަމުގެ މަޤާމަށް ކުރިމަތިލުމަށް ގަސްދުކޮށް، އެކަން ރަސްމީކޮށް އިޢުލާން ކުރައްވާ ކަމަށެވެ.

މީގެ އިތުރުން، މި މަޤާމަށް އިންތިޚާބުވުމުގައި ޕީއެންސީގެ މަތީ މަޖިލީހުގެ އެންމެހައި މެންބަރުންގެ ތާޢީދާއި އެހީތެރިކަމަށް މިނިސްޓަރު ރާފިޢު ވަނީ އިޚުލާޞްތެރިކަމާއެކު އެދިވަޑައިގެންފައެވެ.

﷽
މާތް ﷲގެ ވާގިފުޅާއެކު، ކޮންގްރެސް ޕާޓީގެ މަތީ މަޖިލީހުގެ ފަރާތުން އިންތިޚާބުކުރާ ޕާޓީގެ ނައިބު ރައީސްކަމުގެ މަޤާމަށް ކުރިމަތިލުމަށް އަޅުގަނޑު ޤަޞްދުކޮށް، އެކަން އިޢުލާން ކުރަމެވެ. އަދި މި މަޤާމަށް އަޅުގަނޑު އިންތިޚާބު ކުރުމުގައި މަތީ މަޖިލީހުގެ އެންމެހައި ލޮބުވެތި… pic.twitter.com/GyNyinljwZ

— Abdulla Rafiu (@AbdhullahRafiu) August 1, 2026

ޕީއެންސީގެ އެތެރޭގެ މި އިންތިޚާބު ބޭއްވުމަށް ހަމަޖެހިފައިވަނީ ކުރިއަށް އޮތް ސެޕްޓެމްބަރު މަހުގެ ތެރޭގައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސަތު ބަލަހައްޓަވާ ޕީއެންސީއަކީ މިހާރު ރާއްޖޭގެ ވެރިކަން ކުރާ މައި ޕާޓީއެވެ. މި އިންތިޚާބަކީ ޕާޓީގެ ހިންގުން ހަރުދަނާކޮށް، ކުރިއަށް އޮތް ދައުރަށް ޕާޓީގެ އިސް ސަފު ތަރުތީބުކުރުމަށް ބާއްވާ މުހިންމު އިންތިޚާބެކެވެ.